1, 2. (a) Sortu problema furu fu wi abi na ini a ten disi èn san de a bakapisi? (b) Sortu howpu Yesaya 41:10, 13 e gi wi?

WAN sisa di de wan gewoon pionier èn di trow nanga wan owruman, e taki: „Aladi mi de fayafaya na ini a diniwroko, toku mi e broko mi ede furu yari kaba nanga wan lo sani. Disi e meki taki mi no man sribi bun èn mi e kon siki. A abi krakti tu tapu a fasi fa mi de nanga trawan èn son leisi mi wani gi abra.”

² Yu e frustan fa a sisa disi e firi? A libi na ini na ogri grontapu disi fu Satan e tyari wan lo stress kon gi sma. Disi e meki taki wi e broko wi ede èn wi e lasi-ati son leisi. A gersi leki wi musu tyari wan hebi lai di e meki taki wi no man waka esi (Odo 12:25). San kan meki taki yu e firi so? We, kande yu e sari fu di wan lobiwan fu yu dede, noso fu di yu abi wan seryusu siki. A kan taki yu musu sorgu yu famiri na ini a muilek ten disi pe a no e go bun nanga na ekonomia, noso kande sma e gens yu. Disi e tyari wan lo stress kon gi yu di kan meki yu firi swaki noso di kan meki srefi taki yu no e prisiri moro. Ma yu kan de seiker taki Yehovah de klariklari fu langa wan anu gi yu.​—Leisi Yesaya 41:10, 13.

3, 4. (a) Fa Bijbel e gebroiki a wortu „anu”? (b) Na ini sortu situwâsi wan sma anu kan anga?

³ Son leisi Bijbel e taki fu son pisi fu a skin fu sori  sortu fasi libisma abi noso san den e du. Na ini Hebrewtongo nanga Grikitongo, Bijbel e taki hondrohondro leisi fu na anu. Fu eksempre, den wortu „tranga na anu”, wani taki fu gi wan sma deki-ati noso fu tranga en so taki a e kisi krakti baka fu du wan sani (1 Sam. 23:16; Esra 1:6). A wani taki tu dati wan sma abi a howpu taki sani o go bun.

⁴ Bijbel e taki tu fu anu di e anga. Disi e sori taki wan sma lasi-ati, a no abi deki-ati noso taki a lasi howpu (2 Kron. 15:7; Hebr. 12:12). Nofo tron wan sma di e firi so wani gi abra. Kande sani de di e stress en noso di e meki a firi leki a no man moro. A kan taki en bribi kon swaki srefi. Efu yu de na ini so wan situwâsi, dan san kan gi yu deki-ati baka? San kan yepi yu fu firi bun baka èn fu abi krakti nanga prisiri baka?

5. (a) Te wi abi problema, dan san wi wani du kande, ma san wi no musu frigiti? (b) San wi o luku na ini na artikel disi?

⁵ Leisi Sefanya 3:16, 17. Te wi e frede noso e lasi-ati, dan dati de leki wi anu e anga. Ma wi lobi-ati Tata Yehovah e gi wi a kari fu ’trowe ala wi hebi na en tapu’ (1 Petr. 5:7). Wi no musu frigiti san Gado ben taigi den Israelsma. A ben taigi den taki a makti ’anu fu en no syatu, so taki a no man frulusu’ den futuboi fu en (Yes. 59:1). Na ini na artikel disi wi o luku dri moi eksempre na ini Bijbel di e sori taki Yehovah de klariklari fu tranga en pipel fu du a wani fu en èn taki a man du dati awinsi na ini sortu muilek situwâsi den de. Luku fa den eksempre disi kan gi yu deki-ati.

6, 7. Sortu prenspari sani wi kan leri fu a fasi fa Israel wini a feti nanga den Amalèksma?

⁶ Syatu baka di den Israelsma kon fri fu Egepte, den Amalèksma kon feti nanga den. Moses taigi Yosua, wan man di ben abi deki-ati, fu teki fesi na ini a feti disi. Baka dati Moses tyari Aron nanga Hur go na wan pikin bergi di ben de krosibei. Drape den ben kan si a heri feti. Yu denki taki na lon den dri man disi ben lon fu di den ben frede? Nôno!

⁷ Moses du wan sani di meki taki den Israelsma ben o wini a feti. A hori a tiki fu a tru Gado na ini en anu, dan a opo en anu go na loktu. Solanga Moses ben e du dati, Yehovah ben e yepi den Israelsma fu wini den Amalèksma. Ma te Moses anu ben kon weri èn a ben saka den, dan den Amalèksma ben e bigin wini a feti. Di Aron nanga Hur si disi, dan esi-esi den „teki wan ston èn den meki [Moses] sidon na en tapu. Ne Aron nanga Hur hori den anu fu en. Aron ben tanapu na a wan sei fu Moses èn Hur ben tanapu na a tra sei. Na so den tan hori en anu na loktu teleki son dongo.” Iya, a makti anu fu Gado, ben meki taki den Israelsma wini a feti.​—Eks. 17:8-13.

8. (a) San Asa du di den Etiopiasma kon feti nanga Yuda? (b) Fa wi kan sori taki wi de leki Asa di ben e frutrow tapu Gado?

⁸ Na ini a ten fu Kownu Asa, Yehovah sori baka, taki en anu no ben syatu tumusi fu yepi en pipel. Bijbel e taki fu wan lo feti. Ma a moro bigi legre di ben kon feti nanga den Israelsma na a di fu Sera, wan Etiopia man. A ben abi 1.000.000 srudati di ben sabi feti bun. A legre fu den Etiopiasma ben bigi sowan tu tron moro a legre fu Asa. Yu kan frustan taki Asa ben kan kon frede èn  gi abra na ini a feti. Ma a no du dati. Na presi fu dati a aksi Yehovah fu yepi en. Efu yu luku en libisma fasi, dan noiti a legre fu Asa ben o man wini den Etiopiasma, ma „Gado man du ala sani” (Mat. 19:26). Yehovah sori a bigi makti fu en èn a ’meki Asa wini den Etiopiasma’ fu di a ’ben dini Yehovah nanga en heri ati, en heri libi langa’.​—2 Kron. 14:8-13; 1 Kow. 15:14.

9. (a) San yepi Nehemia fu no lasi-ati di a si taki a skotu fu Yerusalem no kaba bow? (b) Fa Gado piki a begi fu Nehemia?

⁹ Denki fa Nehemia ben musu firi di a go na Yerusalem. Den skotu fu a foto ben broko èn den Dyu ben lasi-ati. Feanti fu tra kondre ben e gens den èn dati meki den no bow a skotu fu Yerusalem go doro. Yu denki taki a situwâsi disi ben meki Nehemia lasi-ati tu? Nôno. Neleki Moses, Asa nanga tra reti-ati futuboi fu Gado, Nehemia ben abi a gwenti fu begi Yehovah. Na dati a du a leisi disi tu. Kande den Dyu ben denki taki noiti den ben o komoto na ini a muilek situwâsi disi, ma Yehovah arki a fayafaya begi fu Nehemia èn a yepi den. Gado gebroiki en „bigi krakti” nanga a „tranga anu” fu en fu gi den Dyu deki-ati. (Leisi Nehemia 1:10; 2:17-20; 6:9.) Yu e bribi taki Yehovah e gebroiki en „bigi krakti” nanga en „tranga anu” fu yepi en futuboi na ini a ten disi tu?

10, 11. (a) Fa Satan e pruberi fu meki wi lasi-ati? (b) San Yehovah e gebroiki fu gi wi deki-ati nanga krakti? (c) Sortu wini yu kisi fu a leri fu Gado?

¹⁰ Wi kan de seiker taki noiti Didibri o weri fu gens wi. A wani taki wi tapu nanga a wroko fu Gado. A e meki tiriman, kerki fesiman nanga sma di drai baka gi a bribi, lei gi wi èn a e meki den tapu skreki gi wi. San meki a e du disi? A wani taki wi lasi-ati èn taki wi no e preiki a bun nyun fu a Kownukondre moro. Ma Yehovah man gebroiki en santa yeye fu gi wi krakti èn a de klariklari fu du dati tu (1 Kron. 29:12). A prenspari taki wi frutrow tapu a yeye fu Gado so taki wi e tanapu kánkan te Satan nanga en ogri grontapu e tyari tesi kon na wi tapu (Ps. 18:39; 1 Kor. 10:13). Wi breiti tu taki wi abi Gado Wortu di skrifi nanga yepi fu a santa yeye. Boiti dati, luku omeni sani wi e leri na ini den buku, den tijdschrift nanga den tra sani di wi e kisi ala mun. A sani di skrifi na Sakaria 8:9, 13 (leisi en) e taki fu a ten di den Dyu ben e bow a tempel baka, ma te now ete den wortu disi kan yepi wi.

¹¹ A leri di Gado e gi wi na den alawiki konmakandra, den bigi konmakandra èn na den skoro fu wi, e meki wi kon tranga tu. A kan yepi wi fu luku fu san ede wi e dini Yehovah, fa wi kan du moro gi en èn fa wi kan tyari den furu frantwortu di wi abi leki Kresten (Ps. 119:32). Yu e meki muiti fu teki a leri disi so taki yu kan kisi deki-ati?

12. San wi kan du fu tan abi wan tranga bribi?

¹² Yehovah yepi den Israelsma fu wini den Amalèksma nanga den Etiopiasma. A gi Nehemia nanga den tra Dyu a krakti fu kaba bow a skotu fu Yerusalem. Gado o gi wi a krakti tu fu tanapu kánkan te sma e gens wi, te den no wani arki wi èn te wi abi broko-ede. Na so fasi wi kan tan du a preikiwroko (1 Petr. 5:10). Wi no e fruwakti taki Yehovah o du wondru gi wi, ma wi e du san wi  musu du. Dati meki wi e leisi Gado Wortu ibri dei, wi e sreka wisrefi gi den alawiki konmakandra èn go na den, wi e studeri nanga wisrefi, wi e hori na Osofamiri Anbegi èn ala ten wi e begi Yehovah fu di wi e frutrow na en tapu. Noiti wi musu feti baka sani di kan tapu wi fu kisi krakti nanga deki-ati fu Yehovah. Te yu si taki yu no e du den sani disi nanga so furu faya moro, dan aksi Gado fu yepi yu. Yu o si fa en yeye ’o gi yu a firi nanga a krakti fu du sani di e plisi en’ (Fil. 2:13). Ma fa yu kan yepi trawan di lasi-ati?

13, 14. (a) Fa wan brada kisi deki-ati baka di en wefi dede? (b) Fa wi kan gi trawan deki-ati?

¹³ Yehovah gi wi brada nanga sisa na heri grontapu di lobi wi èn di kan gi wi deki-ati. Memre san na apostel Paulus taki: „Opo den anu di e anga èn meki den kindi di kon swaki, kon tranga baka. Tan meki un pasi kon grati gi un futu” (Hebr. 12:12, 13). Furu Kresten na ini a ten dati ben kisi deki-ati fu di brada nanga sisa yepi den. Na so a de tu na ini a ten disi. Wan brada di lasi en wefi na ini dede èn di kisi tra problema tu, taki: „Mi kon si taki wi no sabi na fesi sortu tesi wi o kisi, o ten wi o kisi tesi noso o furu tesi wi o kisi. Begi nanga studeri yepi mi fu pasa a muilek ten disi. Mi kisi furu trowstu fu brada nanga sisa di ben horibaka gi mi. Mi kon si taki fosi tesi kon, a prenspari fu abi wan bun matifasi nanga Yehovah.”

¹⁴ Aron nanga Hur ben hori Moses anu na a ten fu a feti. Fa a de nanga wi? Wi kan suku fasi fu horibaka gi wi brada nanga sisa èn yepi den. Sonwan fu den e kon owru, trawan e siki, famiri e gens den, den e sari fu di den no abi nowan sma, noso fu di den lasi wan lobiwan na ini dede. Wi kan yepi yonguwan tu di e kisi tesi fu du sani di no bun noso fu suku fu meki en na ini a grontapu disi. Kande sma wani nomonomo taki den go na universiteit, taki den meki moni noso taki den suku wan wroko pe den o kisi biginen (1 Tes. 3:1-3; 5:11, 14). Sori tu taki yu wani sabi fa a e go nanga trawan. Yu kan du dati na ini a Kownukondre zaal, na ini a preikiwroko, te yu e nyan nanga trawan noso te yu e taki nanga wan sma na telefon.

15. Sortu krakti den bun sani di yu e taki kan abi tapu tra Kresten?

¹⁵ Di Asa wini a bigi feti, a profeiti Asaria taigi en nanga a pipel: „Un musu abi deki-ati. No lasi-ati, fu di Gado o blesi unu gi den sani di unu du” (2 Kron. 15:7). Disi meki taki Asa du furu sani fu yepi den Israelsma fu anbegi Yehovah baka. Den bun sani di yu e taki, kan abi furu krakti tapu trawan tu. Yu kan yepi den fu du moro gi Yehovah (Odo 15:23). Te yu de na den konmakandra, dan no frigiti taki yu kan gi trawan furu deki-ati te yu e opo yu anu fu gi wan piki.

16. Fa owruman kan de leki Nehemia? Fruteri fa tra brada nanga sisa yepi yu.

¹⁶ Fu di Yehovah horibaka gi Nehemia nanga den tra Dyu, meki den ben abi a deki-ati fu du a wroko. Na ini 52 dei nomo den ben kaba bow den skotu fu Yerusalem baka! (Neh. 2:18; 6:15, 16) Nehemia no ben luku nomo fa den ben e du a wroko, ma a ben yepi bow a skotu  tu (Neh. 5:16). Furu owruman na ini a ten disi de leki Nehemia. Den e yepi nanga a bow-wroko èn den e yepi te a Kownukondre zaal fu den musu krin noso te wan sani musu meki. Den e wroko makandra tu nanga tra preikiman èn den e go luku brada nanga sisa fu gi den deki-ati. Na so den e yepi tu fu meki den swaki anu kon tranga.​—Leisi Yesaya 35:3, 4.

17, 18. Te wi e kisi problema noso wi abi broko-ede, dan fu san wi kan de seiker?

¹⁷ Te wi e wroko makandra nanga wi brada nanga sisa, dan wi o de leki wán famiri. Wi o de bun mati fu makandra tu èn wi o tan howpu fu kisi den blesi di Gado Kownukondre o tyari kon. Te wi e gi trawan deki-ati, dan wi e yepi den fu no lasi-ati te den de na ini muilek situwâsi. Wi e yepi den fu tan abi a howpu taki sani o go bun. Boiti dati, wi srefi o abi furu fu du na ini a wroko fu Gado èn wi o tan poti prakseri na den sani di Gado pramisi wi.

¹⁸ Iya, te wi e prakseri fa Yehovah yepi den reti-ati futuboi fu en na ini a ten di pasa èn fa a kibri den, dan a bribi fu wi e kon moro tranga èn wi e frutrow moro na en tapu. Sobun, te yu e kisi tesi noso problema, dan „no lasi-ati”! Na presi fu dati, yu musu begi Yehovah, dan a o langa en makti anu gi yu fu yepi yu èn fu tyari yu go na ini a Kownukondre.​—Ps. 73:23, 24.