Syatu baka a yari 1940, mi papa nanga mama bigin studeri Bijbel nanga Yehovah Kotoigi. Den no ben go doro nanga a studie, ma mi mama ben e kisi A Waktitoren nanga Onwaakt! ete. Na ini 1950 wi kisi wan kari fu wi go na wan internationaal kongres di ben o hori na New York City èn a heri osofamiri ben go.

Syatu baka dati, Brada Lawrence Jeffries bigin kon na wi. A ben wani yepi mi fu kon sabi a waarheid. Biginbigin, mi no ben lobi taki Yehovah Kotoigi no e bumui nanga politiek èn taki den no ben e du srudatiwroko. Mi ben taigi a brada taki efu ala sma na ini Amerkankondre no ben o wani go na feti, dan feanti ben kan kon teki a heri kondre abra. Nanga pasensi Brada Jeffries taki: „San yu denki taki Yehovah Gado ben o du efu ala sma na ini Amerkankondre ben e dini en èn sma ben kon feti nanga den?” Den sani di a taki a dei dati nanga tra sani di a ben taki, yepi mi fu si taki mi no ben e si sani na yoisti fasi. Dati meki mi ben wani kon sabi moro fu Bijbel.

Furu yuru langa mi ben e leisi den owru Waktitoren nanga Ontwaakt! di mi mama ben kibri. Baka wan pisi ten mi kon frustan taki den sani di Bijbel e taki tru. Dati meki mi ben feni en bun taki Brada Jeffries studeri Bijbel nanga mi. Mi bigin go na ala den konmakandra tu. Mi ben lobi den sani di mi ben e leri èn bakaten mi tron wan preikiman fu a bun nyunsu. Di mi kon frustan taki „a bigi dei fu Yehovah de krosibei” dan mi no ben wani du den sani moro di mi ben prakseri fu du na ini mi libi (Sef. 1:14). Mi no ben wani go na universiteit moro. Now mi ben wani yepi sma fu kon sabi den tru leri fu Bijbel.

 Tapu 13 yuni 1956 mi klari middelbaar skoro èn dri dei baka dati mi dopu na wan kring konmakandra. Mi no ben sabi taki mi ben o kisi so furu blesi fu di mi bosroiti fu leri moro fu Yehovah èn fu leri tra sma sani di abi fu du nanga Yehovah.

Siksi mun baka di mi dopu, mi tron wan gewoon pionier. A Kownukondre diniwroko fu december 1956 ben abi na artikel „Yu kan go dini na presi pe moro yepi de fanowdu?” Mi ben kan du dati tu. Mi ben wani go yepi na wan presi pe wan tu sma nomo ben e preiki a bun nyunsu.​—Mat. 24:14.

Dati meki mi froisi go na Edgefield na South Carolina. A gemeente drape ben abi fo preikiman nomo. Nanga mi a tron feifi preikiman. Wi ben e hori den konmakandra na ini a foroisi fu wan brada en oso. Ala mun mi ben e preiki 100 yuru. Mi ben abi furu fu du, bika mi ben e teki fesi na ini a preikiwroko èn mi ben e hori lezing na ini a gemeente. Wan moi sani di mi kon si, na taki den wroko di ben e du ini a gemeente ben yepi mi fu leri sabi Yehovah moro bun.

Wan tu kilometer fu a presi pe mi ben e tan, na a foto Johnston, mi ben e studeri nanga wan uma di ben abi wan mortuarium. Na a ten dati mi ben abi wan wroko fanowdu èn na uma disi ben gi mi wan wroko pe mi ben kan wroko wan tu dei ini a wiki. Boiti dati, wi ben mag gebroiki wan pikin gebow fu en leki Kownukondre zaal.

Bakaten Brada Jolly Jeffries, a boi fu a brada di ben studeri nanga mi, kon na wi gemeente. Fosi, a ben de na Brooklyn na ini New York, ma di a froisi kon drape a tron mi pionier patna. Wan brada ben leni unu wan wagi pe yu kan tan na ini.

A moni di wrokoman ben e kisi na a zuidsei fu a kondre no ben furu. Te wi ben wroko wan heri dei, dan wi ben kisi 2 noso 3 Amerkan dala nomo. Wan leisi mi gebroiki den lasti sensi fu mi fu bai wan nyanyan-sani na wan wenkri. Ma di mi komoto ini a wenkri wan man kon aksi mi: „Yu wani wroko? Mi o pai yu wán dala wan yuru.” Mi ben mag wroko dri dei na ini a wiki. Mi ben musu krin wan presi pe den ben e bow. Mi ben man si krin taki na Yehovah ben yepi mi fu tan na Edgefield. Èn toku mi ben man go na internationaal kongres fu 1958 na ini New York City.

Na a di fu tu dei fu a kongres wan spesrutu sani pasa. Mi miti Ruby Wadlington, wan sisa di ben de wan gewoon pionier na ini Gallatin na Tennessee. Fu di wi ala tu ben wani du zendelingwroko, meki wi go na a konmakandra gi sma di wani go na Gileadskoro na a kongres dati. Bakaten, wi bigin skrifi brifi gi makandra. Di mi kisi wan kari fu go hori wan Bijbel-lezing na Gallatin, mi aksi en fu trow nanga mi. Baka dati mi froisi go na a gemeente fu Ruby èn wi trow na ini 1959.

Di mi ben abi 23 yari, mi tron gemeente dinari (now wi e kari en ’fesiman fu den owruman’) na  ini Gallatin. A gemeente fu wi ben de a fosiwan pe Brada Charles Thompson ben leki kring-owruman. A ben abi furu ondrofeni. Ma toku a aksi mi fu yepi en. A ben wani sabi san den brada nanga sisa ben abi fanowdu èn san den tra kring-owruman ben du fu yepi den. Fu en mi leri taki a bun fu aksi fa sani de trutru fosi yu teki wan bosroiti na ini wan tori.

Na ini mei 1964, mi kisi wan kari fu go na a Kownukondre Diniwroko-skoro na South Lansing na ini New York. A skoro dati ben meki taki mi ben wani leri moro fu Yehovah èn fu tron wan moro bun mati fu en.

Mi nanga Ruby kisi a kari fu du kringwroko na ini yanuari 1965. A fosi kring pe wi ben go ben bigi srefisrefi. A e bigin na Knoxville, Tennessee, èn bijna a ben doro Richmond, Virginia. Na ini a kontren disi yu ben abi gemeente na ini North Carolina, Kentucky, nanga West Virginia. Ma mi ben e go soso na den gemeente pe blaka brada nanga sisa ben de, fu di na a ten dati blakaman nanga wetiman no ben mag moksi na a zuidsei fu Amerkankondre. Sobun, den blaka Kotoigi no ben mag kon makandra nanga den weti Kotoigi. Den brada nanga sisa ben pôti èn wi leri fu prati nanga makandra san wi ben abi. Wan brada di ben de kring-owruman wan langa pisi ten kaba ben leri mi wan prenspari sani. A taki: „Yu musu de wan brada gi den sma. No go na ini a gemeente leki wan basi. Yu o man yepi den soso te den e si yu leki den brada.”

Di wi ben go na wan pikin gemeente, Ruby bigin studeri Bijbel nanga wan yongu uma di ben abi wan meisje fu wán yari. Di nowan sma na ini a gemeente ben man studeri go doro nanga en, Ruby tan studeri nanga en nanga yepi fu brifi. Di wi go baka na a gemeente, na uma disi ben e kon na ala den konmakandra. Di tu spesrutu pionier sisa froisi go drape den go doro nanga a studie èn syatu baka dati na uma dopu. Sowan 30 yari baka dati, na ini 1995, wan yongu sisa kon na Ruby na a Betel fu Patterson. A ben de a meisje fu a studie fu Ruby. A yongu sisa disi nanga en masra ben de studenti fu a di fu 100 klas fu a Gileadskoro di ben e hori drape na Patterson.

A di fu tu kring pe wi ben go ben de na a mindrisei pisi fu Florida. Na a ten dati wi ben abi wan wagi fanowdu èn wi ben man bai wan di no ben diri srefisrefi. Ma baka wan wiki a wagi broko. Wi no ben abi moni fu meki a wagi. Mi ben bel wan brada di ben kan yepi mi kande. A meki wan fu den wrokoman fu en meki a wagi èn a no ben wani taki wi pai en. A taki nomo: „No span, ala sani regel.” A gi wi wan moni srefi! Dati na wan moi eksempre di e sori fa Yehovah e sorgu gi den sma di e dini en. Disi e memre wi tu taki wi musu lobi fu gi trawan sani.

Te wi ben e go na den gemeente, wi ben e tan nanga den brada nanga sisa. Na so wi miti sma di de bun mati fu wi te now ete. Wan leisi wi ben e tan nanga wan famiri di ben abi wan boi fu dri yari. Na tapu wan typmachine mi ben e skrifi a raportu fu a gemeente, ma mi no ben kaba ete. Di mi drai kon baka a neti dati, mi si taki a boi ben typ ala sortu sani fu yepi mi skrifi a raportu. Furu yari langa mi ben e dreigi en ete fu a sani disi.

Na ini 1971 mi kisi a grani fu wroko leki distrikt-opziener na ini New York City. Wi skreki! Di wi froisi go drape, mi ben abi 34 yari nomo. Mi ben de a fosi blaka distrikt-owruman di den ben brada nanga sisa drape kisi, ma toku den ben gi mi wan switikon.

Leki distrikt-opziener, mi ben lobi leri sma sani fu Yehovah na den kring konmakandra ibri satra nanga sonde. Furu fu den kring-owruman ben abi moro ondrofeni leki mi. Wan fu den ben hori mi dopulezing srefi. Wan tra brada di ben nen Theodore Jaracz ben tron wan fu den brada fu a Tiri Skin bakaten. Furu fu den lepi brada disi ben e wroko tu na a Betel fu Brooklyn. Mi ben breiti taki den kring-owruman nanga den tra brada fu Betel no ben meki mi firi leki den bun moro mi. Nanga mi eigi ai mi si taki den man disi ben de lobi-ati skapuman di ben e meki Gado Wortu tiri den, èn den ben e horibaka gi na organisâsi  nanga den heri ati. Fu di den ben abi sakafasi, meki a no ben muilek gi mi fu dini leki distrikt-owruman.

Na ini 1974 a Tiri Skin poti tra brada leki distrikt-owruman èn mi ben go du kringwroko baka. Disi leisi den seni wi go na South Carolina. Na a ten dati blakasma nanga wetisma ben mag moksi nanga makandra èn den brada nanga sisa ben lobi a sani disi.

Na a kaba fu a yari 1976, den seni mi fu du kringwroko na ini Georgia, na mindri Atlanta nanga Columbus. Wan sani di mi man memre heri bun, na taki mi ben hori wan lezing na a beri fu feifi blaka pikin di ben lasi libi di sma sutu faya gi na oso fu den. A mama fu den ben bron so te, taki a ben musu go na ati-oso. Doronomo Yehovah Kotoigi, blakawan nanga wetiwan, ben go trowstu a papa nanga mama fu den pikin na ati-oso. Den ben sori lobi trutru. Te brada nanga sisa e sori so wan lobi gi makandra, dan dati kan yepi den fu horidoro na ini den moro muilek situwâsi.

Na ini 1977 wi kisi wan kari fu go yepi wan tu mun nanga wan wroko na a Betel fu Brooklyn. Syatu fosi wi kaba a wroko, tu brada fu a Tiri Skin kon aksi efu mi nanga Ruby ben wani wroko na Betel. Na so wi tan wroko na Betel.

Sowan 24 yari langa mi ben wroko na a Dienstafdeling pe den brada e kisi fu du nanga ala sortu prenspari tori nanga problema di den musu lusu. Ma na ini ala den yari di pasa, a Tiri Skin gi wi Bijbel rai di yepi wi nanga a wroko fu wi. Wi gebroiki den rai disi fu gi piki tapu aksi, ma owktu fu gi leri na kring-owruman, gemeente owruman nanga pionier. Den sani disi yepi furu sma fu tron lepi Kresten. Èn den sma disi de wan bigi yepi na ini Yehovah organisâsi.

Fu 1995 te go miti 2018, mi go na bijkantoro na ini difrenti kondre leki a brada di e teki presi gi na edekantoro (fosi a ben nen zone-opziener). Mi ben abi takimakandra nanga den Bijkantoro Komte, den sma fu Betel nanga den zendeling fu gi den deki-ati èn fu yepi den nanga iniwan problema di den ben abi. Ma den moi ondrofenitori di den ben e fruteri mi nanga Ruby ben de wan deki-ati gi wi tu. Na ini 2000 wi ben go na Rwanda. A ben naki wi ati trutru di wi yere den sani di den brada nanga sisa na Betel èn den trawan ondrofeni di den sma fu tu lo ben e kiri makandra na ini 1994. Furu brada nanga sisa lasi famiri nanga tra lobiwan fu den. Ma awinsi san miti den, den tan abi bribi, howpu nanga prisiri.

Now wi ala tu pasa 80 yari kaba. Na ini den lasti 20 yari di pasa mi wroko na ini a Bijkantoro Komte na Amerkankondre. Noiti mi kisi leri na universiteit. Ma mi kisi a moro bun leri fu Yehovah nanga en organisâsi. A leri di mi kisi meki taki mi ben man gi sma leri fu Bijbel di kan de wan bigi yepi gi den fu ala ten (2 Kor. 3:5; 2 Tim. 2:2). Mi si fa a boskopu fu Bijbel yepi sma fu abi wan moro bun libi èn fu tron wan mati fu a mekiman fu den (Yak. 4:8). Solanga wi man, mi nanga Ruby e gi sma deki-ati fu si en leki wan grani taki wi man kisi leri fu Yehovah èn taki wi man leri sma den tru tori fu Bijbel. Dati na a moro bigi grani di wan futuboi fu Yehovah kan abi!