Na Gado wawan kan kibri grontapu

„A GERSI WAN PIKIN PERI NA INI WAN BIGI BLAKA SE.” Na so Edgar Mitchell ben taki di a ben de na loktu e luku a blaw-weti grontapu fu wi, komoto fu wan raket.

Gado du furu muiti fu sreka grontapu leki wan tanpe gi libisma. Di a kaba meki grontapu, den engel ben bari fu prisiri, „fu di den ben breiti srefisrefi” (Yob 38:7). Te wi ondrosuku ala den tumusi moi sani di de na grontapu, dan wi srefi e breiti pasa marki. Ala sortu sistema de na grontapu di sma no man frustan krinkrin. Den sistema disi e meki taki libi kan de na grontapu. Na so yu abi a sistema pe bon e gebroiki a faya fu a son, koolzuurgas fu a loktu, nanga watra fu meki nyanyan. Furu sma yere fu a sistema disi. Te den bon e meki nyanyan na so wan fasi, dan den e lusu zuurstof na ini a loktu. Wi abi a zuurstof fanowdu fu kan tan na libi.

Bijbel e sori taki Gado ben gi libisma a wroko fu sorgu grontapu (Genesis 1:28; 2:15). Ma fu meki ala den sistema di Gado meki, tan wroko bun, dan libisma ben musu si sani na wan yoisti fasi. Te yu e luku en bun, dan libisma ben o abi fu lobi a tanpe di Gado meki gi den. Libisma ben musu wani taki grontapu tan wan moi presi. Ma Gado ben gi libisma a grani fu teki den eigi bosroiti. Sobun, a ben kan pasa taki libisma no ben o sorgu bun gi grontapu, noso taki den ben o du sani nanga grontapu soso fu kan kisi wini gi densrefi. We, na dati den du tu. Fu di sma no e broko den ede nanga grontapu èn fu di den e denki densrefi nomo, meki dati tyari takru bakapisi kon.

Disi na wan tu fu den takru bakapisi: (1) A koti di sma e koti bigi busi trowe, e meki taki grontapu no man puru a koolzuurgas di de na ini a loktu. Disi kan meki taki son presi e kon moro waran, taki presi e kon moro kowru, taki moro furu alen e fadon, èn taki bigi winti e wai. (2) Sma e gebroiki tumusi furu dresi fu kiri sani soleki maskita, kakalaka, noso sprenka. Ma na a fasi dati den e kiri bun furu tra sani tu, soleki wasiwasi nanga tra pikin meti di e meki, taki bon kan meki froktu. (3) Sma e srepi ala fisi puru èn den e doti den se nanga den liba. Fu di den du den sani disi doronomo, meki wi no abi so furu fisi moro. (4)  Fu di libisma ben abi bigi-ai meki den gebroiki den gudu fu grontapu no so wan fasi taki den bakapikin fu den o abi fu libi sondro wan lo fu den sani disi. Fu di libisma abi bigi-ai, meki grontapu e kon moro waran ibri dei. Son bergi abi bigi ipi ijs di e grati komoto na den bergi safrisafri. Sabiman di e ondrosuku a fasi fa libisma kan sorgu taki grontapu no e doti, e taki dati doronomo den bigi ipi ijs disi e kon moro pikin. Den e taki sosrefi dati bun furu ijs e broko komoto na den ijsbergi na ini a kontren fu a Noordpool nanga a Zuidpool, fu di grontapu e kon moro faya dei fu dei.

Now di so furu rampu e pasa na grontapu, son sma kan taki dati a gersi leki grontapu e opo feti gi ensrefi fu pina libisma gi den sani di den du nanga en. Gado gi wi primisi fu libi na grontapu fu soso. Libisma no e pai fu kan libi na grontapu (Genesis 1:26-29). Ma den sani di e pasa na grontapu nownowde, e sori taki furu sma no wani sorgu gi a moi tanpe fu den. Na presi fu dati, den e prakseri soso den eigi wini èn den wani du sani nomo di densrefi feni bun. Yu kan taki dati libisma no e sorgu bun gi na oso di den kisi fu tan na ini. Den „e pori grontapu”, soleki fa Openbaring 11:18 e taki.

Soleki fa wi si, dan na Almakti Gado, Yehovah, na a Mekiman fu den difrenti sistema di e meki taki libi kan de na grontapu. Bijbel profeititori e sori wi taki a Gado disi bosroiti taki a ten doro fu puru den sma di no e sorgu a moi tanpe di a meki (Sefanya 1:14; Openbaring 19:11-15). Fosi libisma kisi na okasi fu pori grontapu krinkrin, dan Gado o du wan sani. A sani dati o pasa moro esi leki san wi prakseri (Mateyus 24:44). * Fu tru, na Gado wawan kan kibri grontapu.

[Futuwortu]