Yu ben sabi a sani disi?

Suma ben de „den wan fu na oso fu Caesar” di seni odi nanga Paulus gi den Kresten na ini Filipi?

▪ Na a pisi ten fu a yari 60 te go miti 61, na apostel Paulus ben de na ini Rome di a skrifi a gemeente na ini Filipi èn a Caesar di a ben taki fu en ben de Kèiser Nero. Ma suma na ini na oso fu Nero ben o seni odi gi den Kresten na ini Filipi?​—Filipisma 4:22.

A ben o fowtu fu denki taki den wortu „na oso fu Caesar” musu abi fu du nanga den krosibei famiri fu a kèiser. Na presi fu dati, den wortu abi fu du nanga ala den sma di ben e wroko gi a kèiser. Dati ben de den srafu nanga friman di ben de na ini Rome èn sosrefi na ini den tra distrikt. Sobun, den wortu „na oso fu Caesar” abi fu du nanga ala den dusundusun futuboi fu en. Den ben abi difrenti frantwortu fu orga a wroko èn fu du pikinpikin wroko na ini den oso fu a kèiser nanga na den gron fu en. Sonwan fu den ben abi wan posisi na ini a tirimakti sosrefi.

Soleki fa a sori, sonwan fu den futuboi fu a kèiser di ben de na ini Rome, ben tron Kresten. Ma wi no sabi seiker efu den ben tron Kresten fu di Paulus ben preiki gi den na ini Rome. Awinsi fa a no fa, den ben wani sabi fa a ben go spesrutu nanga a gemeente na ini Filipi. Filipi ben de na ondro a tiri fu Rome èn furu srudati nanga lantiman di ben go nanga pensyun ben libi drape na ini Filipi. Fu dati ede, di den Kresten na ini Rome ben seni odi nanga Paulus gi den sma na ini Filipi, dan a kan de so taki den ben de mati.

A Wet fu Moses ben taki dati efu wan man dede sondro fu meki pikin, dan en brada ben musu trow nanga a wefi fu en. Fu san ede a wet disi ben de?

▪ Na ini owruten Israel a ben de so taki efu wan man dede sondro fu meki wan manpikin, dan en brada ben musu trow nanga a wefi fu en so taki a ben kan meki pikin fu meki a nen fu a man di dede, no lasi gowe (Genesis 38:8). Bakaten, a seti disi ben kon na ini a Wet fu Moses (Deuteronomium 25:5, 6). Den sani di Boas ben du soleki fa skrifi na ini a Bijbel buku Rut, e sori taki a plekti disi ben de tu gi tra mansma na ini a famiri fu a man di dede efu a man no ben abi brada di de na libi moro.​—Rut 1:3, 4; 2:19, 20; 4:1-6.

A seti disi ben de ete na ini a ten fu Yesus, fu di den Saduseiman ben taki fu en soleki fa skrifi na ini Markus 12:20-22. A Dyu historia skrifiman Flavius Josephus fu a fosi yarihondro, ben taki dati a seti disi ben meki taki a nen fu a famiri no lasi gowe. Boiti dati, a ben meki tu taki den gudu ben tan na ini a famiri èn taki na uma di lasi en masra na ini dede ben kan sorgu ensrefi. Na ini a ten dati, a wefi no ben abi a reti fu kisi den gudu fu en masra. Te wan man ben trow nanga a wefi fu en brada di dede, èn wan pikin ben gebore, dan a pikin dati ben kisi den gudu fu a man di dede.

A Wet ben gi pasi taki wan famiriman ben mag weigri fu trow nanga a wefi fu en brada di dede. Ma te wan man ben weigri fu „kisi wan manpikin gi en brada”, dan sma ben si dati leki wan syen.​—Deuteronomium 25:7-10; Rut 4:7, 8.