SAN yu e du te yu wani kon sabi o lati a de? Yu e luku yu oloisi. Efu wan mati aksi yu o lati a de, fa yu ben o piki en? Difrenti fasi de fa yu kan taigi wan sma san na a yuru. Meki wi luku wan tu eksempre.

Kon meki wi taki dati a de wán yuru nanga 30 miniti bakadina. Kande yu o taki 1.30. Na ini son kondre sma gwenti taki 13.30. Na son presi sma e taki srefi „half twee”, dati wani taki dati a de 30 miniti fosi tu yuru.

Te yu e leisi Bijbel, dan kande yu e aksi yusrefi fa sma na ini Bijbel ten ben e taki o lati a de. Den ben e du dati na difrenti fasi. Den Hebrew Buku fu Bijbel e taki fu „mamanten”, „brekten” nanga „mofoneti” (Gen. 8:11; 19:27; 43:16; 1 Kow. 18:26). Ma son leisi, den skrifi moro fini o lati a ben de.

Hondrohondro yari fosi Yesus ben gebore, den Israelsma ben prati a neti na ini dri pisi ten. Na ini a ten fu Yesus, den Dyu ben teki a gwenti abra fu den Grikisma nanga den Romesma di ben prati a neti na ini fo pisi ten.

Den Evangelietori e taki fu den difrenti pisi ten fu a neti. Fu eksempre, a ben de „musudei” di Yesus ben waka na tapu watra go na a boto pe den disipel fu en ben de (Mat. 14:25). Na ini wan agersitori Yesus ben taki: „Koloku fu den srafu te a masra doro èn a e si taki den de na ai! . . . Koloku fu den te a si taki den de na ai te a doro latilati neti noso te mindrineti pasa kaba!”​—Luk. 12:37, 38.

Yesus ben kari ala den fo pisi ten fu a neti, di a taigi den disipel: „Tan na ai, bika unu no sabi o ten a masra fu na oso o kon. Unu no sabi efu a o kon na mofoneti, mindrineti, musudei, noso fruku mamanten” (Mark. 13:35). A fosi pisi ten, „mofoneti”, ben waka fu sondongo teleki neigi yuru neti. A di fu tu pisi ten, „mindrineti”, ben waka fu neigi yuru neti teleki twarfu yuru. A di fu dri pisi ten, „musudei”, ben waka fu mindrineti teleki 3 yuru mamanten. A kan taki na a pisi ten disi wan kakafowru bari, di sma grabu Yesus (Mark. 14:72). A di fu fo pisi ten, „fruku mamanten”, ben waka fu dri yuru musudei teleki son-opo.

Awinsi sma na ini Bijbel ten no ben abi oloisi, toku den ben abi wan fasi fu taki o lati a ben de.