Yu ben sabi a sani disi?

Yesus ben taigi Saulus: „Yu e meki en moro muilek gi yusrefi te yu e tan kakafutu gi mi, neleki te wan kaw e skopu a tiki fu en basi” (Tori 26:14). San Yesus ben wani taki nanga a sani dati?

▪ Na ini Bijbel ten, gronman ben e gebroiki srapu tiki fu tiri den meti fu den di ben e plugu a gron. A tiki disi ben langa sowan 2,5 meter èn a wan sei fu en ben abi wan srapu isri penti. Efu a meti ben e go nanga baka, dan a tiki ben kan dyuku en, èn a ben kan kisi mankeri. A tra sei fu a tiki ben abi wan sortu nefi di a gronman ben e gebroiki fu puru doti, tokotoko, noso grasi fu a plugu.

Son leisi, sma ben e gebroiki den tiki disi leki fetisani. Samkar, a krutuman nanga fetiman fu Israel, ben kiri 600 Filisteasma „nanga wan langa, srapu tiki”.​—Krutuman 3:31.

Bijbel e gebroiki a wrokosani disi na wan agersifasi tu. Fu eksempre, Kownu Salomo ben skrifi taki den sani di wan koni sma e taki „de leki srapu tiki” di sma ben e gebroiki fu tiri meti, fu di den e gi wan sma deki-ati fu teki bun bosroiti.​—Preikiman 12:11.

Baka di Yesus kisi wan opobaka, a gebroiki wan srefi sortu agersitori. A ben gi Saulus, di ben e frufolgu den Kresten, a rai fu no ’tan kakafutu gi en neleki te wan kaw e skopu a tiki fu en basi’. Den wortu dati e meki wi prakseri wan tranga-ede meti di e weigri fu gi yesi na en basi di e dyuku en nanga a tiki fu en. A bun taki Saulus gi yesi na a rai fu Yesus èn taki a drai en libi. Te fu kaba a tron na apostel Paulus.

Fa den Dyu fu a fosi yarihondro ben sabi o lati a de te neti?

▪ Den Dyu fu a fosi yarihondro ben e gebroiki wan oloisi di ben e wroko nanga yepi fu a son, fu kon sabi o lati a de na deiten. Ma te wolku ben e tapu a son, noso te neti ben fadon, dan den ben e gebroiki wan klepsidra (wan oloisi di e wroko nanga yepi fu watra). Boiti den Dyu, den Egeptesma, den Persiasma, den Grikisma, nanga den Romesma fu owruten ben e gebroiki na oloisi disi tu.

Soleki fa wan buku e taki, dan a Misjna nanga a Talmud e taki fu a klepsidra, ma den e gebroiki difrenti nen gi na oloisi disi. Kande dati na fu sori taki difrenti sortu fu den oloisi disi ben de, ma den alamala ben e du a srefi sani. Na ini Grikitongo a nen klepsidra wani taki dati wani sani e lon komoto na ini wan sani safrisafri, noso e lon gowe safrisafri. Dati meki a nen ben fiti na oloisi disi, fu di safrisafri watra ben e dropu komoto na ini den baki fu na oloisi disi (The Jewish Encyclopedia).

Fa a klepsidra ben e wroko? Watra ben e lon komoto na ini wan pikin olo di ben de na ondrosei fu wan baki èn a ben e fadon go na ini wan trawan. Den baki ben abi marki na ini di ben kan yepi sma fu si omeni ten ben pasa fosi na tapusei beki ben leigi, noso fosi na ondroseiwan ben furu.

Na ini den srudati-kampu fu den Romesma, sma ben e gebroiki den sortu oloisi disi fu sori den waktiman o lati a wakti fu den ben e bigin te neti. Te wan tra waktiman ben musu kon hori wakti, dan sma ben e bro wan trompeti. Iniwan sma di ben e yere a trompeti ben o sabi o ten ibriwan fu den fo pisi ten fu hori wakti ben bigin, noso ben kon na wan kaba.​—Markus 13:​35.