Yu e hori a wani fu Gado na prakseri te yu e seti sani gi a tamara?

NA INI den bigi busi na a westsei fu Noord-Amerika, wan wetiweti singifowru [Nucifraga columbiana] gwenti fu frei suku nyanyan. Ibri yari, a pikin fowru disi e tyari sowan 33.000 siri kon na wán, di a e kibri na sowan 2500 difrenti presi. Na so a fowru disi e sreka ensrefi gi a kowru pisi ten fu a yari. Te wi e luku a fasi fa a fowru disi e kibri nyanyan gi a ten di e kon, dan a no de fu taki dati a ’abi koni di poti na ini en’.—Odo 30:24.

Ma libisma man du wan moro koni sani srefi. Fu ala den libisani di Yehovah meki na grontapu, na libisma wawan man leri fu den sani di pasa, èn na den wawan kan hori den sani disi na prakseri te den e seti sani gi a tamara. A koni Kownu Salomo ben taki: „Furu sani de di libisma e prakseri fu du.”—Odo 19:21.

Ma aladi libisma man teki leri fu sani di pasa, toku den no de seiker fa sani sa waka te den e seti sani gi a ten di e kon. Fu eksempre, kande yu e seti sani gi tamara nanga a prakseri taki a son o opo èn taki yu sa de na libi ete. Yu sabi seiker taki a son o opo, ma yu no de seiker efu yu o de na libi. Dati meki a Bijbel skrifiman Yakobus ben abi leti di a taki: „Unu no sabi fa a libi fu unu sa de tamara.”—Yakobus 4:13, 14.

Yehovah Gado no abi den sortu problema dati. A sabi „na a bigin san sa de a kaba”. A wani fu en sa kon tru, awinsi san e pasa. A e taki: „San misrefi bosroiti sa kon tru, èn ala san mi feni bun, mi sa du” (Yesaya 46:10). Ma san e pasa te den sani di libisma abi na prakseri fu du no e kruderi nanga a wani fu Gado?

Te libisma e seti sani sondro fu hori a wani fu Gado na prakseri

Sowan 4000 yari pasa, sma ben e bow a Toren fu Babel, fu di den no ben wani taki libisma musu panya go na ala sei fu grontapu. Den ben taki: „Kon! Meki wi bow wan foto gi wisrefi nanga wan toren di e doro te na hemel èn meki wi gi wisrefi biginen. Dan wi no abi fu go libi na tra presi fu grontapu.”—Genesis 11:4.

Ma Gado ben abi wan heri tra sani na prakseri gi grontapu. A ben gi Noa nanga den manpikin fu en a komando disi: „Meki pikin èn kon furu, teleki unu kon lai na grontapu” (Genesis  9:1). Di a pipel fu Babel ben e suku fu du san den ben abi na prakseri, dan san Gado du? A bruya a tongo fu den, so taki den no ben man frustan makandra. San ben de a bakapisi? „Na so Yehovah panya den go na ala sei fu grontapu” (Genesis 11:5-8). Den sma di ben e bow Babel ben musu leri wan prenspari sani. Te den sani di libisma abi na prakseri fu du no e kruderi nanga a wani fu Gado, dan „na a wani fu Yehovah sa kon tru” (Odo 19:21). Yu e teki leri fu den sani dati di pasa na ini owruten?

Wan guduman di no ben handri nanga koni

Kande yu no e seti sani fu bow wan toren, ma furu sma na ini a ten disi e meki muiti fu kon abi furu moni na bangi èn fu kon kisi furu gudu, so taki den kan abi wan switi libi te den go nanga pensyun. Fu taki en leti, ala sma wani nyan bun fu a wroko fu den. Salomo ben skrifi: „Ibri sma musu nyan èn dringi èn si a bun fu ala en tranga wroko. Disi na a presenti fu Gado.”—Preikiman 3:13.

Wi o abi fu gi frantwortu na Yehovah fu a fasi fa wi e gebroiki a presenti disi. Sowan 2000 yari pasa, Yesus gebroiki wan agersitori fu meki den disipel fu en kon frustan a tori disi. A ben taki: „A gron fu wan guduman ben gi furu nyanyan. Fu dati ede a bigin prakseri na ensrefi: ’San mi o du, now di mi no abi wan presi fu poti a nyanyan fu a gron?’ Dati meki a taki: ’Mi o du disi: Mi o broko den maksin fu mi puru, dan mi o bow moro bigiwan èn drape mi o poti ala mi aleisi nanga ala den bun sani fu mi; dan mi o taki na misrefi: „We, yu poti wan lo bun sani na wan sei gi furu yari; teki en safrisafri, nyan, dringi èn meki prisiri”’” (Lukas 12:16-19). A gersi leki a sani di a guduman ben abi na prakseri fu du ben de wan bun sani, a no so? Neleki a pikin fowru di wi ben kari na a bigin, a man na ini na agersitori ben e seti sani gi a tamara fu en.

Ma a denki fu a man no ben bun. Yesus e taki moro fara: „Ma Gado taigi en: ’Yu donman, a neti disi srefi yu o lasi yu libi. Dan suma o kisi den sani di yu tyari kon na wan?’” (Lukas 12:20) Soleki fa wi ben si kaba, dan Salomo ben taki dati a wroko di wi e wroko èn a wini di wi e kisi fu dati, na presenti fu Gado. A de so taki Yesus ben sori taki a sani disi no tru? Nôno. San Yesus ben wani taki? A ben taki: „Na so a sa waka nanga a sma di wani moro nanga moro gudu, ma di no gudu na ini Gado ai.”—Lukas 12:21.

Yesus ben e leri den arkiman fu en taki Yehovah wani taki wi musu hori En na prakseri te wi e seti sani gi a tamara. A guduman ben o gudu ini Gado ai, efu a ben e suku fu kon moro krosibei na Gado, èn efu a ben e suku fu sori moro  koni nanga lobi. Den sani di a man dati taki e sori taki a no ben e prakseri den sani dati srefisrefi. A no ben e prakseri tu fu libi pikinso nyanyan na ini a gron fu en so taki den pôtiwan ben kan go piki dati. Èn wan tra sani di a no ben e prakseri, na fu tyari ofrandi gi Yehovah leki presenti. A man disi no ben e du den sani di Gado feni bun. A ben e suku soso en eigi bun.

Yu no si taki furu sma na ini a ten disi de leki a guduman na ini na agersitori fu Yesus? Iya, furu sma na ini a ten disi abi den srefi sortu marki na ini a libi. Awinsi wi gudu noso pôti, toku a kan pasa makriki taki wi e bigin feti baka gudu. Te wi e du dati, dan wi sa bigin broko wi ede nanga den problema fu na aladei libi, èn te fu kaba wi no sa poti prakseri moro na a anbegi fu wi. San yu kan du fu sorgu taki yu no e fadon na ini a trapu disi?

San na a yoisti fasi fu libi?

A kan taki tra fasi leki a guduman na ini na agersitori fu Yesus, yu abi moni problema. Ma efu yu trow, dan a no de fu taki dati yu e seti sani fu sorgu gi den sani di yu osofamiri abi fanowdu, èn efu a kan, dan yu wani taki den pikin fu yu kisi bun skoroleri. Efu yu no trow, dan kande yu e suku wan wroko, noso kande yu e suku fu hori a wroko di yu abi so taki yu no e tron wan hebi gi trawan. Den sani disi na bun sani di wan sma kan suku fu du.—2 Tesalonikasma 3:10-12; 1 Timoteyus 5:8.

Gi furu sma, a yoisti fasi fu libi, na fu wroko, fu nyan, èn fu dringi. Ma toku den sma di abi a sortu libi disi ben kan go libi na wan fasi di no e kruderi nanga a wani fu Gado. Fa so? Yesus ben taki: „Neleki fa sani ben de na ini a ten fu Noa, na so a denoya fu a Manpikin fu libisma o de. Bika na ini a ten dati bifo a frudu, sma ben nyan, den ben dringi, man ben teki uma fu trow èn uma ben trow nanga man, teleki a dei doro di Noa go na ini na ark; ma den no ben poti prakseri na san ben e pasa, teleki a frudu kon èn a wai den alamala puru; na so a denoya fu a Manpikin fu libisma o de tu.”—Mateyus 24:37-39.

Na ini a pisi ten fosi a Frudu, furu sma ben e libi na wan fasi di den ben si leki a yoisti fasi fu libi. Ma a problema di den ben abi, na taki den „no ben e poti prakseri” na a warskow di Gado ben gi den. Gado ben o kiri ala den ogrisma na ini wan frudu di ben o sungu heri grontapu. A no de fu taki dati den ben feni taki Noa no ben e libi na a yoisti fasi. Ma di a Frudu kon, dan a kon na krin taki na a libi fu Noa nanga en osofamiri trutru ben de a yoisti fasi fu libi.

Na ini a ten disi, ala sani e sori taki wi libi na a ten fu a kaba (Mateyus 24:3-12; 2 Timoteyus 3:1-5). Heri esi, Gado Kownukondre sa ’broko a sistema disi na pisipisi èn a sa tyari wan kaba kon na en’ (Danièl 2:44). Te a Kownukondre dati o tiri grontapu, dan grontapu o tron wan paradijs. A Kownukondre sa tyari wan kaba kon na siki nanga dede (Yesaya 33:24; Openbaring 21:3-5). Ala libisani na grontapu sa libi na ini vrede èn noiti den no sa pina nyanyan.—Psalm 72:16; Yesaya 11:6-9.

Ma fosi Yehovah sa du den sani dati, a wani taki a bun nyunsu fu a Kownukondre fu en musu „preiki gi sma na heri grontapu, so taki sma fu ala kondre kan yere dati” (Mateyus 24:14). Soleki fa Gado wani, dan sowan seibi milyun Kotoigi fu Yehovah e preiki a bun nyunsu disi na ini 236 kondre, èn na ini moro leki 400 tongo.

Kande sma na grontapu no man frustan fu san ede Yehovah Kotoigi e libi na a fasi fa den e libi, iya, kande den e spotu den srefi (2 Petrus 3:3, 4). Neleki den sma na ini a pisi ten fosi a Frudu, furu sma na ini a ten disi e poti furu prakseri na den aladei afersi fu a libi. Kande den e krutu iniwan sma di e weigri fu libi na a fasi di furu trawan e si leki a yoisti fasi fu libi. Ma gi den sma di e bribi na ini den pramisi fu Gado, a yoisti fasi fu libi, na wan libi pe na anbegi fu Gado de na a fosi presi.

Sobun, awinsi yu gudu noso pôti, noso awinsi a libi e waka bun gi yu, a bun fu luku ten na ten sortu sani yu abi na prakseri fu du na ini a ten di e kon. Te yu e du dati, dan aksi yusrefi: ’Den sani di mi abi na prakseri fu du e kruderi nanga a wani fu Gado?’

[Prenki na tapu bladzijde 11]

Te den sani di libisma abi na prakseri fu du no e kruderi nanga a wani fu Gado, dan na a wani fu Yehovah sa kon tru

[Prenki na tapu bladzijde 12]

A guduman na ini na agersitori fu Yesus no ben hori a wani fu Gado na prakseri di a ben e sreka sani gi a tamara fu en