San wi kan leri fu na eksempre fu Maria?

A pasa wan leisi kaba taki yu no ben sabi san fu du? Kande dati pasa, fu di yu no ben fruwakti wan sani noso fu di yu kisi wan frantwortu. Yu e kon weri tu, fu di yu e du tranga muiti fu sorgu gi yu osofamiri? Kande yu na wan fu den milyunmilyun sma di e bruya èn di e frede fu di yu ben musu lowe gowe libi a kondre fu yu. Èn suma fu wi no e sari srefisrefi te wan lobiwan fu wi dede? Wi e firi leki wi de wi wawan, te so wan sani pasa, a no so?

YU BEN sabi taki Maria, a mama fu Yesus, ben kisi fu du nanga den srefi sortu problema dati? Ma boiti taki a ben ondrofeni den sortu sani dati, a ben man horidoro! San wi kan leri fu na eksempre fu en?

A no de fu taki dati sma na heri grontapu sabi Maria. Dati no e fruwondru wi, fu di Gado ben gebroiki en na wan aparti fasi fu meki En prakseri kon tru. Boiti dati, milyunmilyun sma e anbegi Maria. Na ini Lomsu Kerki, sma e anbegi en leki wan lobi-ati Mama èn a de wan eksempre fu wan sma di ben abi bribi, howpu, èn di ben lobi fu gi sani. Furu sma leri taki Maria e meki libisma kon bun baka nanga Gado.

Fa yu e si Yesus en mama? Ma san de moro prenspari na, fa Gado e si en?

A kisi wan aparti frantwortu

Maria, na umapikin fu Eli, ben de fu a lo Yuda fu Israel. A fosi leisi di Bijbel e taki fu en, na di wan spesrutu sani pasa. Wan engel ben go na en èn a taigi en: „Odi, yu di kisi wan bigi grani, Yehovah de nanga yu.” Na a bigin, Maria ben skreki èn „a prakseri na ensrefi fu san ede na engel taki en odi na a fasi disi”. Fu dati ede, na engel taigi en taki Gado teki en fu tyari wan tumusi aparti èn seryusu frantwortu. A ben o de nanga bere, èn a ben o meki a Manpikin fu Gado, di a ben musu kweki teleki a kon bigi.​—Lukas 1:26-33.

Dati ben de wan bigi frantwortu di a yongu uma disi ben o kisi! San a du? Kande Maria ben aksi ensrefi suma ben o bribi a tori disi. A ben o de so taki Yosef, a man di ben o trow nanga en, no ben o lobi en moro fu di a ben de nanga bere? Noso a sani disi ben o meki a kisi syen na ini a libimakandra? (Deuteronomium 22:20-24) A no ben draidrai fu teki a tumusi prenspari frantwortu disi na en tapu.

Fu di Maria ben abi wan tranga bribi, meki a ben man saka ensrefi fu du a wani fu en Gado, Yehovah. A ben abi na overtoigi taki Yehovah ben o sorgu gi en. Fu dati ede, a ben taki: „Luku! Na uma-srafu fu Yehovah! Meki sani waka nanga mi soleki fa yu taki.” Maria ben de klariklari fu ondrofeni den muilek situwâsi di ben kan miti en, fu di a ben frustan taki a frantwortu  disi ben o gi en na okasi fu gi Gado grani.​—Lukas 1:38.

Di Maria taigi Yosef taki a ben de nanga bere, dan Yosef ben abi na prakseri fu no trow moro nanga en. A musu de so taki dati ben de wan muilek ten gi den ala tu. Bijbel no e taki o langa disi ben teki. Ma a no de fu taki dati Maria nanga Yosef ben firi bun, baka di na engel fu Yehovah ben kon na Yosef. A boskopuman dati fu Gado ben taigi Yosef taki Maria kon de nanga bere na wan wondru fasi èn a ben taigi en fu tyari Maria go na oso leki en wefi.​—Mateyus 1:19-24.

Muilek ten

Na ini a ten disi, furu umasma di de nanga bere, e sreka sani omeni mun na fesi gi a beibi fu den, èn a kan de so taki Maria ben du a srefi tu. Disi ben o de en fosi pikin. Ma dan wan tu sani pasa di a no ben fruwakti. Caesar Augustus ben gi a komando taki ala sma ben musu go skrifi den nen na lantibuku na ini a foto pe den gebore. Sobun, Yosef teki Maria di ben de nanga neigi mun bere, èn a tyari en sowan 150 kilometer na tapu wan buriki fu go na Betlehem. Furu sma ben de na ini a foto drape èn Maria ben musu meki en pikin. Ma nowan presi ben de gi en fu meki en pikin, boiti wan presi pe meti ben e tan. A ben musu de muilek gi Maria fu meki en pikin drape. A kan de so taki Maria ben syen èn taki a ben frede.

Na ini den muilek momenti disi na ini en libi, Maria ben musu fu taigi Yehovah ala san de na tapu en ati, èn a ben abi a frutrow taki Yehovah ben o sorgu gi en nanga en beibi. Bakaten, wan tu skapuman ben kon drape, fu di den ben angri fu si a beibi. Den ben taki dati den engel ben kari a pikin disi ’wan Frulusuman, di de Krestes, a Masra’. Bijbel e taki: „Ala den sani disi di sma ben taki, Maria ben kibri na ini en ati, èn a ben aksi ensrefi san den sani disi ben wani taki.” A ben denki dipi fu den wortu disi èn dati ben gi en krakti baka.​—Lukas 2:11, 16-19.

Fa a de nanga wi? Wi kan fruwakti taki wi o kisi problema na ini a libi. Boiti dati, Bijbel e sori taki „ten nanga sani di e pasa sondro fu sma fruwakti dati” kan miti iniwan fu wi. Dati kan meki taki ala sortu problema kan miti wi (Preikiman 9:11). Te dati pasa, wi e kisi bita-ati, èn wi e taki dati na Gado e meki den sani disi pasa? A no ben o de moro bun fu abi a srefi denki leki Maria? A no ben o de moro bun fu kon moro krosibei na Yehovah Gado fu di wi e studeri en Wortu, Bijbel, èn e denki dipi fu den sani di wi leri? Te wi o du dati, dan disi o yepi wi fu horidoro te tesi miti wi.

A ben pôti èn a ben musu lowe gowe

Maria ben kisi fu du nanga tra muilek situwâsi tu. A ben pôti èn a ben musu lowe gowe fu a kondre pe a ben libi. Yu kisi fu du nanga den sortu problema dati? Soleki fa wan ondrosuku e sori, dan „afu fu den sma na grontapu, pikinmoro dri milyard sma, e libi fu sowan tu Amerkan dala wan dei”. Boiti dati, milyunmilyun sma di e libi na ini den sokari gudu kondre, musu wroko tranga fu sorgu gi den sani di den osofamiri abi fanowdu. Fa a de nanga yu? Yu e kon weri srefisrefi tu fu di yu musu  wroko tranga ibri dei fu sorgu taki yu osofamiri abi nyanyan, krosi nanga wan presi fu tan? A de so tu taki a situwâsi disi e meki taki son leisi yu no sabi moro san fu du?

Bijbel e sori taki Yosef nanga Maria ben pôti. Fa wi du sabi dati? Den Evangelietori fu Mateyus, Markus, Lukas, nanga Yohanes e sori taki 40 dei baka di Maria meki en pikin, en nanga Yosef go na a tempel fu tyari wan ofrandi soleki fa a wet ben taki. Den ben tyari „tu stondoifi noso tu yongu osodoifi” (Lukas 2:22-24). * Na ofrandi disi ben de soso gi den sma di ben pôti tumusi fu tyari wan yongu manskapu leki ofrandi. Sobun, Yosef nanga Maria ben musu du tranga muiti fu sorgu gi den osofamiri. Aladi dati ben de so, toku den ben man sorgu taki lobi ben de na ini na osofamiri fu den. A no de fu taki dati sani di abi fu du nanga na anbegi fu Gado, ben de den moro prenspari sani gi den.​—Deuteronomium 6:6, 7.

A no langa baka di Yesus gebore, sani ben kenki baka na ini Maria en libi. Wan engel ben taigi Yosef fu teki en osofamiri èn lowe go na Egepte (Mateyus 2:13-15). Disi ben de a di fu tu leisi di Maria ben musu gowe libi a presi di a ben sabi, ma a leisi disi a ben musu go na wan tra kondre. Na ini Egepte wan bigi Dyu libimakandra ben de. Sobun, a ben kan de so taki Maria nanga Yosef ben man go libi na mindri den eigi pipel. Ma awansi fa a no fa, a no makriki fu libi na ini wan tra kondre di wan sma no sabi. A de so taki yu nanga yu osofamiri de na mindri den milyunmilyun sma di gowe libi a kondre fu den? Yu du dati kande gi a bun fu yu pikin noso fu di ogri ben kan miti yu? Efu dati de so, dan yu kan frustan sortu muilek situwâsi Maria ben kan miti di a ben de na ini Egepte.

A ben sabi en frantwortu leki wefi nanga mama

Boiti den tori di e taki fu a ten di Yesus gebore èn di a ben de wan beibi, den Evangelietori no e taki furu fu Maria. Ma toku, wi sabi seiker taki Maria nanga Yosef ben abi siksi tra pikin. Kande yu e fruwondru fu a sani disi. Ma luku san den Evangelietori e taki.

Yosef ben abi bigi lespeki gi a grani di Maria ben abi fu meki a Manpikin fu Gado. Fu dati ede, Yosef no ben abi seks nanga en bifo Yesus gebore. Mateyus 1:25 e taki dati Yosef „no ben sribi nanga Maria teleki Maria kisi wan manpikin”. A wortu „teleki” na ini a vers disi e sori taki baka di Yesus gebore, dan leki masra nanga wefi, Yosef nanga Maria ben abi seks. Den Evangelietori e sori taki leki bakapisi fu dati, Maria ben meki pikin nanga Yosef, iya, a ben meki manpikin nanga umapikin. Yakobus, Yosef, Simon, nanga Yudas ben de afu-brada fu Yesus. Wi de seiker taki Maria ben abi tu umapikin (Mateyus 13:55, 56). Ma ini a tori fu den pikin disi, Maria ben hori bere neleki ala tra umasma. *

Maria trutru ben warderi a matifasi di a ben abi nanga Gado. Aladi a Wet no ben taki dati umasma ben musu go na a Paskafesa, toku Maria ben abi a gwenti fu go makandra nanga Yosef, di ben go ala yari na Yerusalem gi a fesa disi (Lukas 2:41). Disi ben wani taki dati den ben musu waka sowan 300 kilometer ibri yari, makandra nanga a famiri fu den di ben e kon moro bigi. Ma a no de fu taki dati den waka disi, ben de prisiri okasi gi na osofamiri.

 Furu umasma na ini a ten disi e waka baka a moi eksempre fu Maria. Den e wroko tranga èn den no e prakseri densrefi nomo, na so fasi den e tyari den frantwortu soleki fa Bijbel e taki. Nofo tron den wefi disi abi pasensi, den e horidoro, èn den abi sakafasi trutru. Te den e prakseri a fasi fa Maria ben denki fu sani, dan dati e yepi den fu poti na anbegi fu Gado èn a matifasi di den abi nanga en, na a fosi presi. Den sani dati de moro prenspari leki den sani di densrefi ben o wani. Neleki Maria, den sabi tu taki te den e anbegi Gado makandra nanga den masra èn nanga den pikin, dan dati e meki taki den abi wan moro bun matifasi nanga makandra èn den e kon de wán.

Wan leisi di Maria nanga Yosef ben drai kon baka fu a Paskafesa na ini Yerusalem, den ben kon si taki Yesus, di ben abi 12 yari, no ben de nanga den. A ben kan de so taki na a ten dati den ben abi wan tu pikin kaba. Yu kan frustan fa Maria ben bruya di a ben e suku en manpikin na ala sei, dri dei langa? Di en nanga Yosef feni Yesus te fu kaba na ini a tempel, dan Yesus taigi den: „Unu no sabi taki mi musu de na ini na oso fu mi Tata?” A tori e taki dati na a okasi disi tu, Maria „ben kibri ala den wortu disi na ini en ati”. A sani disi e sori taki Maria trutru ben si en leki wan prenspari sani fu si sani soleki fa Gado e si sani. A ben teki en ten fu denki dipi fu ala den sani di ben pasa èn di ben abi fu du nanga Yesus. Furu yari baka dati, a kan de so taki Maria ben fruteri den Evangelie skrifiman a tori disi èn sosrefi tra sani di ben abi fu du nanga a ten di Yesus ben yongu ete.​—Lukas 2:41-52.

 A ben horidoro aladi a ben sari di lobiwan fu en dede

San ben pasa nanga Yosef, a kwekipapa fu Yesus? Baka a tori di e taki syatu fu Yesus di a ben abi 12 yari, dan den Evangelietori no e taki moro fu Yosef. Son sma e taki dati a sani disi e sori taki Yosef dede wan pisi ten bifo Yesus bigin nanga en diniwroko. * Awansi san ben pasa, Maria no ben abi wan masra moro na a kaba fu Yesus en diniwroko. Na a ten di Yesus dede, a gi na apostel Yohanes a frantwortu fu sorgu gi en mama (Yohanes 19:26, 27). Yesus no ben o du dati efu Yosef ben de na libi ete.

Maria nanga Yosef ben ondrofeni so furu sani makandra! Engel ben kon na den, den ben lowe gi wan ogri-ati tiriman, den ben froisi go na tra presi wan tu leisi, èn den ben musu sorgu gi wan bigi osofamiri. Kande den ben sidon nanga makandra na bakadina èn den ben taki fu Yesus. Kande den ben aksi densrefi san ben o miti Yesus, èn kande den ben broko den ede efu den ben e leri en èn sreka en bun gi den sani di ben o miti en. Ne wantronso, Maria ben kon de en wawan.

Yu lasi yu patna na ini dede? Te now ete yu e sari èn yu e firi leki yu de yu wawan, awansi someni yari pasa kaba sensi yu patna dede? A no de fu taki dati Maria ben kisi trowstu fu den sani di a ben bribi èn fu a sabi di a ben abi taki wan opobaka o de (Yohanes 5:28, 29). * Ma den sani dati di ben trowstu Maria, no ben lusu den problema fu en. Neleki fa a de nanga furu mama di de den wawan na ini a ten disi, Maria ben musu sorgu en wawan gi en pikin, sondro fu abi wan masra.

A ben kan de so taki Yesus ben e wroko fu sorgu gi na osofamiri, di Yosef dede. Di den brada fu Yesus ben kon bigi kaba, dan den sosrefi ben o man yepi fu sorgu gi na osofamiri. Di Yesus „ben abi sowan dritenti yari”, a ben gowe libi oso fu bigin nanga en diniwroko (Lukas 3:23). Furu papa nanga mama e prisiri èn e sari na a srefi ten, te wan manpikin noso wan umapikin di kon bigi kaba, e gowe  libi oso. Papa nanga mama gi so furu fu den ten, èn den meki furu muiti fu kweki den pikin fu den di den lobi srefisrefi. Te den pikin libi oso, dan a de neleki den de den wawan. Yu abi wan manpikin noso wan umapikin di gowe libi oso fu du san a abi na prakseri? Yu breiti taki den na yu pikin, ma a de so taki son leisi yu e winsi taki den ben de moro krosibei fu yu? Sobun, yu kan frustan fa Maria ben firi di Yesus gowe libi oso.

A kisi tesi di a no ben fruwakti noiti

Wan tra tesi di Maria kisi, ben de wan sani di kande a no ben fruwakti noiti. Di Yesus ben e preiki, furu sma ben waka na en baka, ma en eigi brada no ben waka na en baka. „A ben de so, taki den brada fu en no ben bribi na ini en”, na so Bijbel e taki (Yohanes 7:5). A no de fu taki dati Maria ben fruteri den taki na engel ben taigi en taki Yesus na „a Manpikin fu Gado” (Lukas 1:35). Ma toku gi Yakobus, Yosef, Simon, nanga Yudas, Yesus ben de den bigi brada nomo. Sobun, Maria ben abi wan osofamiri di no ben bribi den srefi sani.

A ben de so taki Maria ben lasi-ati, èn a ben tapu fu meki muiti fu kenki a fasi fa den tra pikin ben e denki? Nôno, kwetikweti! Wan leisi di Yesus ben e preiki na ini Galilea, a ben go na wan oso fu nyan, èn wan ipi sma ben kon drape fu arki en. Suma ben de drape na dorosei e suku en? Maria nanga den brada fu Yesus. Sobun, di Yesus ben de krosibei fu a presi pe den ben libi, dan Maria ben go na Yesus èn soleki fa a sori, a ben tyari den tra pikin fu en tu. Kande a ben e howpu taki den tra pikin ben o kenki a fasi fa den ben e denki fu Yesus.​—Mateyus 12:46, 47.

Kande yu e kisi fu du nanga wan srefi sortu situwâsi, fu di yu e du muiti tu fu waka baka Yesus aladi den tra memre fu yu osofamiri no wani du dati. No lasi-ati, èn tan horidoro! Neleki Maria, furu sma sori taki den abi pasensi fu di den tan gi den famiriman deki-ati omeni yari langa, fosi den tyari wan kenki kon trutru na ini den libi. Gado e warderi en te wi e horidoro na a fasi disi, awansi sma e arki noso awansi den no e arki.​—1 Petrus 3:1, 2.

A moro bigi tesi di a kisi

A no de fu taki dati a lasti tesi di Maria kisi, soleki fa a skrifi na ini Bijbel, ben de wan tesi di priti en ati. Maria ben si fa en lobi manpikin kisi hebi pen èn fa a dede baka  di sma fu en eigi pipel ben weigri fu poti bribi na ini en. Sma e taki nofo tron dati te wan pikin dede, dan dati na „a moro bigi lasi” èn „a moro hati dede”, awansi a pikin yongu ete noso awansi a bigi kaba. Neleki fa Bijbel ben taki omeni tenti yari na fesi, dan a ben de neleki wan feti-owru ben boro Maria.​—Lukas 2:34, 35.

Maria ben gi pasi taki a lasti tesi disi meki taki a sari so te, taki a no ben abi howpu moro? Noso a ben gi pasi taki a sani disi meki a lasi bribi na ini Yehovah? Nôno. Bijbel e taki baka fu Maria, di a ben „tan begi” makandra nanga den disipel fu Yesus. Na a ten dati a no ben de en wawan. Den tra manpikin fu en, di ben poti bribi na ini den bigi brada now, ben de makandra nanga Maria. A no de fu taki dati a sani disi ben trowstu Maria! *​—Tori fu den Apostel 1:14.

Maria ben abi wan trutru koloku libi, fu di a ben tan dini Gado leki uma, leki wefi, èn leki mama. A kisi furu blesi na ini a diniwroko di a ben du gi Gado. A ben horidoro awansi a kisi furu tesi nanga problema. Te wi e kisi fu du nanga muilek situwâsi di wi no fruwakti noso te wi e broko wi ede nanga wi osofamiri, dan wi kan leri furu fu na eksempre fu Maria, di ben tan dini Gado awansi a ben kisi furu tesi.​—Hebrewsma 10:36.

Ma wi musu si Maria leki wan sma di wi musu anbegi? Te Bijbel e taki fu na aparti frantwortu di Maria ben kisi, dan dati musu meki taki wi anbegi en?

[Futuwortu]

[Faki/​Prenki na tapu bladzijde 6]

 Yesus ben abi brada nanga sisa?

Iya, a ben abi brada nanga sisa. Son sabiman fu kerkitori pruberi fu sori taki dati no tru, aladi den Evangelietori e sori krin wan tu leisi taki Yesus ben abi brada nanga sisa (Mateyus 12:46, 47; 13:54-56; Markus 6:3). Sma abi a denki taki Maria no ben meki tra pikin, ma luku tu sani di Bijbel sabiman e taki fu a tori disi. Wan fu den sani dati, na taki sma di wani horibaka gi wan kerkileri di ben kon bakaten, wani sori taki Maria ben de wan nyunwenke en heri libi langa. Wan tra sani, na taki krinkrin buweisi no de di e horibaka gi a denki taki Maria no ben abi tra pikin.

Fu eksempre, sma e feni taki „den brada” di kari na ini Bijbel, ben de manpikin di Yosef ben meki fosi a trow nanga Maria. A denki disi no kan tru, fu di dati ben o wani taki dati Yesus no ben o abi a reti fu a fosi manpikin, di ben musu tron kownu leki bakapikin fu David.​—2 Samuel 7:12, 13.

Sma e taki tu dati den brada disi, trutru ben de omu pikin noso tanta pikin fu Yesus, aladi den Griki Buku fu Bijbel e gebroiki difrenti wortu gi „brada”, „omu pikin”, „tanta pikin”, èn gi „famiriman”. Fu dati ede, sabiman Frank E. Gaebelein e taki dati den denki disi fu sabiman fu kerkitori, no kan tru kwetikweti. A e taki te fu kaba: „A makriki fu frustan taki a wortu ’brada’ e sori go na den manpikin fu Maria nanga Yosef. Sobun, den ben de Yesus en brada, fu en mama sei.”

[Faki na tapu bladzijde 7]

 A ben abi a deki-ati fu teki wan tra bribi

Maria gebore na ini wan Dyu osofamiri, èn a ben abi a Dyu bribi. Na ini a kontren pe a ben libi, a ben gwenti go na a snoga, noso a presi pe den Dyu ben anbegi Gado, èn a ben go tu na a tempel na ini Yerusalem. Ma di Maria ben frustan moro bun san Gado abi na prakseri, dan a ben kon si taki den gwenti fu den afo fu en, no ben e plisi Gado moro. Den Dyu kerki fesiman ben kiri en Manpikin, a Mesias. Fosi dati pasa, Yesus ben taigi den kerki fesiman dati: „Luku! Gado o gowe libi un oso gi unu” (Mateyus 23:38). Gado no ben blesi a Dyu bribi moro, iya, a srefi bribi di Maria ben kweki na ini. —Galasiasma 2:15, 16.

Di a Kresten gemeente ben seti, dan kande Maria ben abi sowan 50 yari. San Maria ben o du? A ben feni taki na fu di a gebore na ini a Dyu bribi, meki a no o man libi a bribi dati? Noso a ben feni taki a ben musu tan hori ensrefi na den gwenti fu en afo? A ben taki dati a owru tumusi fu teki wan tra bribi? Nôno, kwetikweti! Maria ben frustan taki Gado ben e blesi a Kresten gemeente now. Fu dati ede, a ben abi a bribi nanga a deki-ati fu teki a Kresten bribi.

[Prenki na tapu bladzijde 5]

Den e lowe go na Egepte

[Prenki na tapu bladzijde 8]

A moro hati sani di wan mama kan ondrofeni