OMENI leisi yu e luku yusrefi na ini wan spikri? Furu fu wi e du dati ibri dei, èn kande wi e du dati wan tu leisi wan dei. Fu san ede? Fu di wi wani si efu ala sani seti bun.

Te wan sma e leisi Bijbel, dan yu kan agersi dati nanga a luku di a e luku na ini wan spikri (Yakobus 1:23-25). A boskopu di skrifi na ini Gado Wortu, man yepi wi fu kon frustan sortu sma wi de trutru. A „e koti go so dipi taki a e prati sili nanga yeye srefi” (Hebrewsma 4:12). Sobun, Bijbel e tyari kon na krin san de na ini wi ati trutru. A e sori wi sortu kenki wi musu tyari kon, neleki fa wan spikri e sori wi san no seti bun na wi.

Bijbel no e sori wi nomo sortu kenki wi musu tyari kon, ma a e yepi wi tu fu du dati. Na apostel Paulus ben skrifi: „Na Gado srefi ben meki sma skrifi ala den sani di de na ini Gado Buku; den sani disi bun fu gi leri, fu frumane sma, fu poti sani kon reti, fu gi trangaleri na wan regtfardiki fasi” (2 Timoteyus 3:16, 17). A tekst e taki fu fo difrenti sani di kan meki wi kisi wini, ma te yu e luku en bun, dan dri fu den sani dati, namku fu frumane sma, fu poti sani kon reti èn fu gi trangaleri, abi fu du nanga kenki di wi musu tyari kon na ini a fasi fa wi e denki èn fa wi e handri. Efu wi e luku wisrefi ibri dei na ini wan spikri fu si efu ala sani seti bun, dan a no de fu taki dati a de moro prenspari fu leisi Gado Wortu ibri dei!

Di Yehovah Gado ben poti Yosua leki fesiman fu den Israelsma, dan a taigi en: „Yu musu tan taki fu a wet di skrifi na ini a buku disi. Dei nanga neti yu musu leisi en nanga wan safri sten, so taki yu kan du ala den sani di skrifi na ini. Te yu du dati, dan sani o waka bun gi yu èn yu o handri nanga koni” (Yosua 1:8). Iya, efu Yosua ben wani taki sani waka bun nanga en, dan a ben musu leisi Gado Wortu „dei nanga neti”, noso doronomo.

Na a srefi fasi, a fosi psalm e sori tu, sortu wini wi o kisi te wi e leisi Bijbel ibri dei. A psalm dati e taki: „Koloku fu a sma di no waka na ini a rai fu den ogriwan, èn na ini a pasi fu sondari a no tanapu, èn na ini a sturu fu den spotuman a no sidon. Ma a sani di e gi en prisiri, na a wet fu Yehovah, èn na ini a wet dati a e leisi nanga wan safri sten dei nanga neti. Fu tru, a sa tron leki wan bon di prani pe watra e lon pasa, di e gi en eigi froktu te en ten doro, èn den wiwiri fu en no e kon flaw, èn ala san a e du sa waka  bun” (Psalm 1:1-3). A no de fu taki dati yu wani de leki a man disi.

Furu sma abi a gwenti fu leisi Bijbel ibri dei. Di den aksi wan Kresten fu san ede a e leisi Bijbel ibri dei, dan a piki: „Efu mi e begi Gado ibri tron baka na ini wan dei èn efu mi e fruwakti taki a arki mi, dan mi musu arki Gado tu, fu di mi e leisi en Wortu ibri dei, a no so? Efu wi wani de bun mati nanga wan sma, dan wi no ben o meki a tra sma wawan taki, a no so?” A man disi abi leti. Te wi e leisi Bijbel, dan a de neleki wi e arki Gado, fu di wi o kon frustan fa a e denki fu sani.

Kande yu pruberi kaba fu bigin leisi Bijbel ibri dei. Yu leisi a heri Bijbel, fu a bigin te na a kaba? Dati na wan heri moi fasi fu kon sabi den sani di skrifi na ini Bijbel. Ma son sma bigin leisi Bijbel furu leisi kaba, ma baka wan pisi ten den no e leisi go doro. Dati pasa nanga yu tu? San yu kan du fu leisi a heri Bijbel? Fu san ede yu no e pruberi fu du den sani di e kon now?

Abi wan spesrutu ten ibri dei fu leisi Bijbel. Poti wan ten ibri dei te yu o man leisi Bijbel. Efu wan sani meki taki yu no man leisi Bijbel na a ten di yu poti, dan sorgu taki yu poti wan tra ten fu du dati. Na so fasi yu no o meki wan dei pasa sondro fu leisi Gado Wortu. Te yu du dati, dan yu o teki na eksempre fu den Bereasma fu owruten. Bijbel e taki fu den: „Den ben teki a wortu nanga den heri ati, èn den ben e ondrosuku Gado Buku finifini ibri dei fu si efu den sani disi ben tru.”​—Tori fu den Apostel 17:11.

Abi wan spesrutu marki na prakseri. Fu eksempre, efu yu e leisi dri te go miti feifi kapitel fu Bijbel ibri dei, dan yu kan leisi a heri Bijbel na ini wán yari. Na ini a schema di de na tapu den tra bladzijde, yu kan si fa yu kan du dati. Fu san ede yu no e bosroiti fu gebroiki a schema dati? Na ondro a pisi pe skrifi „Dei”, yu kan skrifi sortu dei yu o leisi den kapitel. Te yu kaba leisi den kapitel fu wan dei, dan yu kan poti wan marki na ini a faki. Te yu du dati, dan yu o man si o furu yu leisi kaba.

Efu yu leisi a heri Bijbel kaba, dan yu no abi fu tapu drape. Yu kan gebroiki a srefi schema fu leisi a heri Bijbel ibri yari. Kande yu kan bigin ibri leisi na wan tra pisi. Noso efu yu no man leisi so furu, dan yu kan teki tu noso dri dei fu leisi den kapitel di yu ben o leisi na ini wán dei.

Ibri leisi te yu e leisi Bijbel, yu sa feni nyun sani di yu kan fiti na ini yu libi, iya, yu o feni sani di yu no ben sabi bifo. Fu san ede? Fu di „a komedi-prei fu grontapu e kenki” èn a libi fu wi e kenki doronomo tu (1 Korentesma 7:31). Fu dati ede, teki a fasti bosroiti fu leisi ibri dei na ini Gado Wortu, Bijbel, di de leki wan spikri. Na so fasi, yu kan de seiker taki yu e meki Gado taki nanga yu ibri dei.​—Psalm 16:8.