„San wi o nyan?”

NA A ten fu Yesus en diniwroko, sma ben e taki furu fu nyanyan nanga dringi. A fosi wondru fu en ben de taki a meki watra tron win, èn na tu okasi di a ben abi wan tu brede nanga fisi, a gi nyanyan na bigi grupu sma (Mateyus 16:7-10; Yohanes 2:3-11). Sma ben sabi Yesus leki wan man di ben go nyan nanga den pôtiwan, ma sosrefi nanga den gudusma. Fu taki en leti, den feanti fu Yesus ben taki dati a ben de wan gridiman èn taki a ben lobi dringi furu win (Mateyus 11:18, 19). A no de fu taki dati Yesus no ben de so. Ma Yesus ben sabi taki nyanyan nanga dringi ben de tumusi prenspari sani gi sma, èn na wan koni fasi a gebroiki den sani dati fu agersi sani di abi fu du nanga Gado.​—Lukas 22:14-20; Yohanes 6:35-40.

Sortu sani sma ben gwenti fu nyan èn dringi na ini a ten fu Yesus? Fa sma ben e sreka nyanyan? Omeni muiti sma ben musu meki fu sreka nyanyan? A piki tapu den aksi dati sa yepi yu fu frustan moro bun fa sani ben waka na son okasi èn san son sani di kari na ini den Evangelietori wani taki.

Gi wi „a brede di wi abi fanowdu gi a dei disi”

Di Yesus leri den disipel fu en fu begi, dan a tyari kon na krin taki a fiti fu aksi Gado fu sorgu gi den sani di wi abi fanowdu na ini a libi. A ben aksi efu Gado ben kan gi wi „a brede di wi abi fanowdu gi a dei disi” (Mateyus 6:11). Brede ben de so wan prenspari sani taki na ini Hebrewtongo nanga Grikitongo a wortu „nyan”, trutru wani taki „nyan brede”. Sma ben gwenti fu meki brede fu sani soleki tarwe, groto, èn sosrefi tra sani soleki haver, spelt nanga gierst. Den Dyu fu a fosi yarihondro ben gwenti nyan den sani disi. Ondrosukuman kon si taki na ini wán yari, wan sma ben e nyan sowan 200 kilo fu den sortu nyanyan dati, èn na so a ben kisi afu fu san a abi fanowdu fu krakti en skin.

Sma ben kan bai brede na wowoyo. Ma furu osofamiri ben baka den eigi brede, èn a sani disi ben de wan hebi wroko. Wan buku e taki: „A no makriki fu kibri blon fu wan langa pisi ten sondro fu a pori. Fu dati ede, ibri dei wan mama ben e mara sani tron blon.” O langa a ben e teki fu du dati? A skrifiman fu a buku e taki: „A ben de wan hebi wroko fu mara sani nanga wan anumiri. Na ini wán yuru, te wan sma ben e mara 1 kilo tarwe, dan a ben feni pikinmoro 0,8 kilo [sowan tu pontu] blon. Nofo tron wan sma ben e nyan sowan afu kilo tarwe wan dei. Sobun, wan sma di ben abi wan osofamiri fu feifi noso siksi sma, ben musu mara sani sowan dri yuru langa” (Bread, Wine, Walls and Scrolls).

Prakseri now Yesus en mama, Maria. Boiti den tra osowroko di a ben musu du, a ben musu meki nofo brede gi en masra, feifi manpikin,  nanga den tu noso moro umapikin fu en (Mateyus 13:55, 56). A no de fu taki dati neleki tra Dyu umasma, Maria ben e wroko tranga fu sreka ’a brede di den ben abi fanowdu gi a dei’.

„Un kon nyan”

Baka di Yesus kisi wan opobaka, a sori ensrefi fruku mamanten na wan tu fu den disipel fu en. Den disipel ben fisi heri neti sondro fu kisi wan sani. Yesus ben kari den mati fu en di ben weri, èn a ben taki: „Un kon nyan.” Ne a gi den fisi nanga brede fu nyan (Yohanes 21:9-13). Na ini a tongo di a pisi disi ben skrifi, den wortu „un kon nyan” trutru wani taki „kon nyan un mamanten nyanyan”. Aladi disi na a wan-enkri leisi taki den wortu mamanten nyanyan kari na ini den Evangelietori, toku sma ben abi a gwenti fu bigin a dei nanga a nyan di den ben e nyan brede, noto, korenti, noso olèif.

Fa a ben de nanga a brekten nyanyan? San sma di ben e wroko ben gwenti fu nyan? Wan buku e taki: „A brekten nyanyan no ben de wan hebi nyanyan. Den ben gwenti nyan brede, sani soleki karu nanga aleisi, olèif, nanga figa” (Life in Biblical Israel). A ben kan de so, taki den disipel ben abi den sani dati na den, di den ben drai kon baka fu Sikar, èn di den ben si Yesus e taki nanga wan Samaria uma na a peti. A ben de „wan ten fu twarfu yuru” èn den disipel „ben go na foto fu bai nyanyan-sani”.​—Yohanes 4:5-8.

Na mofoneti, osofamiri ben gwenti fu kon makandra fu nyan a moro prenspari nyanyan fu a dei. Wan buku e taki fu disi: „Furu sma ben e nyan brede noso papa di den ben meki fu groto, noso tra sani. Den ben e nyan sosrefi pesi èn wanwan leisi den ben e nyan tarwe. Den ben meki den sani dati nofo tron nanga sowtu nanga oli noso olèif. Wanwan leisi den ben meki wan sowsu, noso den ben gebroiki oni noso a watra fu sukru froktu” (Poverty and Charity in Roman Palestine, First Three Centuries C.E.). Na a brekten nyanyan den ben abi sosrefi merki, kasi, gruntu, froktu di den ben nyan leki fa den piki en fu a bon, noso froktu di den ben drei. Na a ten dati den ben abi sowan 30 difrenti sortu gruntu, soleki ayun, knofroku, radijs, wan sortu rutu, nanga koro. Boiti dati, na ini a kontren drape den ben e prani moro leki 25 difrenti froktu, soleki (1) figa, (2) dadel, nanga (3) granaki-apra.

Prakseri fa a ben o de efu yu ben de drape èn yu ben o si wan tu fu den sani disi na tapu tafra di Yesus ben e nyan wan neti nyanyan nanga Lasarus èn nanga den sisa fu en, Marta nanga Maria. Prakseri now o switi a ben smeri di Maria ben lobi Yesus futu nanga „trutru nardus-oli”. Iya, a switi smeri fu a nyanyan ben moksi nanga a switi smeri fu a diri oli.​—Yohanes 12:1-3.

„Te yu o sreka wan fesa”

Na wan tra okasi, di Yesus ben go nyan „na a oso fu wan edeman fu den Fariseiman”, dan a ben leri den sma drape wan prenspari sani. Yesus ben taki: „Te yu o sreka wan fesa, dan kari den pôtisma kon nanga den malengrisma nanga den sma di lan nanga den brenisma, dan yu o de koloku, bika den no abi noti fu pai yu baka. Bika  Gado o pai yu baka te den regtfardiki sma o opo baka” (Lukas 14:1-14). Efu a Fariseiman ben teki a rai fu Yesus, dan sortu nyanyan a ben poti gi sma fu nyan na so wan fesa?

Wan gudu sma kande ben gi den sma nyanyan soleki spesrutu brede di ben lontu noso di ben de tra fasi, èn di den ben meki kon moro switi nanga win, oni, merki, nanga spesrei. Botro nanga tranga kasi ben kan de tu na tapu tafra. A no de fu taki dati den ben poti sowtu olèif nanga olèif di den ben piki, noso olèif-oli na tapu tafra tu. Soleki fa wan buku e taki, dan „ibri sma ben e gebroiki sowan tutenti kilo olèif-oli na ini en nyanyan na ini wán yari. Boiti dati, den ben e lobi en gi den skin èn den ben gebroiki en fu leti den lampu” (Food in Antiquity).

Efu a Fariseiman ben e libi krosibei fu a se, dan kande en nanga den fisitiman fu en ben o nyan fisi di den fanga no so langa ete. Den sma di no ben e libi krosibei fu se, nofo tron ben nyan fisi di den ben sreka so taki a no pori, fu di den ben poti asin noso sowtu gi en. A ben kan de so tu, taki a sma di ben hori a fesa, ben gi den sma meti fu nyan, ma nofo tron den no ben gi dati na wan pôti fisitiman. Wan sani di den ben gwenti gi sma fu nyan, ben de sani di meki nanga eksi (Lukas 11:12). A kan de so taki den ben meki den sani disi moro switi fu di den ben poti spesrei na ini, soleki menti-wiwiri, dille-wiwiri, dyira, nanga mosterd siri (Mateyus 13:31; 23:23; Lukas 11:42). Baka a nyanyan, a kan taki den fisitiman ben e kisi switi sani fu nyan, soleki losi tarwe di den ben sreka nanga amandra, oni, nanga spesrei.

Den sma di ben go na wan fesa, ben kisi droifi fu nyan, sosrefi drei droifi, noso win di meki fu droifi. Na ini Palestina, sma feni dusundusun baki pe den ben e masi win èn disi e sori taki sma ben lobi fu dringi win. Na wan presi na ini Gibeon, sabiman di e ondrosuku owruten sani feni 63 kamra di den ben meki na ini stonbergi fu kibri win. Drape den ben kan kibri sowan 100.000 liter win.

„Noiti un musu broko un ede”

Te yu e leisi den Evangelietori, dan yu sa si taki Yesus e taki furu leisi fu nyanyan noso dringi na ini den agersitori fu en. Boiti dati, a ben gebroiki den sani dati tu fu leri sma prenspari sani te den ben de makandra fu nyan. A no de fu taki dati Yesus nanga den disipel fu en ben lobi fu nyan nanga dringi, spesrutu te den ben de makandra nanga bun mati. Ma den no ben meki den sani dati de a moro prenspari sani na ini den libi.

Yesus yepi den disipel fu en fu tan abi wan yoisti denki fu nyanyan nanga dringi, di a taigi den: „Noiti un musu broko un ede nanga sani èn un no musu taki: ’San wi o nyan?’ noso ’San wi o dringi?’ noso ’San wi o weri?’ Bika ala den sani disi na san den grontapusma e feti fu kisi. Bika un Tata na hemel sabi taki unu abi ala den sani disi fanowdu” (Mateyus 6:31, 32). Den disipel ben gi yesi na a rai disi, èn Gado ben sorgu gi den sani di den ben abi fanowdu (2 Korentesma 9:8). A tru taki yu no e nyan a srefi nyanyan leki den sma di ben e libi na ini a fosi yarihondro. Ma yu kan de seiker taki Gado sa sorgu gi yu efu yu e poti na anbegi fu en na a fosi presi na ini yu libi.​—Mateyus 6:33, 34.