Den sani di Yesus leri wi

Begi di Gado e arki

Nofo tron, Yesus ben suku fu de en wawan na wan presi fu begi, èn a gi den bakaman fu en a deki-ati fu du dati tu. Bijbel e taki: „Wan leisi a ben de na wan presi e begi; di a kaba begi, dan wan disipel fu en taigi en: ’Masra, leri wi fa fu begi’ . . . Dan a taigi den: ’Te unu e begi, dan un musu taki: „Mi Tata, meki yu nen kon santa”’” (Lukas 5:16; 11:1, 2). Na so fasi Yesus sori taki wi musu begi en Tata, Yehovah wawan. En wawan na wi Mekiman èn a „Yereman fu begi”.—Psalm 65:2.

Gado e feni ala begi bun?

Gado no e feni en bun te sma e taki begi di den leri na ede, ibri leisi baka. Yesus ben taki: „Te yu e begi, no taki den srefi sani ibri leisi baka” (Mateyus 6:7). Den sani di wi e taigi wi hemel Tata musu komoto fu wi ati. Wan leisi, Yesus ben sori den bakaman fu en krin taki, te wan sma di du sondu e begi nanga en heri ati èn a wani kenki, dan Gado e feni a begi dati moro bun, leki te wan heimemre man di e hori ensrefi finifini na den kerki gwenti, e begi Gado (Lukas 18:10-14). Sobun, te wi wani taki Gado arki den begi fu wi, dan wi musu abi sakafasi èn wi musu pruberi fu du san Gado e taigi wi. Yesus srefi ben taki: „Mi e taki den sani disi soleki fa a Tata leri mi . . . ala ten mi e du san e plisi en” (Yohanes 8:28, 29). Yesus ben taki disi na ini begi: „A no mi wani musu pasa, ma yu wani.”—Lukas 22:42.

 Fu sortu sani wi musu begi?

Fu di Gado kisi porinen, meki Yesus ben taki: „Fu dati ede un musu begi so: ’Wi Tata na hemel, meki yu nen kon santa. Meki yu kownukondre kon. Meki yu wani pasa na grontapu soleki fa a e pasa na hemel’” (Mateyus 6:9, 10). Wi musu begi taki Gado Kownukondre kon, fu di dati na a tirimakti di Gado o gebroiki fu du a wani fu en na hemel èn na grontapu. Yesus ben taki dati wi kan begi fu kisi „a brede di wi abi fanowdu gi a dei”. Wi kan aksi Yehovah tu fu feni wroko, fu feni wan presi fu tan, èn fu abi krosi fu weri. Wi kan taki nanga en fu sani di abi fu du nanga a gosontu fu wi, èn fu tra broko-ede di wi abi. Boiti dati, Yesus ben taki dati wi musu aksi pardon tu.—Lukas 11:3, 4.

Wi musu begi gi trawan?

Yesus ben begi gi trawan. Bijbel e taigi wi: „Sma tyari yongu pikin kon na en, so taki a ben kan poti en anu na den tapu èn begi gi den” (Mateyus 19:13). Yesus ben taigi na apostel Petrus: „Mi begi fayafaya gi yu taki yu no o lasi a bribi fu yu” (Lukas 22:32). Yesus ben gi den bakaman fu en deki-ati fu begi gi trawan, iya, fu begi srefi gi den sma di e frufolgu den èn di e taigi den hati sani.—Mateyus 5:44; Lukas 6:28.

Fu san ede wi musu tan begi?

Yesus ben poti ten na wan sei fu begi, èn a gi den bakaman fu en a deki-ati fu „begi ala ten èn fu no kon weri fu dati” (Lukas 18:1). Yehovah e gi wi a kari fu fruteri en fu den sani di e gi wi broko-ede. Te wi e tan du dati, dan wi e sori taki wi e frutrow en. Yesus ben taki: „Tan aksi, dan unu sa kisi.” Ma disi no wani taki dati Yehovah e draidrai fu gi piki tapu den begi fu den sma di lobi en, èn di e lespeki en leki wan Papa. Na presi fu dati, Yesus ben taki: „Fu dati ede, efu unu di abi takru fasi, sabi fa fu gi un pikin bun sani, dan a no abi misi taki a Tata di de na hemel sa gi santa yeye na den sma di e aksi en!”—Lukas 11:5-13.

Efu yu wani sabi moro, dan luku kapitel 17 fu a buku San Bijbel e leri wi trutru? *

[Futuwortu]