A koni fu Gado de fu si na den sani di a meki

„En na a Sma di e leri wi moro sani leki san a e leri den meti fu grontapu, èn a e meki taki wi e kon koni moro den meti di e frei na hemel srefi.”—YOB 35:11.

FOWRU man du kefalek moi sani. Sma di e meki opolani e fruwondru fu si o bun fowru man frei. Son fowru e frei dusundusun kilometer abra bigi se, èn aladi nowan sani na se e sori den a pasi, toku den e doro soifri pe den ben musu go.

Wan tra tumusi moi sani di fowru man du, na taki den man gi makandra boskopu, èn fu man du dati, den e meki spesrutu babari èn den e singi spesrutu singi. Disi na ete wan sani di e sori taki a Mekiman koni. Luku wan tu eksempre.

A fasi fa fowru e gi makandra boskopu

Son fowru e gi makandra boskopu srefi te den de na ini na eksi ete. Fu eksempre, wan sortu uma fowru e meki aiti eksi, namku, wán eksi ibri dei. Efu a pikin fowru na ini ibriwan fu den eksi ben o gro na a srefi fasi leki den trawan, dan baka aiti dei, ibriwan fu den eksi ben o broko wán dei baka a trawan. Efu dati ben o pasa, dan a mamafowru ben o abi seibi pikin fowru di bigi pikinmoro wán wiki. A ben o de wan problema gi a mamafowru fu sorgu gi den pikin fowru disi di e lonlon na ala sei, aladi a musu sidon na tapu a tra eksi di no broko ete. Na presi fu dati, ala aiti pikin fowru e komoto na ini na eksi a srefi dei, na ini wan pisi ten fu siksi yuru. Fa dati kan? Soleki fa sabiman e taki, dan wán prenspari reide, na taki te den pikin fowru de na ini den eksi ete, dan den e gi makandra boskopu. Na wan sortu fasi den e meki mofo fu komoto na ini den eksi pikinmoro na a srefi pisi ten.

Te fowru kon bigi, dan nofo tron na a manfowru e singi. A e singi spesrutu te a ten doro fu meki pikin. A e du dati fu meki tra manfowru sabi taki wan spesrutu pisi kontren na fu en, noso a e du dati fu hari umafowru. Ala den dusundusun sortu fowru abi den eigi fasi fa den e bari noso e singi.  Na wan agersi fasi, den fowru disi e taki nanga makandra, èn disi e yepi den umafowru fu kon sabi sortu manfowru na a srefi sortu fowru leki den.

Nofo tron, fowru e singi fruku mamanten, noso te son dongo, èn a no fu soso den e du dati. Na den pisi ten dati, winti no e wai tranga èn furu tra babari no de fu yere. Sabiman kon si taki te fowru e singi te mamanten èn te mofoneti, dan dati de fu yere sowan 20 tron moro bun leki te den e singi te brekten.

Aladi na den manfowru e singi moro furu, toku manfowru nanga umafowru e meki difrenti babari, noso den e bari syatu difrenti leisi baka makandra, èn ibriwan fu den babari disi wani taki wan tra sani. Fu eksempre, wan pikin fowru na ini Europa, e meki neigi difrenti sortu babari. A fowru disi e meki wán sortu babari fu warskow den tra fowru taki wan fowru na loktu e onti. Ma a e meki wan heri tra babari fu warskow taki wan meti na gron e onti den.

Wan moro bun presenti

A no de fu taki, dati a koni di Yehovah poti na ini fowru, na wan kefalek moi sani. Ma a fasi fa libisma e taki nanga makandra, moi omeni tron moro a fasi fa fowru e gi makandra boskopu. Gado meki taki libisma ’kon moro koni leki den meti di e frei na hemel’, na so Yob 35:11 e taki. Libisma wawan kan meki trawan kon sabi den difrenti prakseri fu den, èn den e du dati nanga yepi fu den sten, noso nanga yepi fu den anu.

Tra fasi leki meti, libisma beibi meki na so wan fasi taki den man leri taki muilek tongo. Wan tijdschrift di sma kan leisi na tapu Internet e taki: „Nyofi pikin e leri wan tongo awinsi a papa nanga a mama fu den no e taki langalanga nanga den. Dofu pikin e feni den eigi fasi fu taki nanga trawan, fu di den e meki sani nanga den anu èn nanga den fesi, awinsi sma na oso no e taki na a fasi dati nanga den” (American Scientist).

Soleki fa wi si, dan wi man taki nanga trawan fu fruteri den fa wi e denki èn fa wi e firi, èn wi man gebroiki wi anu nanga wi fesi tu fu tyari den sani dati kon na krin. A sani disi na trutru wan tumusi moi presenti di Gado gi wi. Ma wan moro moi presenti di Gado gi wi, na taki wi man taki nanga en na ini begi. Fu taki en leti, Yehovah Gado e gi wi a kari fu taki nanga en. Gado Wortu e taki: „No broko un ede nanga nowan sani, ma begi Gado ala san unu wani, èn du dati fayafaya sosrefi, èn taki en tangi tu.”—Filipisma 4:6.

Te wi musu teki muilek bosroiti, dan Yehovah wani taki wi musu kisi wini fu den someni difrenti tori di a meki sma skrifi na ini Bijbel. Yehovah sa yepi wi tu fu kon sabi fa wi musu fiti den rai di wi e feni na ini a Wortu fu en. A Bijbel skrifiman Yakobus e taki: „Efu wan fu unu e mankeri koni, meki a tan aksi Gado, bika a e gi ala sma nanga en heri ati èn sondro fu suku fowtu na den; Gado sa gi a sma dati koni.”—Yakobus 1:5.

Sortu krakti disi abi na yu tapu?

Sortu krakti a abi na yu tapu te yu e yere fa wan fowru e singi so moi, noso te yu e yere fa wan pikin-nengre e taki en fosi wortu? Yu e si a koni fu Gado na den sani di a meki?

Baka di a psalm skrifiman David denki dipi fu a fasi fa a ben meki, dan a taigi Gado: „Mi sa prèise yu fu di yu meki mi na wan tumusi wondru fasi di e gi mi frede. Den wroko fu yu na wondruwroko, dati mi sili sabi heri bun” (Psalm 139:14). Te yu e denki dipi fu a koni fu Gado di de fu si na den sani di a meki, èn te yu e kisi warderi gi den sani dati, dan a no de fu taki dati yu sa kisi moro frutrow taki a man gi yu bun rai.

[Prenspari pisi na tapu bladzijde 5]

A taki di wi man taki, na wan presenti fu Gado

[Sma di abi a reti fu a prenki na tapu bladzijde 4]

© Dayton Wild/Visuals Unlimited