1-2. San wan engel e taigi den uma di kon na Yesus grebi èn san Yesus srefi e taigi den uma?

TAPU 16 Nisan fu a yari 33, wan tu uma opo fruku mamanten fu go na a grebi pe den beri Yesus Krestes tu dei pasa. Den uma disi e sari. Den ben e go fu poti switismeri sani nanga switismeri oli gi a dedeskin fu Yesus. Ma te den doro drape den e skreki te den e si taki a grebi leigi. Wan engel e taigi den taki Yesus kisi wan opobaka. A e taigi den tu: „A de na pasi e go na Galilea. Drape unu o si en.”​—Mat. 28:1-7; Luk. 23:56; 24:10.

² Baka te den uma waka gowe, Yesus srefi e kon na den èn a e taigi den: „Un go fruteri den brada fu mi taki den kan go na Galilea. Den o si mi drape” (Mat. 28:10). A fosi sani di Yesus e du baka di a kisi wan opobaka na fu taigi den disipel fu en fu kon miti en. Na a konmakandra dati a e gi den wan prenspari wroko.

3-4. Fa wi du sabi taki a komando na Mateyus 28:19, 20 no ben de gi den apostel wawan? (Luku a fowtow tapu a kafti.)

³ Leisi Mateyus 28:16-20. Na a konmakandra dati, Yesus taigi den disipel fu en sortu prenspari wroko den ben o du na a ten dati. Na a srefi wroko dati wi e du na ini a ten disi. Yesus ben taki: „Go na sma fu ala kondre èn meki den tron disipel. . . . Leri den fu du ala san mi taigi unu fu du.”

⁴ Yesus wani taki ala den bakaman fu en du a preikiwroko. A no den erfu apostel fu en wawan ben musu du  a wroko disi. Fa wi du sabi dati? A no den apostel wawan ben de na a bergi na Galilea di Yesus gi a komando disi. Hori na prakseri taki na engel ben taigi den uma: „Unu o si en [na Galilea].” Sobun, den uma disi ben de na a konmakandra tu. Ma a no dati wawan. Na apostel Paulus ben taki dati Yesus „sori ensrefi na moro leki feifi hondro brada na a srefi ten” (1 Kor. 15:6). Pe a sani disi pasa?

5. Fa wi du sabi taki 1 Korentesma 15:6 e taki fu a srefi konmakandra di kari na Mateyus kapitel 28?

⁵ Na 1 Korentesma 15:6 Paulus e taki fu a srefi konmakandra di kari na Mateyus kapitel 28. Fu san ede wi kan taki dati? Na a fosi presi furu fu den disipel fu Yesus ben tan na Galilea. Sobun, a ben o moro makelek fu kon makandra na wan bergi na Galilea nanga so wan bigi grupu sma, leki na ini wan oso fu wan sma na ini Yerusalem. A di fu tu sani na taki Yesus ben miti kaba nanga den erfu apostel fu en na ini wan sma oso na ini Yerusalem. Efu Yesus ben wani taigi den erfu apostel wawan fu preiki èn fu meki disipel, a ben kan du dati na ini Yerusalem. Ma na presi fu dati a aksi den apostel, den uma nanga den tra sma fu kon na Galilea.​—Luk. 24:33, 36.

6. (a) Fa Mateyus 28:20 e sori taki a komando fu meki disipel na gi a ten fu wi tu? (b) San e sori taki sma e gi yesi na a komando disi?

⁶ Wan tra reide de fu san ede wi kan taki dati a komando fu Yesus no ben de gi den erfu apostel wawan. A preikiwroko no ben o du nomo na ini a ten fu den apostel. Fa wi du sabi dati? Baka di Yesus gi den a komando fu meki disipel a taigi den: „Mi o de nanga unu ala dei te na a kaba fu grontapu” (Mat. 28:20). Neleki fa Yesus taki, dan na ini a ten disi furu brada nanga sisa e yepi trawan fu tron disipel. Ibri yari sowan 300.000 sma e dopu leki Yehovah Kotoigi èn den e tron disipel fu Yesus Krestes.

7. San wi o luku now èn fu san ede?

⁷ Furu sma di e studeri Bijbel e dopu te fu kaba. Ma a gersi leki sonwan fu den e frede fu tron disipel fu Krestes. Den lobi a studie, ma den no e go na fesi. Efu yu abi wan Bijbelstudie, dan a no de fu taki dati yu wani yepi en fu du san a e leri èn fu tron wan disipel fu Krestes. Na artikel disi o sori fa wi kan yepi wi Bijbelstudie fu lobi Yehovah èn fu go na fesi. Fu san ede wi musu taki fu a tori disi? Fu di son leisi wi o abi fu tapu fu studeri nanga wan sma di no e go na fesi.

8. Fu san ede a kan muilek fu yepi den Bijbelstudie fu wi fu lobi Yehovah?

⁸ Yehovah wani taki sma dini en fu di den lobi en. Dati meki wi musu yepi den Bijbelstudie fu wi fu frustan taki Yehovah e broko en ede nanga den èn taki a lobi den. Wi wani yepi den fu si Yehovah leki ’wan papa gi den pikin di no abi papa moro èn leki wan krutuman di e opo taki gi den uma di masra dede kaba’ (Ps. 68:5). Te den Bijbelstudie o kon si o furu Gado lobi den, dan nofo tron den srefi o kon lobi en tu. Kande a muilek gi son Bijbelstudie fu si Yehovah leki wan lobi-ati Papa, fu di den eigi papa no ben sori lobi gi den (2 Tim. 3:1, 3). Te yu e studeri nanga so wan sma, dan poti prakseri na den moi fasi fu  Yehovah. Yepi en fu frustan taki wi lobi-ati Gado wani taki a libi fu têgo èn taki a de klariklari fu yepi en fu kisi a libi dati. San moro wi kan du?

9-10. Sortu buku wi musu gebroiki fu studeri nanga sma èn fu san ede?

⁹ Gebroiki den buku „San Bijbel kan leri wi?” nanga „Meki Gado tan lobi yu”. Den buku disi meki spesrutu fu yepi den Bijbelstudie fu kon lobi Yehovah. Fu eksempre, kapitel wán fu a Leri wi-buku e piki den aksi disi: Gado e broko en ede nanga wi noso a e meki ogri miti sma? Fa Gado e firi te sma e pina? èn Yu kan de wan mati fu Yehovah? A Gado lobi-buku e yepi wan Bijbelstudie fu si fa den gronprakseri na ini Bijbel kan yepi en fu abi wan moro bun libi èn fu kon moro krosibei na Yehovah. Srefi efu yu studeri den buku disi nanga tra sma kaba, toku yu musu sreka bun ibri leisi te yu e go studeri nanga wan sma. Te yu e du dati, yu o man poti prakseri na san a Bijbelstudie fu yu abi fanowdu.

 ¹⁰ Ma kon meki wi taki dati a sma wani sabi moro fu wan tori, ma den buku di wi e gebroiki fu studeri nanga sma no e taki fu a tori. San yu kan du? Yu kan gi a Bijbelstudie deki-ati fu leisi a buku di e taki fu a tori ensrefi, so taki yu kan go doro nanga a Leri wi-buku noso a Gado lobi-buku.

11. O ten wi musu bigin nanga begi na wan Bijbelstudie èn fa wi kan yepi a sma fu frustan taki a sani disi prenspari?

¹¹ Begi fosi yu bigin studeri nanga wan sma. Nofo tron a moro bun fu bigin a studie nanga wan begi èn fu tapu nanga wan begi so esi leki a kan. Wi musu yepi a sma fu frustan taki wi kan frustan Gado Wortu soso nanga yepi fu en santa yeye. Son brada nanga sisa e leisi Yakobus 1:5 fu sori a Bijbelstudie fu san ede wi e begi. Drape skrifi: „Efu wan fu unu e mankeri koni, dan meki a tan aksi Gado fu dati.” Baka te den leisi a tekst den e aksi a sma: „San wi musu du efu wi wani kisi koni?” A sani disi o yepi a sma fu frustan fu san ede a bun fu begi.

12. Fa yu kan gebroiki Psalm 139:2-4 fu sori wan Bijbelstudie taki a kan taigi Yehovah ala sani?

¹² Leri yu Bijbelstudie fa fu begi. Taigi en taki Yehovah wani yere den begi fu en. Fruteri en taki te wi e begi wi kan fruteri Yehovah fa wi e firi. Wi kan taigi en sani di wi no wani fruteri tra sma. Wi kan du disi fu di Yehovah sabi kaba san wi e denki. (Leisi Psalm 139:2-4.) Wi kan gi a Bijbelstudie fu wi deki-ati fu aksi Gado fu yepi en tu fu kenki en denki èn fu tapu nanga takru gwenti. Kon meki wi taki dati wan sma di e studeri wan pisi ten kaba lobi Kresneti ete, aladi a sabi taki a fowtu fu hori a fesa disi di abi fu du nanga falsi anbegi. Yu kan gi a sma deki-ati fu taigi Yehovah fa a e firi èn fu aksi en fu yepi en fu lobi san Gado lobi.​—Ps. 97:10.

13. (a) Fu san ede wi musu kari den Bijbelstudie fu wi fu kon na den konmakandra so esi leki a kan? (b) San wi kan du fu meki en moro makelek gi wan Bijbelstudie fu kon na den konmakandra?

¹³ Kari yu Bijbelstudie fu kon na den konmakandra so esi leki a kan. Den sani di a sma o yere èn si na den konmakandra o gi en deki-ati fu go na fesi èn fu dini Yehovah. Sori en a felem San wi e du na ini wan Kownukondre zaal? èn aksi en fu kon na den konmakandra. Efu a kan, yu kan go teki en. A bun fu tyari difrenti brada nanga sisa go na a studie. Na so a sma o sabi wan tu brada nanga sisa kaba fu a gemeente te a o kon na den konmakandra.

14. San o yepi wan Bijbelstudie fu go na fesi?

¹⁴ Wi wani yepi den Bijbelstudie fu wi fu go na fesi (Ef. 4:13). Nofo tron te wan sma e bigin studeri Bijbel a e du dati fu di a wani taki en libi go moro bun. Ma te a kon lobi Yehovah, a e bigin prakseri fa a kan yepi trawan, srefi den wan di de na ini a gemeente (Mat. 22:37-39). Te a fiti yu kan sori yu Bijbelstudie taki wi alamala abi a frantwortu fu poti moni fu horibaka gi a Kownukondre wroko.

15. Fa wi kan yepi den Bijbelstudie fu wi te den kisi problema?

¹⁵ Yepi yu Bijbelstudie fu sabi san a musu du te a e kisi problema. Fu eksempre, kande yu abi wan Bijbelstudie di de wan preikiman di no dopu ete. A e taigi yu taki wan sma na ini a gemeente du wan hati sani nanga en. No teki sei, ma sori  en na ini Bijbel san a musu du. A kan gi a brada noso sisa pardon. Efu a tori e trobi en ete, a kan go taki nanga a sma na wan switi fasi fu meki en bun baka nanga en. (Luku Mateyus 18:15.) Yepi a Bijbelstudie fu sreka fosi a go taki nanga a sma. Sori en fa a kan gebroiki a JW Library^® app, a buku Ondrosuku Bijbel moro fini​—Gi Yehovah Kotoigi, nanga a jw.org^® website, fu sabi fa fu lusu a problema fu en. O moro a e leri fu lusu problema nanga tra sma fosi a dopu, o moro a o man feni en nanga den sma fu a gemeente baka te a dopu.

16. Fu san ede a bun fu tyari tra brada noso sisa na den Bijbelstudie fu wi?

¹⁶ Aksi tra sma na ini a gemeente fu kon na a Bijbelstudie nanga yu. Yu kan aksi a kring-opziener tu te a de na a gemeente. Fu san ede? Boiti den tra sani di wi ben taki kaba, tra preikiman kan yepi a Bijbelstudie fu yu na fasi di yu no man. Fu eksempre, kande a Bijbelstudie pruberi wan tu leisi fu tapu nanga smoko, ma a no man. Yu kan aksi wan brada noso sisa di ben man tapu nanga a gwenti disi baka di a pruberi wan tu leisi, fu kon nanga yu na a studie. A brada noso sisa disi kan gi a studie fu yu bun rai di kan yepi en. Efu yu e frede fu hori a studie te yu de nanga wan lepi brada noso sisa, dan yu kan aksi en fu du a studie. Yu Bijbelstudie kan leri furu fu den brada noso sisa di yu e tyari go na en. Hori na prakseri taki yu wani yepi en fu go na fesi.

17-18. San yu musu hori na prakseri fosi yu bosroiti fu tapu nanga wan studie?

¹⁷ Efu a Bijbelstudie fu yu no e go na fesi, dan yu musu luku efu yu musu tapu nanga a studie. Fosi yu bosroiti fu tapu a studie, yu musu luku a situwâsi fu a sma. Son sma abi moro ten fanowdu fu tyari kenki kon. Aksi yusrefi: ’Te mi luku a situwâsi fu a sma, dan mi kan taki dati a e go na fesi? A e „du” san a e leri?’ (Mat. 28:20) A kan taki wan sma abi moro ten fanowdu fu tron wan disipel. Ma a musu de krin fu si taki a e tyari kenki kon na ini en libi.

¹⁸ Ma san wi musu du efu wan sma di e studeri langa ten kaba e sori taki a studie no prenspari gi en? Kande a sma kaba nanga a Leri wi-buku èn a bigin nanga a Gado lobi-buku, ma noiti a kon na wan konmakandra. A no e kon na a Memrefesa srefi! Èn a e pasa furu leisi taki a no e studeri fu pikinpikin sani ede. Efu yu abi so wan studie, yu musu abi wan seryusu takimakandra nanga en. *

19. San yu kan taigi wan Bijbelstudie di no e go na fesi, èn san yu o abi fu du kande?

 ¹⁹ Yu kan bigin a takimakandra nanga na aksi disi: ’San na a moro bigi problema di e tapu yu fu tron wan Yehovah Kotoigi?’ Kande a Bijbelstudie o piki: ’Mi lobi studeri Bijbel, ma noiti mi o tron wan Yehovah Kotoigi!’ Efu na so a e denki aladi a e studeri wan langa pisi ten kaba, dan a no de fanowdu fu tan studeri nanga en. Ma a kan taki te yu poti na aksi disi gi yu Bijbelstudie, dan now fosi a o taigi yu fu san ede a no e go na fesi. Kande a feni taki noiti a o man preiki oso fu oso. Te yu sabi fa a e firi, dan yu o man yepi en moro bun.

20. Fa Tori fu den apostel 13:48 kan yepi wi fu sabi efu wi musu tapu a studie?

²⁰ A sari taki son Bijbelstudie de leki den Israelsma fu a ten fu Esekièl. Luku san Yehovah ben taigi Esekièl fu den Israelsma disi: „Den e si yu leki wan sma di e singi lobisingi, leki wan sma di abi wan moi sten èn di sabi prei pokusani di gersi harpu. Den o yere san yu e taki, ma nowan fu den o du san yu taki” (Esek. 33:32). A kan muilek gi wi fu taigi wan sma taki wi no o studeri moro nanga en. Ma „a ten di tan abra kon syatu” (1 Kor. 7:29). Na presi fu gebroiki wi ten fu studeri nanga sma di no e go na fesi, wi musu suku sma di e sori taki den „abi a yoisti denki fu man kisi têgo libi”.​—Leisi Tori fu den apostel 13:48.

21. San na wi yaritekst fu 2020 èn fu san ede a fiti?

²¹ A yaritekst fu 2020 o memre wi taki wi musu yepi sma moro bun fu fu tron disipel. Den wortu fu a yaritekst na wan fu den sani di Yesus ben taki na a konmakandra di a ben hori na wan bergi na ini Galilea. Meki wi tan prakseri a yaritekst fu 2020 di e taki: Go na sma, meki den tron disipel èn dopu den.​—Mat. 28:19.