Oiti a grontapu fu wi sa kisi pori?

OITI yu aksi yusrefi ’San o pasa nanga a grontapu fu wi na ini a ten di e kon?’ Fu di furu sma e si san e pasa nanga a moi grontapu fu wi, meki den e bribi taki kande grontapu o pori gowe te fu kaba.

A no de fu taki dati sma e pori grontapu na ini a ten disi, fu di den e pori den warti sani na en tapu. Den e pori a watra, den busi, nanga a loktu. Boiti dati, son sabiman e warskow taki wan bigi ston ben kan frei naki grontapu, wan stari ben kan sutu panya, noso a son ben kan kaba skèin. A sani dati ben o meki taki grontapu nanga ala libisani na en tapu kisi pori.

Sabiman e bribi taki safrisafri, kande baka milyardmilyard yari, grontapu sa kon pori so te, taki libisma no o man libi moro na en tapu. Wan buku e taki dati disi abi fu du nanga „a pori di sani e pori te sma no sorgu den bun” (Encyclopædia Britannica).

Koloku taki Bijbel e gi wi a dyaranti taki Yehovah Gado no sa gi pasi taki grontapu kisi pori, noso taki libisani no o man libi moro na en tapu. Leki Mekiman, a abi „bigi krakti pasa marki” èn fu di a krakti fu en no abi kaba, meki a man sorgu taki hemel nanga grontapu e tan fu têgo (Yesaya 40:26). Dati meki yu kan bribi den wortu disi: „[Gado] seti grontapu na tapu den fasti presi fu en; te ten di no skotu, noso fu têgo, a no sa degedege.” „Prèise en, yu son nanga yu mun. Prèise en, ala un stari di e gi leti. . . . Bika ensrefi ben gi a komando, èn den kon de. Èn a e meki den tan fu têgo.”—Psalm 104:5; 148:3-6.

San Gado wani gi grontapu?

Noiti Gado ben wani taki sma pori èn doti grontapu, soleki fa dati e pasa na ini a ten disi. Na presi fu dati, Gado ben meki a fosi man nanga uma, Adam nanga Eva, èn a poti den na ini wan moi dyari. A no de fu taki dati a Paradijs pe den ben e tan no ben o tan moi efu den no ben o sorgu en. Gado ben taigi Adam nanga Eva „fu wroko a gron èn fu sorgu a dyari” (Genesis 2:8, 9, 15). Dati na trutru  wan switi wroko di Gado ben gi a fosi papa nanga mama fu wi di ben de volmaakti fosi!

Ma a sorgu di sma ben musu sorgu a dyari fu Eden no ben de a wani-enkri sani di Gado ben wani gi grontapu. A ben wani taki heri grontapu ben musu tron wan paradijs. Dati meki Gado ben gi Adam nanga Eva a komando disi: „Meki pikin èn kon furu, teleki unu kon lai na grontapu, èn basi ala sani na grontapu. Basi den fisi na ini se, den meti di man frei na loktu, nanga ibri sortu meti di e kroipi na gron.”—Genesis 1:28.

A de wan sari sani taki wan engel di ben abi heimemre, èn di sma kon sabi leki Satan, gens Gado. Na engel disi ben wani nomonomo taki Adam nanga Eva anbegi en. Satan gebroiki wan sneki fu taki nanga Adam èn nanga Eva, èn a kori den fu opo densrefi teige a tiri fu Gado (Genesis 3:1-6; Openbaring 12:9). A ben musu fu hati wi Mekiman taki den sma disi di ben denki densrefi nomo, no ben abi warderi! Ma aladi den opo densrefi teige Yehovah Gado, toku den sani di A ben abi na prakseri gi grontapu no kenki. Yehovah e taki: „A wortu di e komoto na mi mofo . . . no sa drai kon baka na mi sondro fu du wan sani, ma seiker a sa du a sani di mi wani, èn trutru a sa du a sani di mi seni en fu go du.”—Yesaya 55:11.

Yehovah ben abi bun reide fu gi pasi taki Satan tan opo ensrefi te na a dei fu tide. Na ini a pisi ten dati, libisma kisi na okasi fu pruberi fu tiri densrefi na difrenti fasi. Èn aladi Satan gi sma deki-ati fu tiri densrefi sondro a yepi fu Gado, toku a kon na krin taki sani no e waka bun kwetikweti te sma e du dati. *—Yeremia 10:23.

Ma a bun sei fu a tori, na taki na ini den dusundusun yari di pasa, Gado blesi spesrutu opregtisma. A sorgu tu taki wi kan leisi na ini Bijbel san na den bakapisi te sma e gi yesi na Gado, noso te den e weigri fu teki a tiri fu en. Boiti dati, Yehovah du tumusi moi sani so taki wi kan kisi wini na ini a ten di e kon. Fu di Yehovah lobi libisma, meki a seni wan Frulusuman gi libisma. Iya, a seni en lobi Manpikin, Yesus Krestes, fu leri wi san na a moro bun fasi fu libi, èn fu dede gi wi (Yohanes 3:16). Fu di Yesus no ben frudini en fu dede, meki a ben fiti taki Gado gebroiki a dede fu en fu bai baka san Adam nanga Eva ben lasi, namku a howpu fu libi fu têgo na ini wan paradijs grontapu. * Fu meki a sani dati kon tru, Yehovah Gado seti wan tirimakti na hemel fu tiri ala libisma, èn a poti en Manpikin, Yesus Krestes di kisi wan opobaka, leki Kownu fu a Kownukondre dati. A tumusi moi seti disi e gi wi a dyaranti taki den sani di Gado wani gi grontapu sa kon tru.—Mateyus 6:9, 10.

Sobun, yu kan abi a frutrow taki den kefalek moi pramisi disi di skrifi na ini Bijbel, sa kon tru: „Den ogri sma srefi sa koti puru, ma den wan di e howpu tapu Yehovah na den wan di sa abi grontapu leki a gudu fu den. Na den regtfardikisma srefi sa abi grontapu leki a gudu fu den, èn den sa libi na tapu fu têgo.” „’Luku! A tenti fu Gado de na den libisma, èn Gado o tan nanga den, èn den o de en pipel. Gado srefi o de nanga den. A o figi ala watra puru na den ai, èn dede no sa de moro; nowan sari, noso krei, noso pen no sa de moro. Den fositen sani pasa gowe.’ Ne a Sma di ben e sidon na tapu a kownusturu taki: ’Luku! Mi e meki ala sani kon nyun.’”—Psalm 37:9, 29; Openbaring 21:3-5.

Den tekst na ini Bijbel e kruderi nanga makandra

Ma kande son sma e aksi densrefi: ’Fa den tekst di kari na tapusei e kruderi nanga tra tekst di e sori taki grontapu o kisi pori?’ Meki wi go luku wan tu eksempre. Disi sa tyari kon na krin taki den tekst na ini Bijbel trutru e kruderi nanga makandra.

 Langa ten bifo sabiman kon si taki ala sani ’kan pori efu sma no e sorgu den bun’, wan psalm skrifiman ben skrifi: „Yu [di de Gado] ben seti a fondamenti fu grontapu srefi, èn na yu anu meki den hemel. Den sa lasi gowe, ma yu sa tan tanapu; èn leki wan pisi krosi den alamala sa pori gowe. Neleki krosi yu sa kenki den, èn den sa kon na wan kaba te a ten fu den doro. Ma yu no kenki, èn den yari fu yu no o kon na wan kaba.”—Psalm 102:25-27.

A psalm skrifiman no skrifi den wortu disi fu sori taki Gado no wani taki grontapu musu tan fu têgo. Na presi fu dati, a ben e sori taki Gado e difrenti fu ala den sani di a meki, fu di Gado de fu têgo, ma den sani di a meki kan pori te fu kaba. Efu Gado no ben o gebroiki en krakti fu tan sorgu doronomo gi ala sani na hemel nanga grontapu, dan ala sani ben o kon bruya, èn te fu kaba den ben o pori. Na dati ben o pasa tu nanga a son nanga ala tra planeiti di e meki taki grontapu e tan tapu a yoisti presi, taki wi e kisi leti, èn taki libisani man tan na libi. Sobun, efu nowan sma ben o sorgu gi a grontapu fu wi, dan a ben o „pori gowe” te fu kaba.

Tra tekst de tu na ini Bijbel di gersi leki den no e kruderi nanga san Gado wani gi grontapu. Fu eksempre, Bijbel e taki fu hemel nanga grontapu di sa „pasa gowe” (Openbaring 21:1). Wi kan de seiker taki den wortu dati no de kontrari a pramisi disi di Yesus ben gi: „Koloku fu den safri-ati sma, bika den o kisi grontapu” (Mateyus 5:5). Ma te Bijbel e taki dati hemel nanga grontapu o „pasa gowe”, dan san dati wani taki?

Nofo tron te Bijbel e taki fu „grontapu”, dan dati abi fu du nanga libisma. Fu eksempre, luku a tekst disi: „Da heri grontapu ben abi wan tongo, èn wan fasi fu taki” (Genesis 11:1; Da Bijbel na ini Sranantongo). A de krin taki a wortu „grontapu” na ini a tekst disi abi fu du nanga den sma di ben e libi na grontapu. Wan tra tekst, na Psalm 96:1. Luku fa a skrifi na ini a King James Version: „Singi gi MASRA, heri grontapu.” A de krin taki na ini a tekst disi èn na ini furu tra tekst a wortu „grontapu” abi fu du nanga libisma.—Psalm 96:13.

Son leisi, Bijbel e agersi den tirimakti fu grontapu nanga hemel, noso nanga den stari nanga planeiti na hemel. Fu eksempre, Bijbel e agersi den ogri-ati tiriman fu Babilon nanga stari, fu di den ben e hei densrefi gi den sma na den lontu (Yesaya 14:12-14). Soleki fa Bijbel ben taki na fesi, dan den agersi „hemel” fu den Babilonsma di e prenki den tiriman fu den, èn sosrefi „a grontapu” fu den di e prenki den bakaman fu a tirimakti dati, ben kisi pori na ini 539 bifo Krestes (Yesaya 51:6). Disi ben gi den Dyu di ben abi berow, na okasi fu drai go baka na Yerusalem pe „nyun hemel”, noso wan nyun tirimakti ben o tiri „a nyun grontapu”, noso wan libimakandra fu regtfardikisma.—Yesaya 65:17.

Soleki fa a sori, dan te Bijbel e taki dati hemel nanga grontapu o „pasa gowe” dan dati abi fu du nanga den kruka tiriman fu a ten disi èn nanga den ogrisma di e horibaka gi den (2 Petrus 3:7). Dati sa opo a pasi gi a nyun hemel tirimakti fu Gado fu tyari blesi kon gi den regtfardikisma, fu di „wi e fruwakti nyun hemel nanga wan nyun grontapu, soleki fa a ben pramisi, èn drape regtfardikifasi o tan”.—2 Petrus 3:13.

Sobun, yu kan bribi a pramisi di Gado gi taki a grontapu fu wi sa tan fu têgo. Boiti dati, Bijbel e sori san yu kan du fu man ondrofeni a tumusi moi ten dati te heri grontapu sa tron wan paradijs. Yesus ben taki: „Efu sma wani kisi têgo libi, dan den musu tan leri sabi yu, a wan-enkri tru Gado, èn a sma di yu seni kon, Yesus Krestes” (Yohanes 17:3). Fu san ede yu no e du muiti fu kon sabi san Bijbel e taki fu a tamara fu grontapu èn fu a libisma famiri? Yehovah Kotoigi na ini a birti fu yu sa de klariklari fu yepi yu.

[Futuwortu]

[Prenspari pisi na tapu bladzijde 12]

Bijbel e pramisi taki a grontapu fu wi sa tan fu têgo

[Sma di abi a reti fu den prenki na tapu bladzijde 10]

Background globe: NASA/​The Visible Earth (http://visibleearth.nasa.gov/); polar bear: © Bryan and Cherry Alexander Photography