Suma na Gado?

FA YU ben o piki na aksi dati? Son sma feni taki den sabi Gado bun, fu di den e taki dati en na wan bun mati fu den. Tra sma e si Gado leki wan fara famiriman. Den e bribi taki a de, ma den no sabi furu fu en. Efu yu e bribi na ini Gado, dan fa yu ben o piki den aksi di skrifi na ondrosei?

1. Gado na wan trutru sma?

2. Gado abi wan nen?

3. Yesus na a Almakti Gado?

4. Gado e broko en ede nanga mi?

5. Gado e feni ala fasi fu anbegi bun?

Efu yu aksi sma fu piki den aksi disi, dan kande yu ben o kisi difrenti sortu piki. Fu dati ede, a no e fruwondru wi taki sma e fruteri ala sortu tori, èn den abi difrenti fowtu denki te a abi fu du nanga Gado.

Fu san ede den piki de prenspari

Di Yesus Krestes ben e taki nanga wan uma di ben e bribi na ini Gado, dan a ben sori en krin taki a de prenspari fu sabi suma na Gado trutru. Na uma disi, di ben de wan Samariasma, ben bribi taki Yesus ben de wan profeiti. Ma a no ben feni wan sani bun. A bribi fu Yesus ben e difrenti fu a bribi fu en. Di a taki fa a ben denki, dan Yesus taigi en krin: „Unu e anbegi san unu no sabi” (Yohanes 4:19-22). A de krin fu si  taki Yesus ben sori taki a no ala sma di abi wan bribi, sabi Gado trutru.

A de so taki den wortu fu Yesus e sori taki nowan sma kan kon sabi Gado trutru? Nôno. Yesus taigi na uma moro fara: „Den tru anbegiman o anbegi a Tata nanga yeye èn nanga waarheid, bika a Tata e suku den sortu sma disi fu anbegi en” (Yohanes 4:23). Yu na wan fu den sma di e anbegi Gado „nanga yeye èn nanga waarheid”?

A de tumusi prenspari taki yu kon sabi a piki tapu na aksi dati. Fu san ede? Yesus ben sori o prenspari a de fu abi soifri sabi, di a begi: „Efu sma wani kisi têgo libi, dan den musu tan leri sabi yu, a wan-enkri tru Gado, èn a sma di yu seni kon, Yesus Krestes” (Yohanes 17:3). Iya, efu yu wani libi na ini a ten di e kon, dan yu musu sabi den tru tori di abi fu du nanga Gado.

A de so trutru taki yu kan kon sabi den tru tori di abi fu du nanga Gado? Iya, dati kan! We, dan fa yu kan kon sabi dati? Disi na san Yesus ben taki fu ensrefi: „Mi na a pasi, a waarheid nanga a libi. Nowan sma kan kon na a Tata, efu mi no yepi en” (Yohanes 14:6). A ben taki tu: „Nowan sma sabi a Tata, boiti a Manpikin, nanga a sma di a Manpikin wani fu a kon sabi a Tata.”​—Lukas 10:22.

Sobun, a fasi fa wi kan kon sabi Gado, na te wi e luku den leri fu Yesus Krestes, a Manpikin fu Gado. Fu taki en leti, Yesus pramisi wi: „Efu unu tan du den sani di mi taki [noso leri], dan unu na mi disipel trutru; unu o sabi a waarheid èn a waarheid o meki unu kon fri.”​—Yohanes 8:31, 32.

We, dan fa Yesus ben o piki den feifi aksi di kari na a bigin?

[Prenki na tapu bladzijde 4]

Yu e anbegi wan Gado di yu no sabi trutru?