Wan sani di furu sma e bribi

„Mi ben e kisi takru dren taki mi ben e bron na ini hel. Mi ben e dren taki wan sma trowe mi go na ini wan presi pe faya de. Mi ben bari èn na so mi ben dyompo opo. A no de fu taki dati mi ben e du ala san mi man fu no sondu.”—Arline.

YU E bribi taki hel na wan presi pe sma di du sondu e go èn pe den e kisi skin-ati? Furu sma e bribi dati. Fu eksempre, na ini 2005, wan sabiman fu na Universiteit fu St. Andrews na ini Skotland, ben du wan ondrosuku. A ben kon si taki wán fu ibri dri kerki fesiman na ini Skotland di a ben poti aksi gi, ben bribi taki den sma di no wani abi noti fu du nanga Gado „ben o nyan pina na ini hel fu di den o abi broko-ede fu têgo”. Wán fu ibri feifi kerki fesiman ben bribi taki den sma na ini hel ben o kisi hebi skin-ati.

Sma na ini furu kondre, e bribi na ini hel. Fu eksempre, wan ondrosuku di ben du na ini Amerkankondre na ini 2007, ben sori taki moro leki afu fu den sma di den ben poti aksi gi, e bribi na ini hel. Aladi a de so taki na ini son kondre furu sma no e bribi na ini Gado, toku den sma dati e bribi na ini hel. Wan tra ondrosuku di ben du na ini Kanada na ini 2004, ben sori taki pikinmoro afu fu den sma drape e bribi na ini hel. Èn na ini Ingrisikondre, wán di fu dri pisi fu a pipel ben de seiker taki hel de.

Den sani di den kerki fesiman e leri sma

Furu kerki fesiman no e leri sma moro taki hel na wan trutru presi pe sma e bron na ini faya. Na presi fu dati, den e horibaka gi wan srefi sortu leri leki san skrifi na ini wan buku fu Lomsu Kerki di tyari kon na doro na ini 1994. A buku e taki: „A moro bigi strafu di sma e kisi na ini hel, na taki den prati fu Gado fu têgo” (Catechism of the Catholic Church).

Aladi dati de so, toku furu sma e bribi taki hel na wan presi pe den e nyan pina fu di den abi broko-ede noso fu di den e kisi skin-ati fu têgo. Den sma di e horibaka gi a leri fu hel, e taki dati a leri disi teki puru fu Bijbel. Albert Mohler, a presidenti fu wan skoro gi kerki fesiman, e taki: „Disi na wan sani di skrifi na ini Bijbel.”

Fu san ede a de prenspari san yu e bribi?

Efu hel trutru na wan presi pe sma e nyan pina, dan a musu de so taki yu e frede a presi dati. Ma efu a leri disi no tru, dan den kerki fesiman e meki sma bruya èn frede fu soso. Boiti dati, den e gi Gado porinen.

San Gado Wortu, Bijbel, e taki fu a tori disi? Na ini den tra artikel wi sa gebroiki tra bijbelvertaling fu gi piki tapu dri aksi: (1) San e pasa trutru nanga wan sma te a dede? (2) San Yesus ben leri sma fu hel? (3) Sortu krakti a kan abi tapu yu te yu sabi san na hel trutru?