Yu ben sabi a sani disi?

Sma ben mag piki nyanyan di ben tan abra baka a kotiwroko. Suma ben kisi wini fu a seti disi?

▪ A Wet di Gado ben gi Moses ben taki dati gronman no ben mag koti ala a nyanyan na den gron. Na presi fu dati, den wan di ben koti na aleisi no ben musu koti ala a nyanyan na den lanki fu a gron. Den wan di ben koti droifi no ben musu piki den droifi di ben fadon èn den no ben musu go baka fu koti den droifi di no ben lepi a fosi leisi. Boiti dati, den wan di ben naki den olèif puru na den bon, ben musu libi den froktu di no ben fadon (Lefitikus 19:9, 10; Deuteronomium 24:19-21). Den pôtiwan, den pikin sondro papa nanga mama, den uma di lasi den masra na ini dede, nanga den trakondre sma ben kan piki a nyanyan di ben tan abra baka a kotiwroko.

A wet disi ben tyari wini kon gi ala den Israelsma. A ben gi a gronman deki-ati fu sori switifasi gi trawan, fu no denki ensrefi nomo, èn fu abi a frutrow taki Gado ben o blesi en. Den sma di ben piki a nyanyan di ben tan abra, ben kisi a deki-ati fu wroko tranga, fu di a sani disi ben de wan hebi wroko (Rut 2:2-17). A seti disi ben sorgu taki den pôtiwan no dede fu angri noso taki den tron wan hebi gi trawan. Boiti dati, den no ben abi fu firi taki den no warti noti, fu di den ben musu begi sma sani noso fu di den ben o abi fu wakti fu kisi sani fu trawan.

Fu san ede Salomo ben seni teki udu te na Libanon fu bow a tempel na ini Yerusalem?

▪ A tori na ini 1 Kownu 5:1-10 e taki fu wan kruderi di Salomo ben meki nanga Kownu Hiram fu Tirus. Soleki fa a kruderi ben taki, dan den ben o tyari sedre-udu nanga yaneifer-udu abra se, fu Libanon go na Israel. Den ben gebroiki na udu dati fu bow a tempel.

Sma ben du bigi bisnis nanga sedre-udu na Mindri Owstusei fu owruten. Na ini Egepte nanga Mesopotamia, sma ben gwenti gebroiki na udu disi fu meki postu gi tempel nanga kownu-oso. Na ini den buku di e taki fu a tiri fu kownu, nanga den sani di skrifi na tapu ston, e sori taki doronomo sma ben teki sedre-udu na difrenti foto na zuidsei fu Mesopotamia. Son leisi den ben teki na udu disi te den ben wini wan feti, noso den ben teki en leki pai. Na ini Egepte sma ben gebroiki sedre-udu fu bow langa boto gi Kownu, èn fu meki dedekisi nanga tra sani gi wan beri.

Sma ben sabi den sedre-udu fu Libanon spesrutu fu di den ben tan bun fu wan langa pisi ten, den ben moi èn den ben smeri switi. Boiti dati, sani leki udu-loso no e go na a sedre-udu. Sobun, Salomo ben gebroiki a moro bun udu fu bow a tempel. Na ini a ten disi, yu no abi furu fu den bon disi moro di ben lai fositen na tapu den bergi na ini Libanon.

[Prenki na tapu bladzijde 15]

Wan prenki di meki na ini ston na a kownu-oso fu Sargon fu Asiria, e sori fa sma ben tyari sedre-udu fu Libanon

[Sma di abi a reti fu a prenki]

Erich Lessing/​Art Resource, NY