San na a marki fu a libi?

FU SAN EDE A DE PRENSPARI FU KON SABI A PIKI TAPU NA AKSI DISI? Wán fu den moro prenspari sani di e gi libisma broko-ede, na a denki taki den e libi fu soso, èn taki a libi no abi marki. Ma wan sma di sabi krin san na a marki fu a libi, man sabi fa a musu handri na ini takru situwâsi, èn a man kisi ensrefi gaw. Viktor E. Frankl, wan datra di e yepi sma di abi senwe siki, na wán fu den sma di libi na ini a ten di a Nazi tirimakti kiri ipi-ipi sma, èn di pasa a ten dati libilibi. A ben skrifi: „Mi e prefuru fu taki dati nowan enkri sani na grontapu kan yepi wan sma bun na ini den moro takru situwâsi, leki te a sabi taki a abi wan marki na ini a libi.”

Ma furu sma e denki tra fasi fu a tori disi. Furu sma feni taki a de na ibriwan sma fu bosroiti san na a marki fu en libi. Na a tra sei, son sma di e bribi na evolutie-leri, e taki dati a libi no abi wan trutru marki.

Ma fu taki en leti, efu wi wani kon sabi san na a trutru marki fu a libi, dan wi musu leri dati fu a Sma di gi wi libi, namku Yehovah Gado. Poti prakseri na san en Wortu e taki fu a tori disi.

San Bijbel e taki?

Bijbel e taki dati Yehovah Gado ben abi wan spesrutu marki gi a man nanga na uma di a meki. Yehovah ben gi wi fosi papa nanga mama a komando disi:

Genesis 1:28. „Meki pikin èn kon furu, teleki unu kon lai na grontapu, èn basi ala sani na grontapu. Basi den fisi na ini se, den meti di man frei na loktu, nanga ibri sortu meti di e kroipi na gron.”

A marki di Gado ben abi na prakseri gi Adam, Eva, nanga den pikin fu den, na taki den ben musu meki a heri grontapu tron wan paradijs. Gado no ben wani taki libisma kon owru èn taki den dede. A no ben wani tu taki libisma pori a grontapu. Ma fu di wi fosi papa nanga mama no teki wan bun bosroiti, meki den tyari sondu nanga dede kon gi wi (Genesis 3:2-6; Romesma 5:12). Aladi dati de so, toku den sani di Yehovah abi na prakseri gi libisma, no kenki. Heri esi grontapu sa de wan paradijs.—Yesaya 55:10, 11.

Yehovah gi wi a koni èn a meki wi skin na so wan fasi, taki wi man du a wani fu en. A no meki wi fu libi sondro a tiri fu en. Luku na ini den bijbeltekst di e kon san Gado wani taki wi du.

Preikiman 12:13. „Now di sma yere ala sani, dan a bosroiti fu a tori na disi: Abi frede gi a tru Gado èn hori yusrefi na den komando fu en. Bika disi na a plekti fu libisma.”

Mika 6:8. „San Yehovah e aksi fu yu baka, leki fu du san reti èn fu lobi bunfasi èn fu sori sakafasi te yu e waka nanga yu Gado?”

Mateyus 22:37-39. „’Yu musu lobi Yehovah yu Gado nanga yu heri ati, nanga yu heri sili, èn nanga yu heri frustan.’ Disi na a fosi èn a moro bigi komando. A di fu tu komando de leki a wan disi, èn dati na: ’Yu musu lobi tra sma leki fa yu lobi yusrefi’.”

Den sani di Bijbel e taki e gi wi wan trutru korostu firi

Efu wi wani taki wan masyin di e wroko na wan dangra fasi, drai bun, dan wi musu gebroiki en gi san a meki èn na a fasi fa a sma di meki en, abi na prakseri. Na so a de tu taki efu wi no wani kisi takru bakapisi, dan wi musu libi na a fasi fa a Sma di meki wi abi na prakseri. Wan tu fu den takru bakapisi di wi kan kisi, na taki wi kan pori a matifasi di wi abi nanga Gado, wi kan pori a  fasi fa wi e denki, wi kan lasi-ati, noso wi kan kisi mankeri èn wi kan kon siki. Te wi sabi san Gado abi na prakseri gi wi, dan wi kan kisi wan korostu firi. Luku fa dati kan yepi wi na ini difrenti situwâsi di wi o taki fu den now.

A moro prenspari sani na ini a libi fu furu sma na ini a ten disi, na fu kisi moro gudu. Ma Bijbel e gi a warskow disi: „Den sma di wani kon gudu nomonomo e kisi tesi èn den e go na ini wan trapu; den e kisi wan lo dondon èn takru lostu.”—1 Timoteyus 6:9, 10.

Ma den sma di e leri fu lobi Gado na presi fu moni, e kon sabi san a wani taki fu de tevrede (1 Timoteyus 6:7, 8). Den e kon frustan fu san ede a de prenspari fu wroko tranga, èn den e kon frustan taki den abi a frantwortu fu sorgu gi den sani di den abi fanowdu (Efeisesma 4:28). Ma den e poti seryusu prakseri tu na a warskow fu Yesus, namku taki: „Nowan sma kan dini tu masra leki srafu; bika a sa teige a wan masra èn lobi a trawan, noso a sa tan nanga a wan èn wisiwasi a trawan. Unu no kan dini Gado èn dini Gudu na a srefi ten.”—Mateyus 6:24.

Sma di lobi Gado no e si a wroko di den abi leki a moro prenspari sani na ini den libi èn den no e feti fu kon gudu. Ma na presi fu dati, a moro prenspari sani gi den libi na fu du a wani fu Gado. Den sabi taki te den e du dati, Yehovah Gado sa sorgu gi den. Fu taki en leti, Yehovah e si en leki wan plekti fu du dati.—Mateyus 6:25-33.

A fasi fa furu sma e handri nanga trawan, e sori taki den e suku den eigi wini, fosi den e denki a bun fu trawan. Na ini a ten disi vrede no de na grontapu, fu di a de so nofo tron taki furu sma ’lobi densrefi nomo, . . . èn den no lobi trawan’ (2 Timoteyus 3:2, 3). Te wan sma no e du san den sma dati fruwakti fu en, noso te wan sma no e agri nanga den, dan den ’e mandi, den e atibron, den e bari èn den e kosi trawan’ (Efeisesma 4:31). Fu di so wan sma no man hori ensrefi meki a „e tyari trobi kon”, na presi taki a abi wan korostu firi.—Odo 15:18.

Ma tra fasi leki dati, sma di e gi yesi na a komando fu Gado di e taki dati den musu lobi tra sma leki fa den lobi densrefi, ’e du bun gi makandra, den e sori sari-ati na wan lobi fasi, èn den e gi makandra pardon’ (Efeisesma 4:32; Kolosesma 3:13). Srefi te tra sma no e handri na wan switi fasi nanga den, toku den e du muiti fu waka baka Yesus, di ’no ben e kosi den sma baka’ di ben e kosi en (1 Petrus 2:23). Neleki Yesus, den e frustan taki den o de koloku trutru te den e du bun gi trawan, srefi te den e du bun gi sma di no abi warderi gi san den e du gi den (Mateyus 20:25-28; Yohanes 13:14, 15; Tori fu den Apostel 20:35). Yehovah Gado e gi a santa yeye fu en na sma di e du muiti fu de leki en Manpikin, èn a yeye disi e meki den firi korostu trutru.—Galasiasma 5:22.

Ma fa a fasi fa yu e denki fu a tamara, kan abi krakti tapu a korostu firi di yu abi?

[Prenspari pisi na tapu bladzijde 6]

Wan sma musu abi wan spesrutu marki na ini en libi

[Prenki na tapu bladzijde 7]

Yesus e leri wi fa wi kan abi wan korostu firi