Abi bribi neleki den

A ben „aksi ensrefi san den sani disi ben wani taki”

MARIA ben e pruberi fu sidon moro bun na tapu a meti di ben e tyari en. A ben e rèi furu yuru langa kaba na tapu a meti. Yosef ben e waka leti na fesisei fu sori a pasi go na Betlehem, di de farawe. Maria firi baka fa a beibi ben e buweigi na ini en bere.

Pikinmoro a ten ben doro gi Maria fu meki a pikin. A moi fu si taki Bijbel e taki dati na a ten disi Maria „en bere ben bigi kaba” (Lukas 2:5). Di Yosef nanga Maria pasa den difrenti gron, dan kande sonwan fu den gronman di ben e plugu noso sai ben luku den, èn den ben aksi densrefi fu san ede wan uma nanga so wan bigi bere ben de na pasi. Fu san ede Maria komoto na en oso na ini Nasaret fu go na so wan farawe presi?

We, disi du kon fu di wan tu mun na fesi Maria kisi wan spesrutu frantwortu di noiti nowan sma kisi ete. A ben o meki wan pikin di ben o tron a Mesias, iya, a pikin ben o de a Manpikin fu Gado! (Lukas 1:35) Di a ten doro gi Maria fu meki a pikin, a ben musu teki waka go na wan farawe presi. Disi meki taki Maria kisi fu du nanga wan tu problema di ben de wan tesi tapu en bribi. Meki wi go luku san yepi en fu tan abi wan tranga bribi.

Den go na Betlehem

Yosef nanga Maria no ben de den wan-enkri sma di teki pasi go na wan presi. No so langa na fesi, Caesar Augustus gi a komando taki ala sma na ini a kondre musu go na a foto pe den gebore, fu skrifi den nen na lantibuku. San Yosef du? Bijbel e taki: „A no de fu taki dati Yosef srefi komoto fu a foto Nasaret na Galilea, èn a go na Yudea na a foto fu David, di sma e kari Betlehem, bika Yosef ben de fu David oso èn fu David famiri.”—Lukas 2:1-4.

Leti na a ten dati, Caesar gi a komando disi. A sani disi no pasa somarso. Wan profeititori di skrifi sowan 700 yari na fesi, ben taki dati a Mesias ben o gebore na ini Betlehem. We, a ben de so taki wan foto Betlehem ben de 11 kilometer fu Nasaret. Ma a profeititori ben taki finifini dati a Mesias ben o gebore na ini „Betlehem Efrata” (Mika 5:2). Efu tide na dei yu ben o go fu Nasaret na a pikin dorpu dati na a zuidsei, dan dati na sowan 150 kilometer. Boiti dati, yu ben o abi fu kren èn saka wan tu pikin bergi fosi yu doro drape. Na a Betlehem dati Yosef ben musu go, bika dati ben de a foto pe a famiri fu Kownu David komoto, èn Yosef nanga en wefi ben de fu a famiri dati.

Yosef bosroiti fu gi yesi na a komando fu Caesar. San Maria ben o du? A no de fu taki dati a ben o hebi gi Maria fu teki waka go na so wan farawe presi. Soleki fa a sori, a ben de a pisi ten fu a yari te a ben e bigin kowru. Sobun a kan taki alen ben e fadon fu di a dreiten ben e kon na wan kaba. Boiti dati, Betlehem ben de moi hei, èn dati na sowan 760 meter. Baka te yu waka wan tu dei kaba, dan yu musu kren a lasti pisi di hebi fu waka. Kande a ben o teki moro langa gi den fu doro drape, fu di Maria di ben de nanga bigi bere, ben o abi fu rostu furu leisi. Te wan yongu uma de nanga bigi bere, dan a no de fu taki dati a wani de krosibei fu en oso pe famiriman nanga mati man yepi en te a ten doro fu meki a pikin. A no de fu taki dati Maria ben musu abi deki-ati fu teki waka go na so wan farawe presi.

 Awansi fa a no fa, Lukas e taki dati Yosef „go skrifi en nen na lantibuku makandra nanga Maria”. Lukas e taki tu dati Maria ’na a uma di Yosef ben trow nanga en fu di den ben meki mofo’ (Lukas 2:4, 5). Now di Maria trow nanga Yosef, a ben musu hori na prakseri taki a abi fu teki bosroiti makandra nanga en masra. Maria ben e si en masra leki edeman te a abi fu du nanga na anbegi. A ben horibaka gi den bosroiti di en masra teki, fu di na so fasi a ben de wan yepiman gi en masra, soleki fa Gado wani. * Sobun, aladi a kan de so taki a no ben makriki gi en fu horibaka gi Yosef, toku a gi yesi na en.

San ben kan de wan tra sani di meki taki Maria gi yesi? A de so taki Maria ben sabi a profeititori di e taki dati a Mesias ben o gebore na ini Betlehem? Bijbel no e taki efu a ben sabi dati. A kan de so taki Maria ben sabi a profeititori disi, fu di den kerki fesiman èn a pipel srefi ben sabi dati (Mateyus 2:1-7; Yohanes 7:40-42). Maria ben sabi furu fu den Buku fu Bijbel (Lukas 1:46-55). Maria bosroiti fu go na Betlehem kande fu di a ben wani gi yesi na en masra, na lantiwet, noso fu di a ben sabi a profeititori fu Yehovah. A kan de so tu taki ala den dri sani disi ben abi krakti tapu a bosroiti fu en. Awansi san a reide ben de, Maria na wan tumusi moi eksempre gi wi. Yehovah abi warderi gi mansma nanga umasma di abi sakafasi èn di e gi yesi na en. Na ini a ten disi, furu sma no e si en leki wan prenspari sani fu gi yesi, ma a moi eksempre fu Maria na wan deki-ati gi sma di e gi yesi na Gado.

Krestes gebore

A ben musu fu de so taki Maria ben breiti di a si a foto Betlehem. Maria nanga Yosef ben e waka sei den pikin bergi èn den ben pasa na den gron pe sma ben prani olèifbon, di ben de den lasti froktu di sma ben piki na ini a yari. A kan de so taki di den ben waka pasa, den ben e denki san ben pasa fositen na ini a pikin dorpu disi. Soleki fa a profeiti Mika taki, dan a foto disi ben pikin tumusi fu sma teri en leki wán fu den foto fu Yuda. Ma toku, moro leki wán dusun yari na fesi, Boas gebore na ini a foto disi, sosrefi Naomi, èn bakaten David.

Di Maria nanga Yosef doro na ini a foto, dan furu sma ben de drape. Tra sma ben doro drape fosi den, èn fu dati ede presi no ben de gi den fu tan. * Fu dati ede, den ben abi fu tan na ini wan pen a neti dati. Wi kan frustan taki Yosef ben e broko en ede srefisrefi nanga en wefi, di a ben si taki a pen di Maria ben abi, ben e kon hebi moro nanga moro. Fu ala den presi di de, dan na dyaso Maria en bere ben hati en fu di a ben de fu meki a pikin.

Umasma na ala sei, kan frustan fa Maria ben firi. Sowan 4000 yari na fesi, Yehovah ben taki dati umasma ben o abi furu pen te den ben o meki pikin fu di den ben kisi sondu (Genesis 3:16). Nowan buweisi de taki Maria no ben abi pen tu. Lukas no e taki efu Maria ben abi pen, ma a taki nomo: „A kisi en fosi manpikin” (Lukas 2:7). Iya, disi ben de a „fosi” pikin fu Maria, èn bakaten a meki tra pikin tu. Wan sani di de seiker, na taki Maria ben meki seibi pikin (Markus 6:3). Ma a fosi pikin disi, ben o de aparti.  Boiti taki a ben de Maria en fosi pikin, a ben de „a fosiwan fu ala sani di Gado meki”, iya, a ben de a wan-enkri Manpikin fu Gado!—Kolosesma 1:15.

A tori e taki now fu wan sani di furu sma sabi, èn dati na: „A [Maria] domru en na ini pisipisi krosi èn a poti en na ini wan baki pe meti e nyan na ini” (Lukas 2:7). Te yu ben o luku den toneel, den skedrei, noso prenki di abi fu du nanga a tori disi, dan yu kan denki taki ala sani ben waka na wan tumusi moi fasi, sondro problema. Ma luku fa sani waka trutru. Maria poti a pikin na ini wan baki pe meti e nyan na ini. Na osofamiri disi ben e tan na ini wan pen, èn a no de fu taki dati, awansi na fositen noso now, wan pen a no wan presi di e smeri switi èn di krin. A no de fu taki dati nowan papa noso mama ben o wani meki den pikin na so wan presi, efu tra moro bun presi ben de. Nofo tron papa nanga mama wani den moro bun sani gi den pikin. Wi kan de seiker taki Maria nanga Yosef ben wani dati tu gi a Manpikin fu Gado!

Maria nanga Yosef no meki a situwâsi disi broko den saka, ma den ben du ala san den man fu meki sani waka bun. Fu eksempre, luku taki Maria srefi ben sorgu gi a beibi, fu di a ben domru en na ini krosi, èn a poti en safri na ini a nyanyan baki so taki a ben kan sribi. Na so fasi a ben sorgu taki a beibi no ben o kowru èn taki noti no pasa nanga en. Maria no ben o meki a muilek situwâsi disi tapu en fu sorgu bun gi a pikin. En nanga Yosef ben sabi taki a moro prenspari sani di den ben kan du gi a pikin, na fu sorgu taki den e horibaka gi a pikin na ini na anbegi fu Gado (Deuteronomium 6:6-8). Na ini a ten disi, koni papa nanga mama e si a sani disi leki a moro prenspari sani tu, te den e kweki den pikin na ini wan grontapu pe furu sma no e anbegi Gado.

A kisi deki-ati di sma kon luku en

Ne wantronso, Maria nanga Yosef yere a sten fu wan tu sma. Wan tu skapuman kon esi-esi na ini a pen, fu di den ben wani si na osofamiri èn spesrutu a pikin. Den man disi ben breiti srefisrefi, èn yu ben kan si na den fesi taki den ben e prisiri. Den ben kon esi-esi fu den bergi pe den ben e tan nanga den skapu fu den. * A papa nanga a mama fu a pikin ben fruwondru fu a sani disi di pasa, èn den skapuman fruteri den fu a tumusi moi sani di den ondrofeni didyonsro. A ben de mindrineti, di wantronso wan engel kon na den skapuman. A glori fu Yehovah ben e skèin na den lontu, èn na engel fruteri den taki Krestes, noso a Mesias gebore didyonsro na ini Betlehem. Den skapuman ben o feni a pikin, di domru na ini pisipisi krosi na ini wan nyanyan baki. Baka dati, wan moro kefalek sani pasa. Wan heri ipi engel ben de di ben e prèise Yehovah!

A no de fu fruwondru taki den man disi di ben abi sakafasi, ben kon esi-esi na Betlehem. A musu fu de so taki den ben breiti srefisrefi fu si a beibi e didon na ini wan baki, soifri soleki fa na engel ben taki. Den ben fruteri trawan a bun nyunsu disi. „Den fruteri den san na engel ben taigi den . . . Ala sma di yere disi, ben fruwondru fu den sani di den skapuman fruteri den” (Lukas 2:17, 18). Soleki fa a sori, den kerki fesiman fu a ten dati ben e wisiwasi den skapuman. Ma a de krin fu si taki Yehovah abi warderi gi den man disi di ben abi sakafasi èn di ben gi yesi na en. Di den skapuman go luku a beibi Yesus, dan fa a sani disi ben abi krakti tapu Maria?

A no de fu taki dati Maria ben weri fu di a no makriki fu meki wan pikin. Ma toku a ben arki bun san den skapuman ben taki. Maria ben du moro leki dati. Bijbel e taki: „Ala den sani disi di sma ben taki, Maria ben kibri na ini en ati, èn a ben aksi ensrefi san den sani disi ben wani taki” (Lukas 2:19). A yongu uma disi trutru ben e denki dipi fu sani. A ben sabi taki a boskopu disi fu na engel, ben de tumusi prenspari. Yehovah, a Gado fu en, ben wani taki a sabi suma en manpikin ben o de, èn A ben wani taki a frustan o prenspari a pikin ben o de. Fu dati ede, Maria du moro leki fu arki nomo. A ben kibri den wortu dati na ini en ati, so taki a ben kan denki dipi fu den sani dati ibri leisi baka na ini a ten di ben o kon. A sani disi ben de wan prenspari sani di  meki taki Maria abi so wan tranga bribi en heri libi langa.

Yu o waka baka na eksempre fu Maria? Yehovah meki sma skrifi tumusi prenspari tru tori na ini a Wortu fu en. Ma den tru tori dati no o wani taki noti gi wi, te wi no e poti prakseri na den fosi. Wi kan du dati, te wi e leisi Bijbel doronomo. Wi no musu si Bijbel leki iniwan buku nomo, ma wi musu si en leki a Wortu fu Gado (2 Timoteyus 3:16). Neleki Maria, wi musu kibri den tru tori dati na ini wi ati so taki wi kan frustan den tori disi moro bun. Te wi e denki dipi fu den sani di wi leisi na ini Bijbel, èn te wi e luku na sortu fasi wi kan fiti den rai fu Yehovah moro bun na ini wi libi, dan dati o meki taki wi abi wan moro tranga bribi.

A e kibri tra tori tu na ini en ati

Aiti dei baka di a pikin gebore, Maria nanga Yosef besnèi en soleki fa a Wet di Gado gi Moses e taki, èn baka dati den gi en a nen Yesus soleki fa na engel ben taki (Lukas 1:31). Baka 40 dei, den tyari en fu Betlehem go na a tempel na ini Yerusalem, di ben de wan tu kilometer moro fara, èn drape den tyari na ofrandi fu kon krin. A Wet ben gi pasi taki pôtisma ben mag tyari tu stondoifi noso tu osodoifi leki ofrandi di ben musu meki taki den kon krin. Efu a ben de so taki Maria nanga Yosef ben e syen fu di den no ben man gi wan manskapu nanga wan stondoifi leki ofrandi soleki fa tra papa nanga mama ben du, dan den no meki a sani dati tapu den fu tyari wan ofrandi. Awansi fa a no fa, den kisi furu deki-ati di den ben de drape.—Lukas 2:21-24.

Wan owru man di nen Simeon kon na Maria nanga Yosef, èn a taigi Maria tra sani di a ben kibri tu na ini en ati. Gado ben pramisi Simeon taki a ben o si a Mesias fosi a dede, èn Yehovah en santa yeye sori en taki a beibi Yesus ben o tron a pramisi Frulusuman. Simeon ben warskow Maria sosrefi fu a pen di a ben o abi wan dei. A ben taki dati Maria ben o firi leki wan langa feti-owru boro en (Lukas 2:25-35). Srefi den wortu dati di ben sori Maria taki wan ogri sani ben o pasa, ben yepi en kande fu horidoro te a ben o kisi fu du nanga wan hebi tesi baka 30 yari. Baka di Simeon taki nanga den, na uma profeiti Ana si a beibi Yesus èn a ben taki fu a pikin nanga ala sma di ben fruwakti a frulusu fu Yerusalem.—Lukas 2:36-38.

Yosef nanga Maria teki wan bun bosroiti, fu tyari a beibi fu den go na a tempel fu Yehovah na ini Yerusalem. Gi a manpikin fu den, disi ben de den fosi sani di a ondrofeni na ini a tempel fu Yehovah pe a ben gwenti fu go doronomo. Di Yosef nanga Maria ben de drape, den du ala san den man fu gi yesi na a wet fu Gado, èn leki bakapisi fu dati den kisi rai nanga deki-ati. A no de fu taki dati di Maria ben komoto na ini a tempel a dei dati, a bribi fu en ben kon moro tranga, a ben yere furu tru tori di a kibri na ini en ati so taki a ben kan denki dipi fu dati, èn a ben kan fruteri trawan den tori disi.

A moi fu si taki papa nanga mama na ini a ten disi e waka baka na eksempre dati. Papa nanga mama di de Yehovah Kotoigi e tyari den pikin go doronomo na den Kresten konmakandra. Den papa nanga mama disi e du ala san den man na ini a diniwroko fu Gado, èn den e gi den brada nanga sisa fu den deki-ati. Te den e komoto fu den Kresten konmakandra, den e firi taki a bribi fu den kon tranga, den kon de moro koloku, èn den yere furu bun sani di den kan fruteri trawan. Yu e kisi wan switi kari fu kon na den konmakandra so taki yu kan miti den. Te yu o du dati, yu o si taki a bribi fu yu o kon moro tranga, neleki a bribi fu Maria.

[Futuwortu]

[Prenki na tapu bladzijde 25]

Simeon ben kisi a grani fu si a pramisi Frulusuman