1. San na wan sani di e meki taki libisma hei moro meti?

WAN sani di e meki taki libisma hei moro meti, na taki den abi wan konsensi. Na so Gado meki libisma sensi a bigin. Baka di Adam nanga Eva trangayesi a wet fu Yehovah, den go kibri. Disi e sori taki den ben abi konsensi fonfon.

2. Fu san ede wi kan agersi wi konsensi nanga wan kompas? (Luku a prenki na a bigin fu na artikel.)

² A konsensi fu wi na wan firi di e yepi wi fu sabi efu wan sani bun noso efu a no bun èn a kan yepi wi fu teki bun bosroiti na ini a libi. Efu wan sma en konsensi no e wroko bun, dan a de neleki wan boto di abi wan broko kompas. A winti nanga den skwala fu a se kan tyari a boto go lasi. Ma efu wan kompas e wroko bun, dan dati kan yepi a kapten fu a boto fu sabi pe a musu go. Na so a de tu taki wan konsensi di e wroko bun kan yepi wi fu sabi sortu bosroiti wi musu teki.

3. San kan pasa efu wan sma en konsensi no e wroko bun?

³ Efu wan sma en konsensi no e wroko bun, dan a no man  tapu en fu du ogri (1 Tim. 4:1, 2). A konsensi fu en kan taigi en srefi taki „ogri bun” (Yes. 5:20). Yesus ben gi den disipel fu en a warskow disi: „A yuru o doro te ibri sma di kiri unu, o prakseri taki a du wan santa wroko gi Gado” (Yoh. 16:2). Na dati den sma di kiri a disipel Stefanus ben e denki (Tori 6:8, 12; 7:54-60). Na ini den hondrohondro yari di pasa, furu kerkisma du bigi ogri. Den kiri sma srefi èn den taki dati den du en gi Gado. Ma fu taki en leti, den wet fu Gado e krutu den sani di den du (Eks. 20:13). A de krin taki a konsensi fu den no ben e wroko bun!

4. Fa wi kan sorgu taki wi konsensi e wroko bun?

⁴ Fa wi kan sorgu taki a konsensi fu wi e wroko bun? Den wet nanga den gronprakseri fu Gado Wortu „bun fu gi leri, fu gi rai, fu poti sani kon reti èn fu gi piri-ai na wan reti fasi” (2 Tim. 3:16). Fu dati ede, te wi e studeri Bijbel fayafaya, te wi e denki dipi fu san wi leisi èn te wi e du san wi leri na ini Bijbel, dan moro nanga moro wi o bigin denki neleki fa Yehovah e denki. Na so a konsensi fu wi o yepi wi fu teki bun bosroiti. Meki wi go luku fa den wet nanga den gronprakseri fu Yehovah kan yepi wi fu abi wan konsensi di e wroko bun.

5, 6. Fa den wet fu Gado kan yepi wi?

⁵ Efu wi wani taki den wet fu Gado yepi wi, dan wi no musu leisi den noso sabi den nomo. Wi musu kon lobi den èn wi musu lespeki den. Bijbel e taki: „Un no musu lobi ogri kwetikweti. Ma un musu lobi san bun” (Amos 5:15). Fa wi kan du dati? Wi musu leri fu si sani soleki fa Yehovah e si sani. Luku na eksempre disi. Kon meki wi taki dati yu no man sribi bun. Datra e taigi yu taki yu musu nyan gosontu nyanyan, yu musu oefen yu skin èn yu musu kenki a fasi fa yu e libi. A no de fu taki dati yu o kisi moro warderi gi a datra te yu e si taki a rai fu en e yepi yu.

⁶ Na a srefi fasi wi Mekiman gi wi wet di e kibri wi gi den bakapisi fu sondu èn di kan yepi wi fu abi wan moro bun libi. Fu eksempre, Bijbel e leri wi taki wi no musu lei, wi no musu bedrigi sma, wi no musu fufuru, wi no musu du hurudu, wi no musu du ogri èn wi no musu du afkodrei. (Leisi Odo 6:16-19; Openb. 21:8.) Te wi e si sortu wini wi e kisi te wi e gi yesi na den wet fu Yehovah, dan wi o kon abi moro lobi gi en èn gi den wet fu en.

7. Fa den tori na ini Bijbel kan yepi wi?

⁷ Wi no abi fu ondrofeni takru bakapisi, fosi wi kon sabi taki a no bun fu pasa den wet fu Gado. Wi kan leri fu den fowtu di tra sma meki èn di skrifi na ini Gado Wortu. Odo 1:5 e taki: „Wan koni sma o arki èn a o wani teki moro leri.” Iya, Gado e gi wi a moro bun leri. Dati meki wi musu leisi èn denki dipi fu den tori na ini Bijbel. Fu eksempre, prakseri sortu sari sani miti Kownu David baka di a trangayesi Yehovah èn du hurudu nanga Batseiba (2 Sam. 12:7-14). Te yu e leisi a tori disi, aksi yusrefi: ’Fa David ben kan sorgu taki den problema disi no miti en? San mi ben o du efu mi ben de na ini a srefi situwâsi fu David? Mi ben o du hurudu neleki David noso mi ben o lon gowe neleki Yosef?’ (Gen. 39:11-15) Te wi e prakseri sortu takru bakapisi sondu e tyari kon, dan wi o leri fu ’no lobi ogri’.

8, 9. (a) Fa a konsensi fu wi e yepi wi? (b) Fa den gronprakseri fu Yehovah kan yepi wi?

 ⁸ Wi e du ala san wi man fu no du sani di Gado no lobi. Ma na ini son situwâsi wet no de di e sori wi krin san wi musu du. Fa wi kan kon sabi san Gado feni bun? Efu wi gebroiki Bijbel fu kon abi wan konsensi di e wroko bun, dan wi o teki koni bosroiti.

⁹ Fu di Yehovah lobi wi, meki a gi wi gronprakseri di kan yepi wi. Yehovah taki: „Mi, Yehovah, na yu Gado. Mi na a sma di e leri yu fu kisi wini. Mi na a sma di e meki yu waka a pasi di yu musu waka” (Yes. 48:17, 18). Te wi e denki dipi fu Bijbel gronprakseri, dan den o naki wi ati. Disi o meki taki a konsensi fu wi wroko moro bun. Na so wi o man teki koni bosroiti.

10. San na gronprakseri èn fa Yesus ben gebroiki den fu gi sma leri?

¹⁰ Wan gronprakseri na wan prenspari tru leri di e yepi wi fu si sani na a yoisti fasi èn fu teki bun bosroiti. Te wi sabi den gronprakseri fu Yehovah, dan dati e yepi wi fu frustan fa a e denki èn fu san ede a gi wi son wet. Yesus ben gebroiki gronprakseri fu leri den disipel fu en taki den sani di den e prakseri èn e du abi bakapisi. Fu eksempre, a leri wi taki te wi e hori sma na ati, dan dati kan meki taki wi du ogri nanga den. A leri wi tu taki takru lostu kan meki wi go du hurudu (Mat. 5:21, 22, 27, 28). Efu wi wani taki wi konsensi wroko bun, dan wi musu meki den gronprakseri fu Gado tiri wi. Te wi e du dati, dan Gado e kisi glori.​—1 Kor. 10:31.

11. Na ala ten a konsensi fu tu Kresten e wroko na a srefi fasi?

¹¹ Ala Kresten e gebroiki Bijbel fu kon abi wan konsensi di e wroko bun. Toku na ini wán spesrutu situwâsi tu Kresten kan teki difrenti bosroiti. Fu eksempre, te den musu bosroiti efu den o dringi sopi noso efu den no o du dati. Bijbel no e taki dati a fowtu fu dringi sopi, ma a e warskow wi fu no dringi tumusi furu sopi èn fu no kon drungu (Odo 20:1; 1 Tim. 3:8). Ma disi wan taki dati solanga wan Kresten no e dringi tumusi furu sopi, a no abi fu span nanga nowan tra sani? Nôno. Kande en konsensi e gi en pasi fu dringi sopi, ma a musu hori a konsensi fu trawan na prakseri tu.

12. Fa den wortu na ini Romesma 14:21 kan yepi wi fu lespeki a konsensi fu trawan?

¹² Paulus ben sori taki wi musu lespeki a konsensi fu trawan. A ben taki: „A bun fu no nyan meti, fu no dringi win, noso fu no du wan sani efu dati kan meki yu brada fadon” (Rom. 14:21). Sobun, aladi wi sabi taki a no fowtu fu dringi sopi, wi ben o de klariklari fu no dringi sopi efu wi sabi taki dati ben o trobi a konsensi fu wan brada noso sisa. Son brada nanga sisa ben abi wan problema nanga sopi fosi den kon sabi Yehovah, ma now den teki a bosroiti fu no dringi sopi srefisrefi. A no de fu taki, dati wi no ben o wani du wan sani di e meki taki so wan brada noso sisa bigin dringi furu sopi baka (1 Kor. 6:9, 10). Dati meki efu wi kari wan sma kon na wi oso, a no ben o bun fu dwengi en fu dringi sopi efu a no wani du dati.

13. Fa Timoteyus sori taki a ben lespeki a konsensi fu trawan èn taki a ben wani yepi den fu arki a bun nyunsu?

¹³ Di Timoteyus ben de wan yonguman, a meki sma besnèi en, aladi a ben  sabi taki a sani disi ben o gi en furu skin-ati. A du disi fu di a ben o go preiki gi den Dyu èn a ben sabi taki efu a no ben besnèi son Dyu ben kan naki futu. Timoteyus ben de neleki Paulus di no ben wani meki nowan sma naki futu (Tori 16:3; 1 Kor. 9:19-23). Yu de neleki Timoteyus di no ben e denki ensrefi nomo, ma di ben e hori trawan na prakseri?

14, 15. (a) Fa wi kan kon tron lepi Kresten? (b) Fa wan lepi Kresten e libi nanga trawan?

¹⁴ Baka te wan Kresten ’leri den fosi sani di abi fu du nanga Krestes’, a musu ’du ala muiti fu tron wan lepi sma’ (Hebr. 6:1). Wi no e tron lepi Kresten soso fu di wi de na ini a tru anbegi furu yari kaba. Wi musu „du ala muiti”. Wi musu kon kisi moro sabi fu Bijbel èn wi musu meki muiti fu frustan en bun. Dati meki wi e kisi a deki-ati fu leisi Bijbel ibri dei (Ps. 1:1-3). Yu e meki muiti fu du dati? Te yu e leisi Bijbel ibri dei, dan dati o yepi yu fu frustan den wet nanga den gronprakseri fu Yehovah moro bun.

¹⁵ A moro prenspari wet gi Kresten na a wet fu lobi. Yesus ben taigi den disipel fu en: „Na a fasi disi ala sma o sabi taki unu na mi disipel, te unu lobi makandra” (Yoh. 13:35). Yakobus, na afu-brada fu Yesus ben kari lobi „a moro hei wèt” (Yak. 2:8). Paulus ben taki: „Te unu abi lobi, dan unu man du san a Wèt e taki” (Rom. 13:10). A no e fruwondru wi taki den Bijbel skrifiman taki so furu fu lobi, fu di Bijbel e taki dati „Gado na lobi” (1 Yoh. 4:8). Gado en lobi a no wan firi nomo. A e du sani fu sori taki a lobi wi. Yohanes ben skrifi: „Disi na a fasi fa Gado sori taki a lobi wi: Gado ben seni en wan-enkri Manpikin kon na grontapu, so taki a kan yepi wi fu kisi libi” (1 Yoh. 4:9). Te wi e sori lobi gi Yehovah, Yesus, den brada nanga sisa, nanga tra sma, dan wi e sori taki wi na lepi Kresten.​—Mat. 22:37-39.

16. Fu san ede gronprakseri prenspari gi lepi Kresten?

¹⁶ Te wi e meki muiti fu go na fesi, dan wi o si taki gronprakseri o kon moro prenspari gi wi. Dati de so fu di wi kan  gebroiki wan wet na ini wán spesrutu situwâsi nomo, ma wi kan gebroiki gronprakseri gi difrenti situwâsi. Fu eksempre, kande wan yongu pikin no e frustan fu san ede takru mati no bun gi en. Dati meki en papa nanga mama e poti regel gi en di o kibri en (1 Kor. 15:33). Ma te a pikin e kon moro bigi èn a e bigin frustan sani moro bun, dan a o man sabi fa a musu gebroiki Bijbel gronprakseri. Den gronprakseri disi o yepi en fu suku bun mati. (Leisi 1 Korentesma 13:11; 14:20.) Te wi e wroko nanga den gronprakseri fu Bijbel, dan wi konsensi o wroko bun èn wi o man teki bun bosroiti. Wi o sabi san Yehovah e fruwakti fu wi na ini ibri situwâsi.

17. Fu san ede wi kan taki dati wi abi nofo sani di kan yepi wi fu teki bun bosroiti?

¹⁷ Wi abi ala san de fanowdu fu teki bosroiti di Yehovah feni bun? Iya. Na ini Bijbel wi e feni wet nanga gronprakseri di e yepi wi fu ’kon bun dorodoro èn fu de srekasreka fu du ibri bun wroko’ (2 Tim. 3:16, 17). Dati meki a bun fu kon sabi Bijbel gronprakseri, so taki yu kan „frustan san na a wani fu Yehovah” (Ef. 5:17). Gebroiki den sani di na organisâsi e gi wi fu studeri Bijbel. Wi abi a buku Ondrosuku Bijbel moro fini​—Gi Yehovah Kotoigi, a Sranantongo Watchtower Library na tapu DVD, a Waktitoren LIBRARY TAPU INTERNET nanga a JW Library app. Den sani disi o yepi wi fu kisi furu wini te wi e studeri nanga wisrefi èn te wi e studeri nanga wi osofamiri.

18. Sortu blesi wi e kisi te wi e hori wisrefi na den wet nanga den gronprakseri fu Yehovah?

¹⁸ Wi o kisi blesi te wi e hori wisrefi na den wet nanga den gronprakseri fu Yehovah. Psalm 119:97-100 e taki: „Mi lobi a wèt fu yu srefisrefi. Heri dei mi e poti prakseri na en. Den komando fu yu e meki mi koni moro den feanti fu mi, fu di mi e poti prakseri na den ala ten. Mi kon frustan sani moro krin leki ala den leriman fu mi, bika mi e poti prakseri na den wèt di yu e memre mi fu hori. A fasi fa mi e tyari misrefi e sori taki mi abi moro frustan srefi leki den man di grani kaba, fu di mi gi yesi na den komando fu yu.” Te wi e teki ten fu „prakseri” den wet nanga den gronprakseri fu Gado, dan wi o man teki bosroiti di e sori taki wi koni èn taki wi e frustan sani bun. Sobun, te wi e meki den wet nanga den gronprakseri fu Gado yepi wi fu kon abi wan konsensi di e wroko bun, dan wi o kon ’de leki bigisma di lepi dorodoro leki Krestes’.​—Ef. 4:13.