A tori fu Noa nanga a Frudu na wan tru tori

YU E angri fu libi na ini wan moro bun grontapu pe ala sma e libi na ini vrede nanga makandra? Noso yu e angri fu libi na ini wan grontapu pe orloku nanga ogridu no de, èn pe sma no e kwinsi trawan? Efu dati de so, dan yu kan kisi deki-ati fu wan owruten tori di kande yu sabi heri bun. Dati na a tori fu Noa, wan trutru bun man. Noa ben bow wan ark di kibri en nanga en osofamiri, di wan Frudu di sungu heri grontapu kiri den ogrisma.

Wan tu tori nomo de di sma na heri grontapu sabi. Na ini a Bijbel buku Genesis kapitel 6 te go miti kapitel 9, wi e feni a tori fu Noa, èn a Koran èn sosrefi anansitori fu someni difrenti pipel na heri grontapu, e taki fu a tori disi tu. A Frudu ben kon trutru? Noso a tori disi na soso wan anansitori di e gi sma deki-ati fu du san bun? Hondrohondro yari kaba, sabiman fu kerkitori nanga tra sabiman haritaki fu na aksi disi. Ma Bijbel, a Wortu fu Gado, e sori krin taki a tori fu Noa a no wan anansitori. Luku fu san ede disi de so:

A tori na ini Genesis e taki krin na ini sortu yari, sortu mun, èn na sortu dei a Frudu ben bigin. Bijbel e taki tu o ten na ark go fasi, pe a go fasi, èn o ten a watra hari gowe baka. Bijbel e taki soifri tu fa na ark ben meki, o langa, o bradi, o hei a ben de, èn nanga sortu udu a ben meki. Tra fasi leki Bijbel, anansitori no e taki finifini fa sani pasa.

Tu bijbeltori di abi fu du nanga a famirilin fu sma, e buweisi taki Noa ben de trutru (1 Kroniki 1:4; Lukas 3:36). Esra nanga Lukas di skrifi den tori disi ben ondrusuku sani finifini. Lukas ben sori taki Noa ben de na ini a famirilin fu Yesus Krestes.

Den profeti Yesaya nanga Esekièl, èn den Kresten apostel Paulus nanga Petrus, ben skrifi sani di abi fu du nanga Noa noso nanga a Frudu.—Yesaya 54:9; Esekièl 14:14, 20; Hebrewsma 11:7; 1 Petrus 3:19, 20; 2 Petrus 2:5.

Disi na san Yesus Krestes ben taki fu a Frudu: „Neleki fa a ben de na ini a ten fu Noa, na so a o de tu na ini a ten fu a Manpikin fu libisma: den ben e nyan, den ben e dringi, man ben e teki uma fu trow, uma ben e trow nanga man, teleki a dei doro di Noa go na ini na ark èn a frudu kon èn a kiri den alamala” (Lukas 17:26, 27). Efu a Frudu no ben kon, dan a ben o de fu soso taki Yesus ben taki fu „a ten fu a Manpikin fu libisma”.

Na apostel Petrus ben skrifi na fesi taki „spotuman” ben o de di ben o spotu nanga den sani di Bijbel e taki. Petrus ben skrifi: ’Fu espresi den no wani sabi a sani disi, namku taki . . . a grontapu fu a ten fu Noa ben kisi pori di watra sungu en’. A de so taki wi no abi fu poti prakseri na „a sani disi”? Kwetikweti! Petrus ben taki moro fara: „Gado libi den hemel nanga a grontapu fu now fu bron den nanga faya, èn a e libi den teleki a dei te a o krutu èn pori den ogrisma.”—2 Petrus 3:3-7.

Gado o pori ogrisma agen, èn disi leisi, sma o de tu di o tan na libi. Te wi e teki na eksempre fu Noa, dan kande wi o de na mindri den regtfardikiwan di sa pasa go na ini wan moro bun grontapu.