1. San wan lezing di hori na wan kongres na ini 1935 du nanga wan yonguman?

NA WAN kongres di ben hori na ini 1926, wan yonguman di ben abi 18 yari teki dopu. En papa nanga mama ben de Bijbel Ondrosukuman, soleki fa den ben kari Yehovah Kotoigi na a ten dati. Den ben abi dri manpikin nanga tu umapikin. Den leri den fu dini Yehovah Gado èn fu teki na eksempre fu Yesus Krestes. Na a ten dati, ala Bijbel Ondrosukuman ben e dringi fu a win èn ben e nyan fu a brede na a Memrefesa di ben e hori ibri yari. Èn na dati a yonguman disi ben e du tu. Ma di a yere a prenspari lezing di nen „A bigi ipi”, a kon abi wan heri tra howpu. A lezing dati ben hori na ini 1935, na wan kongres di ben hori na Washington D.C., Amerkankondre. A takiman ben de Brada J. F. Rutherford. San den Bijbel Ondrosukuman leri na a kongres dati?

2. Sortu moi sani Brada Rutherford ben tyari kon na krin na ini a lezing fu en?

² Na ini a lezing fu en, Brada Rutherford ben tyari kon na krin suma ben o de a „bigi ipi” di Openbaring 7:9 e taki fu en. Teleki a ten dati, den Bijbel Ondrosukuman ben bribi taki a „bigi ipi” ben de wan grupu sma di ben o go na hemel tu, ma di no ben de leki den salfuwan di ben gi yesi na Gado na ini ala sani. Brada Rutherford ben gebroiki Bijbel fu sori taki den sma fu a bigi ipi no ben de sma di ben o go libi na ini hemel, ma taki den na den  tra skapu * fu Krestes di ben o pasa „a bigi banawtu” libilibi èn di ben o libi fu têgo na grontapu (Openb. 7:14). Yesus ben pramisi: „Mi abi tra skapu tu, di no de fu a skapupen disi. Mi musu tyari den kon tu, èn den o arki mi sten èn den o tron wán ipi di abi wán skapuman” (Yoh. 10:16). Den tra skapu disi na Kotoigi fu Yehovah di e gi yesi na en èn di abi a howpu fu libi fu têgo na ini Paradijs na grontapu (Mat. 25:31-33, 46). Meki wi go luku fa a nyun sani disi di den ben leri fu Bijbel, kenki a libi fu furu anbegiman fu Yehovah èn fu a yongu brada disi di ben abi 18 yari.​—Ps. 97:11; Odo 4:18.

3-4. San dusundusun sma kon frustan na a kongres fu 1935? Fruklari dati.

³ Wan span momenti na a kongres disi ben de di a takiman ben aksi den arkiman: „Un alamala di abi a howpu fu libi fu têgo na grontapu, grantangi, un kan opo tanapu?” Wan sma di ben de drape taki dati moro leki afu fu den 20.000 sma di ben de drape, opo tanapu. Dan Brada Rutherford taki: „Luku! A bigi ipi!” Baka dati, ala den sma di ben de drape bigin bari fu prisiri. Den sma di ben tanapu ben kon frustan taki den no ben o go na hemel. Den ben sabi taki den no ben salfu nanga a santa yeye fu Gado. A tra dei fu a kongres, 840 sma dopu. Furu fu den ben de fu den tra skapu.

⁴ Baka di a yongu brada yere a lezing disi, a no nyan moro fu a brede èn a no dringi moro fu a win na a Memrefesa. Dusundusun tra sma du a srefi sani disi. Nanga sakafasi, wan brada ben taki: „A Memrefesa fu 1935 ben de a lasti leisi di mi nyan fu a brede èn dringi fu a win. Mi ben kon frustan taki mi no ben abi a howpu fu go na hemel fu di Yehovah no ben salfu mi nanga en santa yeye. Na presi fu dati mi ben abi a howpu fu libi na grontapu èn fu yepi meki a grontapu tron wan paradijs.” Furu tra sma ben firi so tu (Rom. 8:16, 17; 2 Kor. 1:21, 22). Sensi a ten dati a bigi ipi kon moro bigi èn den e wroko makandra nanga den salfuwan di de na grontapu ete.

5. Fa Yehovah e prakseri fu den sma di no e nyan moro fu a brede èn di no e dringi moro fu a win na a Memrefesa?

⁵ Fa Yehovah e prakseri fu den wan di no nyan moro fu a brede èn di no dringi moro fu a win na a Memrefesa baka a yari 1935? Kon meki wi taki dati wan dopu Kotoigi na ini a ten disi e nyan fu a brede èn e dringi fu a win na a Memrefesa, ma baka ten a e kon frustan taki en a no wan salfuwan trutru. Fa Yehovah e si den sma dati? (1 Kor. 11:28) Son sma ben nyan fu a brede èn dringi fu a win fu di den ben prakseri taki den abi a howpu fu go na hemel, aladi dati no ben de so. Ma efu den sma disi si taki na wan fowtu den meki èn den no e nyan èn dringi moro na a Memrefesa aladi den e tan dini Yehovah fayafaya, dan Yehovah o si den leki sma di de fu den tra skapu. Awinsi den no e nyan fu a brede èn dringi fu a win, toku den o de na a Memrefesa fu di den e warderi san Yehovah nanga Yesus du gi den.

6. San Yesus taigi den engel fu du?

⁶ Dyonsro a bigi banawtu o bigin. Dati meki a kan gi wi deki-ati te wi e luku san Openbaring kapitel 7 e fruteri wi fu den salfu Kresten èn fu a bigi ipi tra skapu. Yesus ben taigi den engel fu tan hori den fo winti di o tyari pori kon. Den no musu lusu den winti disi na grontapu, solanga den salfu Kresten no kisi wan marki na tapu den fesi-ede, san wani taki dati Yehovah feni den bun (Openb. 7:1-4). Den salfu brada fu Krestes di tan gi yesi na Yehovah, o kisi a grani fu libi na ini hemel leki kownu nanga priester (Openb. 20:6). Yehovah, Yesus nanga den engel o breiti srefisrefi te ala den 144.000 salfuwan kisi a pai fu den na hemel.

7. Soleki fa Openbaring 7:9, 10 e taki, dan suma Yohanes ben si na ini wan fisyun, èn san den ben e du? (Luku a fowtow na tapu a kafti.)

⁷ Baka di Yohanes taki fu den 144.000 kownu nanga priester, a si wan kefalek moi sani: „Wan bigi ipi sma” di e pasa Armagedon libilibi. A grupu disi, bigi moro a fosi grupu di a ben si èn wi no sabi omeni sma o de na ini a grupu disi te fu kaba. (Leisi Openbaring 7:9, 10.) Den sma disi „weri langa weti krosi”, san e sori taki den no meki a grontapu fu Satan „flaka” den èn den tan gi yesi na Gado èn na Krestes (Yak. 1:27). Den e bari fu prisiri taki Yehovah nanga Yesus, a Pikin Skapu fu Gado, frulusu den. Den e hori palmtaki na ini den anu tu, san e sori taki den e si Yesus leki a Kownu di Yehovah poti.​—Luku Yohanes 12:12, 13.

8. San ala sma na ini hemel o du, soleki fa Openbaring 7:11, 12 e sori?

⁸ Leisi Openbaring 7:11, 12. San pasa di den wan na ini hemel si a bigi ipi? Yohanes e si fa ala sma na ini hemel breiti srefisrefi èn fa den e prèise Yehovah te den e si a bigi ipi. Ala sma na ini hemel o breiti srefisrefi te a fisyun disi kon tru. A o gi den furu prisiri fu si fa a bigi ipi pasa a bigi banawtu libilibi.

9. San den sma fu a bigi ipi e du now, soleki fa Openbaring 7:13-15 e sori?

⁹ Leisi Openbaring 7:13-15. Yohanes skrifi taki den sma fu a bigi ipi „wasi den langa krosi fu den èn den meki den kon weti na ini a brudu fu a Pikin Skapu”. Disi e sori taki den abi wan krin konsensi èn taki Yehovah feni den bun (Yes. 1:18). Den sma disi na Kresten di gi densrefi abra na Gado, di dopu, di e bribi na ini na ofrandi fu Yesus èn di de mati fu Yehovah (Yoh. 3:36; 1 Petr. 3:21). Dati meki den man tanapu na fesi a kownusturu fu Gado fu „du santa wroko gi en dei nanga neti” dyaso na grontapu. Den e wroko tranga fu preiki a Kownukondre boskopu èn fu meki disipel. Den e du a moro bigi pisi fu a wroko èn a Kownukondre fu Gado na a moro prenspari sani gi den.​—Mat. 6:33; 24:14; 28:19, 20.

10. Fu san a bigi ipi kan de seiker, èn sortu pramisi o kon tru?

¹⁰ Den sma fu a bigi ipi di o pasa a bigi banawtu libilibi, de seiker taki Gado o tan sorgu den fu di „a sma di e sidon na tapu a kownusturu o bradi en tenti abra den”. Dan a pramisi di den tra skapu ben wakti langa ten kaba, o kon tru: „[Gado] o figi ala watra puru na den ai èn dede no o de moro. Nowan sari, noso krei, noso pen no o de moro.”​—Openb. 21:3, 4.

11-12. (a) Sortu blesi a bigi ipi o kisi soleki fa Openbaring 7:16, 17 e sori? (b) San den tra skapu kan du na a Memrefesa èn fu san ede?

¹¹ Leisi Openbaring 7:16, 17. Na ini a  ten disi son anbegiman fu Yehovah de nanga angribere fu di den no abi moni fu bai nyanyan noso fu di dyugudyugu nanga feti de na ini a kondre. Trawan de na strafu-oso fu a bribi fu den ede. Ma den sma fu a bigi ipi breiti srefisrefi fu di den sabi taki efu den pasa a pori fu a grontapu disi libilibi, dan ala ten den o abi nofo nyanyan èn den o kisi leri fu Yehovah. Te Yehovah o pori a grontapu fu Satan, dan a o sorgu taki a bigi ipi no o firi na atibron fu en di de leki wan faya di e bron. Te a bigi banawtu pasa, dan Yesus o tyari den sma di de na libi ete na grontapu go na „watra di e gi [têgo] libi”. Denki a tori! A bigi ipi abi wan kefalek moi howpu. Fu ala den milyardmilyard sma di oiti ben libi na grontapu, den no o abi fu dede noiti!​—Yoh. 11:26.

¹² Den tra skapu breiti srefisrefi taki Yehovah nanga Yesus sorgu taki den abi wan kefalek moi howpu! Aladi Yehovah no teki den fu go libi na ini hemel, toku Yehovah lobi den neleki fa a lobi den salfuwan. Sma fu ala tu grupu kan prèise Gado nanga Krestes. Wan fasi fa den kan du disi na te den de na a Memrefesa.

13-14. Fu san ede den salfuwan nanga den tra skapu musu de na a Memrefesa fu a dede fu Krestes?

¹³ Na ini den yari di pasa un kon si taki nofo tron wán fu ibri 1000 sma di kon na a Memrefesa e nyan fu a brede èn e dringi fu a win. Furu gemeente no abi sma di e nyan fu a brede èn e dringi fu a win. Furu fu den sma di e kon na a Memrefesa abi a howpu fu libi dyaso na grontapu. Ma fu san ede den e go na a Memrefesa dan? We, fu san ede wan sma e go na a trow fu wan mati fu en? Na fu di a sma lobi den mati fu en di e trow èn fu di a wani horibaka gi den. Na so a tu taki den tra skapu di e go na a Memrefesa, e du dati fu di den wani sori Krestes nanga den salfuwan taki den lobi den èn taki den e horibaka gi den. Den tra skapu e go na a Memrefesa tu, fu di den wani sori taki den e warderi na ofrandi  fu Yesus. Na a ofrandi disi e meki taki den man libi fu têgo dyaso na grontapu.

¹⁴ Den tra skapu e go na a Memrefesa tu, fu di den wani gi yesi na a prenspari sani di Yesus taigi den. A fosi leisi di Yesus hori a Memrefesa nanga den apostel fu en, a taigi den: „Tan du disi fu memre mi” (1 Kor. 11:23-26). Dati meki den tra skapu e tan go na a Memrefesa solanga salfuwan e libi ete na grontapu. Ma den tra skapu e gi tra sma wan kari tu fu go na a Memrefesa makandra nanga den.

15. Fa wi kan prèise Gado nanga Krestes te wi de na a Memrefesa?

¹⁵ Te wi de na a Memrefesa, wi abi na okasi fu prèise Gado nanga Krestes te wi e singi èn begi makandra. A nen fu a lezing di o hori a yari disi na „De nanga tangi gi san Gado nanga Krestes du gi yu”. A o yepi yu fu kon abi moro warderi gi Yehovah nanga Krestes. Te a brede nanga a win o pasa, dan den o meki wi prakseri san den sani dati e prenki. Den e prenki a skin nanga a brudu fu Yesus. Èn wi o prakseri a lobi di Yehovah sori gi wi, di a meki en Manpikin dede gi wi so taki wi kan kisi libi (Mat. 20:28). Ibriwan sma di lobi wi hemel Tata nanga en Manpikin, o wani de na a Memrefesa.

16. Den salfuwan nanga den tra skapu no abi a srefi howpu, ma na sortu fasi den de a srefi?

¹⁶ Yehovah no lobi den salfuwan moro den tra skapu. Ala tu grupu prenspari gi en. Te yu luku en bun, a pai a srefi prijs gi den salfuwan nanga den tra skapu. A pai nanga a libi fu en Manpikin. A difrenti na mindri den tu grupu disi na taki den no abi a srefi howpu. Ma sma fu ala tu grupu musu tan gi yesi na Gado èn na Krestes (Ps. 31:23). Hori na prakseri taki Gado e gi wi a santa yeye fu en awinsi wi na salfuwan noso wi de fu den tra skapu. A e gi wi alamala san wi abi fanowdu.

17. Sortu pai den salfuwan di de na grontapu ete e wakti fu kisi?

¹⁷ Salfu Kresten no gebore nanga a howpu fu go libi na ini hemel. Na Yehovah e gi den a howpu dati. Den e prakseri fu a howpu dati, den e begi fu en, èn den no man wakti fu kisi a pai fu den na ini hemel. Den no sabi fa den skin o de te den de drape (Fil. 3:20, 21; 1 Yoh. 3:2). Toku den no man wakti fu si Yehovah, Yesus, den engel, nanga den tra salfuwan. Den no man wakti fu wroko makandra nanga den na ini a Kownukondre na hemel.

18. San den tra skapu e angri fu du na ini a ten di e kon?

 ¹⁸ Den tra skapu abi a howpu fu libi fu têgo na grontapu. Disi na wan sani di ala libisma wani (Preik. 3:11). Den no man wakti a ten te den o man yepi kenki a grontapu disi tron wan paradijs. Den e angri fu bow den eigi oso, prani den eigi gron, èn fu kweki den pikin na ini wan grontapu pe siki no de (Yes. 65:21-23). Den e prakseri a ten te den o go na difrenti presi fu grontapu, te den o luku den bergi, den moi busi, den se èn te den o man ondrosuku ala den moi sani di Yehovah meki. Ma san e gi den moro prisiri, na taki dei fu dei a matifasi fu den nanga Yehovah o kon moro tranga.

19. Sortu okasi a Memrefesa o gi ibriwan fu wi, èn o ten a o hori a yari disi?

¹⁹ Yehovah gi ala den anbegiman fu en wan moi howpu gi a ten di e kon (Yer. 29:11). A Memrefesa fu a dede fu Krestes na wan moi okasi gi ibriwan fu wi fu prèise Gado nanga Krestes gi den bun di den du gi wi so taki wi kan kisi têgo libi. A no de fu taki dati a Memrefesa na a moro prenspari konmakandra di tru Kresten e hori ibri yari. A o hori baka te son dongo tapu satra 27 maart 2021. Furu sma e libi na presi pe den de fri fu hori a prenspari konmakandra disi. Son sma o hori a Memrefesa aladi den e kisi frufolgu. Trawan di de na strafu-oso o abi fu suku wan fasi fu hori en drape. Ma awinsi san na a situwâsi, meki wi hori na prakseri taki Yehovah, Yesus, nanga den engel e si a muiti di wi e du. Meki a de so taki ala gemeente, grupu nanga ala tra sma na grontapu abi wan switi Memrefesa!