San Yesus ben leri sma fu ensrefi

„Yesus ben sabi soifri suma a ben de, pe a ben komoto, fu san ede a kon na grontapu, èn san ben o pasa nanga en.”—SKRIFIMAN HERBERT LOCKYER.

FOSI wi kan poti bribi na ini den sani di Yesus leri, wi musu sabi wan tu sani fu en. Suma ben de Yesus trutru? Pe a ben komoto? San ben de a moro prenspari sani na ini en libi? Na ini den Evangelietori fu Mateyus, Markus, Lukas, nanga Yohanes, wi kan leisi san Yesus srefi ben taki.

A ben de na libi kaba fosi a gebore na grontapu Yesus ben taki wan leisi: „Fosi Abraham ben de, mi ben de kaba” (Yohanes 8:58). Abraham ben libi sowan 2000 yari bifo Yesus gebore. Ma Yesus ben libi kaba srefi bifo Abraham ben libi. Ma pe Yesus ben libi? A ben taki: „Mi . . . saka komoto fu hemel.”—Yohanes 6:38.

A Manpikin fu Gado Yehovah abi furu yeye manpikin. Ma Yesus na wan spesrutu wan. A ben kari ensrefi „a wan-enkri Manpikin di Gado srefi meki” (Yohanes 3:18). Disi wani taki dati Yesus na a wan-enkri wan di Gado meki langalanga. Nanga yepi fu a wan-enkri Manpikin disi Gado meki ala tra sani.—Kolosesma 1:16.

„A Manpikin fu libisma” Yesus ben gebroiki den wortu disi moro furu te a ben taki fu ensrefi (Mateyus 8:20). Sobun, a sori taki a no ben de wan engel di teki libisma skin. Na presi fu dati, a ben de wan trutru libisma. Nanga yepi fu en santa yeye, Gado teki a libi fu en Manpikin na hemel, èn a poti en na ini a bere fu a nyunwenke Maria. Na so Maria kon de nanga bere. Leki bakapisi fu dati, Yesus gebore leki wan libisma di no abi sondu.—Mateyus 1:18; Lukas 1:35; Yohanes 8:46.

A Mesias di Gado pramisi ’Mi sabi taki a Mesias o kon’, na so wan Samaria uma ben taigi Yesus. Yesus piki en: „We, mi di e taki nanga yu, na a sma dati” (Yohanes 4:25, 26). Neleki a wortu „Krestes”, a wortu „Mesias”, wani taki „Salfuwan”. Yesus ben salfu, dati wani taki dati Gado poti en fu du wan spesrutu wroko fu meki den pramisi fu Gado kon tru.

A moro prenspari wroko fu en Yesus ben taki wan leisi: „Mi musu go fruteri a bun nyunsu fu Gado kownukondre na tra foto tu, bika na fu disi Gado ben seni mi kon” (Lukas 4:43). Aladi Yesus ben du furu bun sani gi sma di ben de na nowtu, toku a moro prenspari sani na ini en libi ben de a preiki fu a bun nyunsu fu Gado Kownukondre. Na ini wan fu den artikel di e kon wi o taki san Yesus ben leri sma fu a Kownukondre dati.

A no de fu taki dati Yesus ben de wan spesrutu sma. * Soleki fa wi o si, dan a libi di a ben abi na ini hemel, ben abi krakti tapu den sani di a taki na grontapu. Dati meki a no e fruwondru wi taki a ben preiki wan boskopu di ben o abi krakti tapu a libi fu milyunmilyun sma na heri grontapu.

[Futuwortu]