Yu ben sabi a sani disi?

O ten den lukuman di ben e ondrosuku den stari, go luku Yesus?

Na ini na Evangelietori fu Mateyus wi e leisi taki „lukuman fu owstusei di e ondrosuku den stari fu sabi san o pasa”, ben go luku Yesus, èn den ben tyari kado gi en (Mateyus 2:1-12). Bijbel no e taki omeni fu den lukuman, noso omeni fu den „towfruman” disi, go luku a yongu pikin Yesus. Furu sma e bribi taki na dri fu den man disi ben de, ma nowan enkri buweisi e sori taki dati de so. Bijbel no e taki tu fa den man disi ben nen.

Wan Bijbel e taki disi fu Mateyus 2:11: „Tra fasi leki fa sma e bribi, den lukuman no ben go luku Yesus na ini a nyanyan-baki, tapu a neti di a gebore èn di den skapuman go luku en. Den go luku Yesus wan tu mun baka dati, di a ben de wan ’pikin’ na ini en ’oso’” (New International Version Study Bible). Disi tru te wi e luku a komando di Herodes ben gi di a ben suku fu kiri Yesus, namku taki sma ben musu kiri ala den boi di no ben pasa tu yari ete na ini Betlehem nanga a heri kontren drape. Herodes ben suku fu kiri den boi di ben abi a yari dati, fu di „dati ben de a ten di den lukuman ben taigi en taki a pikin ben o gebore, di a ben aksi den finifini”.—Mateyus 2:16.

Efu den lukuman disi ben go luku Yesus tapu a dei di a gebore èn efu den ben tyari gowtu nanga tra diri kado gi en, dan Maria no ben o abi fu gi tu pikin fowru nomo leki ofrandi di a ben tyari Yesus go na a tempel 40 dei baka di a gebore (Lukas 2:22-24). Disi ben de wan seti na ini a Wet gi pôtisma di no ben man gi wan yongu manskapu leki ofrandi (Lefitikus 12:6-8). Ma a kan taki Yesus en famiri kisi den diri kado disi na a yoisti ten, fu di den ben kan gebroiki den sani dati fu pai den kostu fu man tan na ini Egepte.—Mateyus 2:13-15.

Fu san ede a teki fo dei fosi Yesus doro na a grebi fu Lasarus?

Te yu e luku en bun, Yesus srefi ben wani doro drape baka fo dei. Fu san ede wi kan taki dati? Luku a tori disi di skrifi na ini Yohanes kapitel 11.

Di Lasarus, wan mati fu Yesus di ben libi na Betania, ben kon siki seryusu, dan den sisa fu en seni boskopu gi Yesus (Vers 1-3). Na a ten dati, Yesus no ben de so fara fu Betania, fu di a ben musu waka sowan tu dei fu doro drape (Yohanes 10:40). Soleki fa a sori, Lasarus dede na a ten di Yesus kisi a boskopu. San Yesus du? A „tan tu dei na a presi pe a ben de”, èn baka dati a go na Betania (Vers 6, 7). Sobun, fu di a ben wakti tu dei èn a waka tu dei fu doro Betania, meki a doro a grebi fo dei baka di Lasarus dede.—Vers 17.

Wan pisi ten na fesi, Yesus ben gi tu sma wan opobaka kaba. Wán fu den sma kisi wan opobaka wantewante baka di a dede, èn a tra sma kisi wan opobaka kande tapu a srefi dei di a dede (Lukas 7:11-17; 8:49-55). Ma son sma ben aksi densrefi efu Yesus ben o man gi wan opobaka na wan sma di dede fo dei kaba èn di en skin bigin pori kaba (Vers 39). A moi fu si san wan buku e taki fu wan sani di furu Dyu ben bribi, namku taki „howpu no ben de moro gi wan sma di dede fo dei, fu di na a ten dati sma kan si krin taki a dedeskin e bigin pori kaba, èn taki a sili fu a sma di ben frei abra a skin dri dei langa, ben gowe kaba”.

Efu iniwan sma na a grebi ben tweifri efu Yesus ben man gi sma wan opobaka, dan now den ben o si nanga den eigi ai taki Yesus abi makti fu wiki den dedewan. Di Yesus tanapu na fesi na opo grebi, a bari: „Lasarus, kon na doro!” Ne „a man di ben dede, kon na doro” (Vers 43, 44). Furu sma e bribi taki a sili e tan na libi baka te wan sma dede. Ma a falsi bribi dati no e gi sma howpu, na presi fu dati, na opobaka na a trutru howpu gi den dedewan.—Esekièl 18:4; Yohanes 11:25.