Den e prenki den engel na hemel di ben musu pori Yerusalem èn di Gado o gebroiki tu fu pori na ogri grontapu fu Satan na Armagedon. Fosi wi ben frustan a tori disi tra fasi. Ma fu san ede wi musu kenki a fasi fa wi ben e frustan en?

Fosi Yerusalem kisi pori na ini 607 Fosi Krestes, Esekièl si fa sma di ben drai baka gi a tru anbegi ben e du ogri. Baka dati a si na ini wan fisyun san ben o pasa fosi a foto kisi pori. A si siksi man di ben abi fetisani na ini den anu fu naki sma kiri, nanga wan man di ben waka na den mindri. A man disi „ben weri linnen krosi” èn a ben abi „wan enkikokro fu wan sekretarsi” (Esek. 8:6-12; 9:2, 3). Ne Gado taigi a man: „Pasa na ini a heri foto . . . èn poti wan marki na a fesi-ede fu ala den sma di e soktu èn e geme fu ala den tegu sani di sma e du na ini a foto.” Baka dati Gado taigi den siksi man di ben abi den fetisani, taki den ben musu kiri ala sma na ini a foto di no ben abi wan marki (Esek. 9:4-7). San a fisyun e leri wi èn suma na a man di abi na enkikokro fu wan sekretarsi?

Esekièl kisi a fisyun disi na ini 612 Fosi Krestes. A ben abi fu du nanga wan profeititori di kon tru a fosi leisi, di a legre fu Babilon pori Yerusalem sowan feifi yari baka dati. Aladi na den Babilonsma di no ben e anbegi Gado pori a foto, toku na Yehovah gi den pasi fu du dati (Yer. 25:9, 15-18). A ben meki den pori a foto fu strafu en pipel di ben drai baka gi en. Ma den Babilonsma no ben musu kiri den reti-ati sma, na soso den ogrisma den ben musu kiri. Fu di Yehovah na wan lobi-ati Gado, meki a ben seti sani fu kibri den Dyu di ben e tegu gi ala den ogri di ben e pasa na ini a foto.

Esekièl no ben kisi a wroko fu poti marki gi den sma noso fu yepi pori a foto, ma na den engel ben o tiri a wroko disi. Sobun, a profeititori disi e meki wi si san e pasa na ini hemel. Yehovah ben taigi den engel fu en fu orga a wroko fu pori ogrisma èn fu sorgu taki reti-ati sma tan na libi. *

Fosi, wi ben e taki dati na ini a ten disi a man di abi na enkikokro fu wan sekretarsi, na den salfu Kresten di de na grontapu ete. Wi ben e denki taki den sma di e arki a bun nyunsu nownow, e kisi wan marki fu tan na libi. Ma na ini den yari di pasa, wi kon si taki wi ben musu kenki a fasi fa wi ben fruklari a tori disi. Mateyus 25:31-33 e sori taki na Yesus e krutu sma. Na a ten fu a bigi banawtu, a o krutu sma èn a o prati den na ini tu grupu: Den sma di de leki skapu o tan na libi èn den sma di de leki bokoboko o kisi pori.

Sobun, now di wi e frustan sani tra fasi, dan san wi kan leri fu a fisyun fu Esekièl? Wi kan leri feifi sani:

1.  Fosi Yerusalem kisi pori, Esekièl ben e du a wroko fu wan waktiman makandra nanga Yeremia, neleki fa Yesaya ben e du dati fosi. Now Yehovah e gebroiki wan pikin grupu salfu Kresten fu gi en pipel nyanyan èn fu warskow sma fosi a bigi banawtu doro. Ma ala futuboi fu Krestes abi a frantwortu fu warskow sma.​—Mat. 24:45-47.

2.  Esekièl no ben kisi a wroko fu poti wan marki gi sma di ben o tan na libi, èn den futuboi fu Yehovah na ini a ten disi no kisi a wroko disi tu. Na presi fu dati, den e fruteri sma a boskopu  fu Yehovah nomo. Na so den e du a preikiwroko di den engel e tiri.​—Openb. 14:6.

3.  Na ini a ten fu Esekièl, nowan sma ben e kisi wan trutru marki na tapu en fesi-ede. Na so a de tu na ini a ten disi. Ma san sma musu du fu kan tan na libi? Den musu arki a bun nyunsu, den musu kon abi den nyun fasi fu wan Kresten, den musu gi densrefi abra na Yehovah èn den musu horibaka gi den brada fu Krestes (Mat. 25:35-40). Te den e du den sani disi, dan den e kisi wan marki na agersi fasi, so taki den kan tan na libi te a bigi banawtu doro.

4.  Na ini a ten disi, a man di abi na enkikokro fu wan sekretarsi e prenki Yesus Krestes di o gi sma wan marki fu kan tan na libi. Na a ten fu a bigi banawtu, a bigi ipi o kisi a marki fu den fu di Yesus o krutu den leki skapu. Na so den o man kisi têgo libi dya na grontapu.​—Mat. 25:34, 46. *

5.  Na ini a ten disi, den siksi man di abi den fetisani fu naki sma kiri, e prenki Yesus en legre na hemel èn en srefi na a edeman fu a legre disi. Dyonsro den o pori ala ogrisma èn den o puru ala den ogri di e pasa na grontapu.​—Esek. 9:2, 6, 7; Openb. 19:11-21.

Den moi sani disi di wi kon frustan e tranga a bribi fu wi taki Yehovah no o pori reti-ati sma makandra nanga ogrisma (2 Petr. 2:9; 3:9). Den e sori wi tu o prenspari a de fu du a preikiwroko. Fosi a kaba doro, ala sma musu yere a warskow!​—Mat. 24:14.