1. San ala sma wani?

FA YU e firi te wan sma di yu sabi èn di yu e lespeki e frigiti yu nen, noso te a no sabi srefisrefi moro suma na yu? A sani disi kan hati yu. Fu san ede? Fu di wi alamala wani taki sma musu lobi wi. Wi no wani nomo taki den memre wi nen, ma wi wani taki den e warderi san wi e du èn taki den lobi fa wi de.​—Num. 11:16; Yob 31:6.

2, 3. Aladi wi wani taki sma warderi wi, nanga san wi musu luku bun? (Luku a prenki na a bigin fu na artikel.)

² Wi wani taki sma warderi wi, ma fu di wi na sondusma, meki a kan pasa taki wi e suku fu kisi tumusi furu grani. A grontapu fu Satan kan meki taki wi wani kon pôpi èn prenspari. Te dati e pasa, dan wi no o gi grani moro na a sma di musu kisi ala grani. Na wi hemel Tata Yehovah Gado musu kisi ala grani èn na en wi musu anbegi.​—Openb. 4:11.

³ Na a ten fu Yesus den kerki fesiman ben e suku fu kisi  grani fu libisma. Yesus ben warskow den bakaman fu en: „Luku bun nanga den leriman fu Wèt di lobi waka nanga langa krosi èn di lobi te sma na wowoyo e gi den odi. Den lobi sidon na fesisei na ini den snoga èn na den moro prenspari presi na den fesa.” A ben taki moro fara: „Den sma disi o kisi wan moro hebi krutu” (Luk. 20:46, 47). Ma Yesus ben prèise wan pôti uma di no ben abi masra moro. Na uma disi gi tu sensi di no ben abi furu waarde, aladi tra sma no ben si dati kande (Luk. 21:1-4). Disi e sori taki Yesus ben e si sani heri tra fasi leki den kerki fesiman. Na artikel disi o yepi wi fu si fu san ede wi musu du muiti fu Yehovah feni wi bun, na presi fu suku biginen na ini grontapu.

4. Suma na a moro prenspari sma di musu sabi wi èn fu san ede?

⁴ Suma na a moro prenspari sma di musu sabi wi èn feni wi bun? Na ini a grontapu disi, sma e go na heiskoro, den wani meki furu moni noso den wani kon pôpi fu di den wani taki sma lespeki den. Ma Paulus ben sori suma musu sabi wi èn feni wi bun. A ben taki: „Now di unu kon sabi Gado, noso fu taki en leti, now di Gado kon sabi unu, fa a du kon dan taki unu e drai go baka na den soso sani di e tiri grontapu èn di no warti noti? Fu san ede unu wani dini den baka leki srafu?” (Gal. 4:9) Na wan bigi grani taki Yehovah, a Moro Hei Tiriman ’sabi wi’! Yehovah sabi fa wi de, a lobi wi èn a wani taki wi tron mati fu en. A sani disi e meki taki wi de koloku fu di Yehovah ben meki libisma fu de mati fu en.​—Preik. 12:13, 14.

5. San wi musu du efu wi wani taki Yehovah sabi wi leki en mati?

⁵ Moses ben de wan mati fu Gado. Di a aksi Yehovah fu yepi en fu kon sabi en moro bun, dan Yehovah taigi en: „A sani disi di yu aksi mi, mi o du tu, bika mi feni yu bun èn mi sabi yu na yu nen” (Eks. 33:12-17). Wi o kisi moi blesi tu te Yehovah sabi wi leki en mati. Ma san wi musu du fu tron wan mati fu Yehovah? Wi musu lobi en èn wi musu gi wisrefi abra na en.​—Leisi 1 Korentesma 8:3.

6, 7. San kan pori a matifasi di wi abi nanga Yehovah?

⁶ Ma a prenspari taki wi meki muiti fu tan mati fu wi hemel Tata. Neleki den Kresten fu Galasia wi no musu feti baka den ’soso sani di no warti noti’, sobun wi no musu suku fu kisi biginen na ini a grontapu disi (Gal. 4:9). Den Kresten na ini Galasia ben sabi Gado kaba èn Gado ben sabi den tu. Toku Paulus taki dati den ben „drai go baka” na den soso sani fu grontapu. Fu taki en leti Paulus taigi den: ’Fu san ede yu drai go baka na den sani di no warti noti?’

⁷ A sani disi kan pasa nanga wi tu? Iya. Di wi kon leri sabi Yehovah, dan kande neleki Paulus wi ben tapu fu suku biginen na ini a grontapu fu Satan. (Leisi Filipisma 3:7, 8.) Kande wi ben kan go na heiskoro, kande wi ben kan kisi wan moro hei posisi na wrokope noso kande wi ben kan du wan bisnis pe wi ben kan meki furu moni. A kan taki wi sabi singi noso prei poku bun, noso kande wi sabi prei sport bun. Den sani disi ben kan meki wi kon pôpi na ini grontapu, ma wi libi ala den sani disi na baka (Hebr. 11:24-27). A no musu hati wi srefisrefi taki  wi teki den bosroiti dati èn wi no musu abi a firi taki wi libi ben o go moro bun efu wi ben du den sani dati. Efu wi ben o denki so, dan wi ben kan drai go baka na den „soso sani” fu grontapu.

8. San o yepi wi fu tan du muiti fu meki Yehovah feni wi bun?

⁸ Wi no e suku biginen na ini grontapu, ma wi e tan du muiti fu meki Yehovah feni wi bun. San o yepi wi fu du dati? Wi musu hori tu sani na prakseri. A fosi sani na taki ala ten Yehovah e warderi den sma di e dini en nanga den heri ati (leisi Hebrewsma 6:10; 11:6). Yehovah e warderi ala den sma di e anbegi en. Gi en a no ben o du san reti efu a ben o frigiti san den du. Yehovah „sabi den sma di de fu en” (2 Tim. 2:19). A „sabi a pasi di den reti-ati sma e teki” èn a sabi fa fu frulusu den te den de na ini banawtu.​—Ps. 1:6; 2 Petr. 2:9.

9. Fruteri san Yehovah ben du fu sori taki a feni en pipel bun.

⁹ Son leisi Yehovah e du bigi sani gi den futuboi fu en fu sori taki a feni den bun (2 Kron. 20:20, 29). Fu eksempre, luku fa Yehovah frulusu en pipel na a Redi Se di a makti legre fu Farao ben e hari kon na den baka (Eks. 14:21-30; Ps. 106:9-11). A sani disi ben de so wan bigi sani taki sowan 40 yari bakaten sma fu den kontren dati ben e taki fu en ete (Yos. 2:9-11). Wi o kisi deki-ati te wi e prakseri fa Yehovah frulusu en pipel na ini owruten, fu di heri esi Gok fu Magok o kon feti nanga wi (Esek. 38:8-12). Na a ten dati wi o breiti taki wi no ben suku biginen na grontapu, ma taki wi tron mati fu wi Gado.

10. San na a di fu tu sani di wi musu hori na prakseri?

¹⁰ A di fu tu sani di wi musu hori na prakseri na disi: Yehovah e du sani gi wi di wi no ben fruwakti, fu sori taki a feni wi bun. Efu sma e du bun sani soso fu di den wani kisi grani fu trawan, dan Yehovah no o blesi den srefisrefi. Fu san ede? Fu di den kisi den pai kaba fu tra sma di prèise den. (Leisi Mateyus 6:1-5.) Ma Yesus taki dati wi Tata „e si ala sani”. Sobun, awinsi sma no sabi sortu bun wi e du gi trawan, Yehovah e si dati èn a o blesi wi tu. Ma son leisi Yehovah e blesi wi na wan fasi di wi no ben fruwakti. Meki wi go luku wan tu eksempre.

11. Fa Yehovah gi Maria grani?

¹¹ Di a ten ben doro taki Yehovah ben o meki en Manpikin gebore na grontapu leki wan libisma, dan a teki Maria, wan yongu uma di ben abi sakafasi fu tron a mama fu en Manpikin. Maria ben e libi na ini a pikin foto Nasaret di ben de bun fara fu Yerusalem nanga a moi tempel fu en. (Leisi Lukas 1:26-33.) Fu san ede Yehovah gi Maria a grani disi? Na engel Gabrièl ben taigi Maria taki ’Gado ben feni en bun’. Den sani di Maria taki di a ben de na Elisabet, a famiri fu en, e sori taki a ben de wan bun mati fu Yehovah (Luk. 1:46-55). Yehovah ben luku Maria èn a si taki a ben de wan uma di lobi en. Dati meki a gi en wan grani di a no ben fruwakti.

12, 13. Fa Yehovah gi Yesus grani di a gebore èn di Maria tyari en go na a tempel 40 dei baka dati?

¹² Di Yesus gebore, dan kande sma  ben o denki taki den heihei man fu Yerusalem nanga Betlehem ben o de den fosiwan di ben o kon sabi disi. Ma Yehovah no gi den a grani disi. A seni engel go na wan tu skapuman di ben de na den weigron dorosei fu Betlehem fu fruteri den san pasa (Luk. 2:8-14). Ne den skapuman disi go luku a beibi (Luk. 2:15-17). A musu fu de so taki Maria nanga Yosef ben breiti di den si taki Yesus kisi grani na a fasi disi. Yehovah e du sani heri tra fasi leki fa Satan e du sani. Di Satan seni den lukuman fu go na Yesus nanga en papa nanga mama, dan heri Yerusalem kon yere taki Yesus gebore èn a sani dati tyari bruya kon (Mat. 2:3). A bakapisi ben de taki sma kiri omeni pikin.​—Mat. 2:16.

¹³ Fotenti dei baka di Yesus gebore, Maria ben musu tyari wan ofrandi gi Yehovah na a tempel na ini Yerusalem, soleki fa a wet ben e taki. Yerusalem ben de sowan 9 kilometer fu Betlehem (Luk. 2:22-24). Di Maria, Yosef nanga Yesus ben de na pasi, dan a kan taki Maria ben e prakseri efu a priester ben o du wan spesrutu sani fu gi Yesus grani. Yesus kisi grani, ma a no leki fa Maria ben fruwakti. Yehovah meki Simeon ’wan reti-ati man di ben e lespeki Gado’ nanga Ana wan umaprofeiti di ben abi 84 yari, fruteri taki Yesus na a Mesias noso Krestes di Gado ben pramisi.​—Luk. 2:25-38.

14. Sortu blesi Maria kisi fu Yehovah?

¹⁴ Fa a de nanga Maria? Yehovah tan sori taki a ben warderi en taki a sorgu a Manpikin fu en teleki a kon bigi? Iya. Gado meki sma skrifi a tori fu en na ini Bijbel. A sori leki Maria no ben man go preiki nanga Yesus na ini den dri nanga afu yari di a ben e du a diniwroko fu en. Kande a no ben man fu di en masra ben dede kaba èn dati meki a tan na ini Nasaret. Sobun, Maria no ben abi a grani fu si furu fu den sani di Yesus du. Ma toku a ben man de nanga Yesus na a ten di a dede (Yoh. 19:26). Bakaten, Maria ben de na ini Yerusalem makandra nanga den tra disipel na a Pinksterfesa di den kisi santa yeye (Tori 1:13, 14). A kan taki ensrefi ben salfu nanga santa yeye. Efu dati de so, dan a kisi a grani fu tiri nanga Yesus na ini hemel fu ala ten. Dati na trutru wan moi grani di a kisi!

15. Di Yesus ben de na grontapu, fa Yehovah sori taki a ben feni en bun?

¹⁵ Yesus no ben e suku fu kisi grani fu den kerki fesiman nanga den tiriman fu a ten fu en. Ma dri leisi Yehovah taki nanga en komoto fu hemel fu sori en taki a lobi en. A sani disi ben musu fu gi en deki-ati. Baka di Yesus dopu na ini Yordan-liba, Yehovah taigi en: „Disi na mi Manpikin, a lobiwan di mi feni bun” (Mat. 3:17). A sori leki na Yohanes a Dopuman wawan ben yere den wortu disi. Wán yari fosi Yesus dede, dri fu den apostel yere di Yehovah taki a sani disi fu Yesus: „Disi na mi Manpikin, a lobiwan di mi feni bun. Un arki en” (Mat. 17:5). Wan tu dei fosi Yesus dede, Yehovah taki baka nanga en komoto fu hemel.​—Yoh. 12:28.

16, 17. Sortu grani Yehovah gi Yesus èn fu san ede a no ben fruwakti dati?

¹⁶ Yesus ben sabi taki sma ben o lei gi en taki a kosi Gado èn taki den ben o  kiri en leki wan ogriman. Toku a wani fu en no ben prenspari, ma a begi meki a wani fu Yehovah pasa (Mat. 26:39, 42). „A ben de klariklari fu dede na a pinapostu sondro fu broko en ede taki a ben o kisi syen.” Sobun, a ben wani prisiri na ati fu en Tata na presi fu libisma (Hebr. 12:2). Fa Yehovah gi en grani?

¹⁷ Di Yesus ben de na grontapu, a aksi en Tata fu gi en a srefi glori di a ben abi na hemel (Yoh. 17:5). Nowan presi na ini Bijbel e sori taki Yesus ben abi a howpu taki a ben o kisi moro grani. A no ben fruwakti taki Yehovah ben musu gi en wan spesrutu grani fu di a ben du a wani fu en na grontapu. Ma san Yehovah du gi en? A gi en wan grani di a no ben fruwakti. A gi en wan opobaka èn a ’poti en moro hei leki fa a ben de kaba’. A meki a tron wan yeye di no man dede noiti moro. * Na a ten dati nowan sma ben kisi so wan grani ete (Fil. 2:9; 1 Tim. 6:16). Iya, Yehovah gi Yesus wan bigi grani fu di a du a wani fu en!

18. San o yepi wi fu no suku biginen na ini a grontapu disi?

¹⁸ San o yepi wi fu no suku biginen na ini a grontapu disi? Hori na prakseri taki ala ten Yehovah e warderi den sma di e dini en nanga den heri ati èn taki nofo tron a e blesi den na wan fasi di den no e fruwakti. Wi no sabi fa Yehovah o blesi wi na ini a ten di e kon. San wi musu du now, na taki wi musu horidoro te wi e kisi problema nanga tesi na ini na ogri grontapu disi. A grontapu disi o pasa gowe. Sobun, wi no abi fu suku biginen na ini a grontapu disi (1 Yoh. 2:17). Wi lobi-ati Tata Yehovah, ’no e du sani di no reti. Dati meki a no o frigiti a wroko di wi e du nanga a lobi di wi e sori gi a nen fu en’ (Hebr. 6:10). Iya, wi kan de seiker taki Yehovah o blesi wi fu sori wi taki a feni wi bun. Kande a o du sani gi wi di wi no ben fruwakti srefisrefi!