DI MI leisi den buku disi, mi si taki den ben abi moi prenki di mi ben lobi. Dati meki yonguyongu kaba mi ben lobi den sani di mi ben leri fu Bijbel.

Di a Di Fu Tu Grontapufeti bigin, sma na India bigin firi en. Na a srefi ten mi heri libi ben kon bruya. Mi papa nanga mama prati èn te fu kaba den broko trow. Mi no ben man frustan fu san ede tu sma di mi ben lobi so te no ben wani de nanga makandra. Mi ben brokosaka èn mi ben firi leki nowan sma ben lobi mi. Mi ben de a wan-enkri pikin fu den èn mi ben abi trowstu nanga yepi fanowdu. Ma mi no ben kisi dati.

Mi nanga mi mama ben libi na ini Karachi, a mamafoto fu a distrikt pe wi ben tan. Wan dei Fred Hardaker, wan owru datra di ben de wan Yehovah Kotoigi, kon naki na wi doro. A ben de fu a srefi bribi leki a zendeling di ben gi mi famiri den buku. A aksi mi mama efu a ben wani studeri Bijbel. Mi mama no ben wani, ma a taigi a brada taki kande mi ben o wani studeri. A tra wiki kaba mi bigin studeri nanga Brada Hardaker.

 Baka wan tu wiki mi bigin go na den konmakandra di ben hori na a datra-oso fu Brada Hardaker. Sowan 12 owru sma ben kon makandra drape fu anbegi Yehovah. Den ben e meki mi firi bun èn den ben sorgu mi leki mi ben de den eigi pikin. Mi ben lobi fa den ben saka sidon na mi sei, so taki den ben kan luku mi te den ben e taki nanga mi. Den ben taki nanga mi leki trutru mati èn na dati mi ben abi fanowdu.

Syatu baka dati Brada Hardaker aksi mi fu go na ini a preikiwroko nanga en. A leri mi fa mi ben musu wroko nanga a gramofon, so taki wi ben kan prei syatu Bijbel-lezing gi den sma. Son ososma no ben lobi den lezing di wi ben prei fu di den ben hati den firi. Ma a preikiwroko ben gi mi prisiri. Mi ben de fayafaya fu prati den tru leri fu Bijbel nanga sma.

Fu di a legre fu Yapan ben kon moro krosibei fu India, meki den tiriman fu Ingrisikondre bigin muilek den Yehovah Kotoigi. Na ini yuli 1943 mi srefi bigin ondrofeni den problema disi. A driktoro fu mi skoro, di ben de wan fesiman fu wan Anglikan kerki, puru mi na skoro. A taigi mi mama taki fu di mi ben de wan Yehovah Kotoigi mi ben de wan takru eksempre gi den tra pikin. Mi mama ben skreki srefisrefi èn a taigi mi taki mi no ben mag bumui nanga den Kotoigi moro. Bakaten, a seni mi go na mi papa di ben tan na Peshawar, wan foto di ben de sowan 1370 kilometer go na noordsei fu pe mi ben tan. Fu di mi no ben kisi leri moro èn mi no ben miti nanga Kotoigi, meki mi bribi kon swaki.

Na ini 1947, mi drai go baka na Karachi fu suku wroko. Di mi ben drape mi go na a datra-oso fu Datra Hardaker. A ben breiti fu si mi trutru.

Fu di a ben denki taki mi ben siki, meki a aksi mi: „Dan san na a problema?”

Mi taigi en: „Datra Hardaker, a no mi gosontu na a problema, ma na mi bribi. Mi bribi kon swaki. Mi musu bigin studeri Bijbel baka.”

A aksi mi: „O ten yu wani bigin?”

Mi piki en: „Efu yu man, mi wani bigin nownowde.”

A neti dati wi bigin nanga a Bijbelstudie. Mi ben firi bun taki mi ben de baka nanga Yehovah en pipel. Mi mama ben wani tapu mi baka fu studeri nanga den Kotoigi, ma disi leisi nowan sma ben o tapu mi fu dini Yehovah. Tapu 31 augustus 1947, mi teki dopu. Heri esi, mi bigin dini leki gewoon pionier. Mi ben abi 17 yari na a ten dati.

A fosi presi pe mi go dini leki pionier na a foto Quetta. Fosi, Ingrisikondre ben abi wan srudatikampu na ini a foto disi. Na ini 1947 den prati India na tu. A wan pisi ben nen India èn a trawan ben nen Pakistan. * A sani disi meki taki sma fu difrenti kerki bigin du ogri nanga makandra. A bakapisi ben de taki sowan 14 milyun sma lowe go na tra presi. Den Moslim fu India go na Pakistan èn den Hindu nanga den Sikhsma fu Pakistan go na India. Na ini a muilek ten dati mi ben de na ini Karachi. Mi teki wan loko di ben span nanga sma fu go na Quetta. Bijna a heri pasi go na Quetta mi ben musu hori wan sani bun steifi soso fu no fadon go na dorosei.

Di mi ben de na ini Quetta mi miti George Singh, wan spesrutu pionier di ben abi sowan 25 yari. George gi mi wan owru baisigri di mi ben kan rèi (noso pusu) na ini a kontren di ben lai bergi. Moro furu mi ben e preiki mi wawan. Baka siksi mun mi ben abi 17 Bijbelstudie èn sonwan fu den tron Kotoigi. Wan fu den ben de wan legre-ofsiri di nen Sadiq Masih. A man disi ben yepi mi nanga George fu vertaal wan tu buku fu wi na ini Urdutongo di sma e taki na ini Pakistan. Bakaten Sadiq tron wan fayafaya preikiman fu a bun nyunsu.

Baka wan pisi ten mi drai go baka na Karachi pe mi dini makandra nanga Henry Finch nanga Harry Forrest. Den brada disi ben de nyun zendeling di ben go na Gileadskoro. Mi leri furu fu den brada disi. Wan leisi mi nanga Brada Finch go preiki na a noordsei fu Pakistan di ben lai nanga bergi. Na ini a kontren dati wi feni furu sma di e taki Urdutongo èn di ben wani sabi moro fu Bijbel. Tu yari baka  dati mi srefi kisi a grani fu go na Gileadskoro. Di mi drai go baka na Pakistan, dan son leisi mi ben e dini leki kring-opziener. Mi nanga ete dri zendeling brada ben e tan na ini wan zendeling-oso na Lahore.

A sari taki na ini 1954 den zendeling na ini Lahore no ben man feni en nanga makandra. Dati meki a bijkantoro ben musu seni wi go dini na tra presi. Fu di mi ben teki sei na ini a trobi, meki den brada gi mi seryusu rai. A ben hati mi èn mi ben abi a firi taki mi no ben de wan bun zendeling. Dati meki mi ben wani go dini na wan heri tra presi. Mi froisi go baka na Karachi èn baka dati mi go na Londen, na ini Ingrisikondre.

Na ini Londen mi ben de na ini wan gemeente nanga furu sma fu a Betelfamiri fu Londen. Pryce Hughes, a bijkantoro-opziener, teki en ten fu leri mi furu. Wan dei a fruteri mi taki Brada Joseph F. Rutherford di ben orga a preikiwroko na heri grontapu, gi en seryusu rai. Di Brada Hughes pruberi fu sori taki a no du wan fowtu sani, Brada Rutherford bari en. Mi no ben man bribi taki Brada Hughes ben e lafu di a fruteri mi a sani disi. A taki dati na ini a bigin a ben mandi. Ma bakaten a kon frustan taki a ben abi a rai dati fanowdu èn taki na so Yehovah ben sori taki a lobi en (Hebr. 12:6). Den sani di a taki naki mi ati èn a yepi mi fu bigin dini baka nanga prisiri.

Na a ten dati mi mama froisi kon tan na Londen èn a kisi Bijbelstudie fu Brada John E. Barr. Bakaten a brada disi tron wan memre fu a Tiri Skin. Mi mama go na fesi esi-esi èn a dopu na ini 1957. Bakaten, mi yere taki fosi mi papa dede, a ben kisi Bijbelstudie fu Yehovah Kotoigi tu.

Na ini 1958, mi trow nanga Lene wan sisa fu Deinsikondre di ben kon tan na ini Londen. A yari na en baka wi kisi wan meisje di wi kari Jane. En na a fosiwan fu den feifi pikin di wi kisi. Na ini Gemeente Fulham pe mi ben e dini, mi kisi moro grani tu. Ma bakaten, Lene kon siki èn wi ben musu froisi go tan na ini wan moro waran kondre. Dati meki na ini 1967, wi froisi go tan na ini a foto Adelaide na Australia.

Na ini a gemeente na ini Adelaide wi ben abi 12 owru salfu Kresten. Den ben de bun eksempre fu di den ben e du a preikiwroko fayafaya. A no teki langa fosi wi srefi bigin du a preikiwroko fayafaya tu.

 Na ini 1979 mi nanga Lene kisi a di fu feifi pikin fu wi, di wi kari Daniel. A ben abi a siki Downsyndroom * èn datra ben taki dati a no ben o libi langa. Te nanga now mi e sari te mi e prakseri fa wi ben e firi na a ten dati. Wi du ala san wi man fu sorgu bun gi Daniel, ma wi ben meki nofo ten tu gi den tra fo pikin fu wi. Son leisi Daniel ben kon blaw fu di a ben abi tu olo na ini en ati di ben meki taki a no ben kisi nofo zuurstof. Wi ben lon tyari en go na ati-oso te dati ben e pasa. Ma aladi a ben siki so, toku a ben koni èn a ben abi switifasi. A ben lobi Yehovah trutru. Te wi ben e begi leki osofamiri fosi wi nyan, a ben e fow den pikin anu fu en, saka en ede, dan a e taki „Amen!” Dan fosi a ben e nyan.

Di Daniel ben abi fo yari a kisi wan takru brudusiki di nen leukemie. A sani disi ben weri mi nanga Lene. Mi ben firi leki wan dei senwe ben o naki mi. Ma wan dei di wi ben e firi brokosaka srefisrefi, wi kring-opziener Brada Neville Bromwich, kon luku wi. A neti dati a krei nanga wi èn a brasa wi. Wi alamala ben e krei. Den sani di a taki trowstu wi trutru. A gowe na wan ten fu wán yuru musudei. Syatu baka dati Daniel dede. Dati ben de a moro sari sani di miti wi na ini wi libi. Toku wi horidoro èn wi abi a tranga bribi taki dede srefi no man prati Daniel fu a lobi fu Yehovah (Rom. 8:38, 39). Wi no man wakti fu si en baka te a kisi wan opobaka na ini a nyun grontapu di Gado o seti.​—Yoh. 5:28, 29.

Now mi e dini leki gemeente owruman aladi brudu naki mi tu leisi. Den sani di mi ondrofeni leri mi fu firi gi tra sma, spesrutu den wan di abi problema. Mi e pruberi fu no krutu den. Na presi fu dati mi e aksi misrefi: ’Na den sani di den ondrofeni na ini a libi meki taki den e firi èn denki so? Fa mi kan sori den taki mi e broko mi ede nanga den? Fa mi kan gi den deki-ati fu du san Yehovah wani?’ Leki owruman, mi lobi go luku den brada nanga sisa na den oso. Te mi e trowstu trawan nanga Gado Wortu, dan mi srefi e kisi trowstu nanga krakti baka.

Mi e firi neleki a psalm skrifiman di ben taki: „Di den prakseri fu mi di ben e trobi mi, ben kon hebi gi mi, dan na [Yehovah] ben e trowstu mi, so taki mi ben man prisiri baka” (Ps. 94:19). Yehovah yepi mi di mi kisi fu du nanga problema na ini a famiri, di sma ben wani tapu mi fu dini en, di mi meki wan fowtu èn di mi ben brokosaka srefisrefi. Yehovah ben de wan trutru Papa gi mi!