WI ALAMALA wani taki sma lobi wi. Na dati yu wani tu?— * Bijbel e fruteri wi fu Dorkas, wan uma di sma ben lobi srefisrefi.

Dorkas ben e libi na ini Yope, wan foto krosibei fu a Mindrikondre Se. Yerusalem ben de 56 kilometer moro fara fu Yope. Dorkas ben de wan fu den fosi disipel fu Yesus.

San yu denki? Fu san ede sma ben lobi Dorkas so?— We, Bijbel e taki dati a ben e du furu bun sani gi trawan èn a ben e gi den moi kado. Soleki fa a sori, a ben gwenti meki moi krosi gi umasma di masra ben dede kaba. Boiti dati, a ben fruteri furu sma fu a tru Gado, Yehovah, neleki fa Yesus ben du dati.

Yu sabi san e pasa nanga Dorkas now?— A e kon siki srefisrefi èn a e dede. Ala den  mati fu en e sari. Dati meki den e seni sma go na a presi pe Petrus e tan, sowan 16 kilometer moro fara. Den sma disi e aksi en fu kon wantewante. Te Petrus doro, a e go na sodro pe Dorkas de. Ala den uma e krei èn den e sori en den krosi di Dorkas ben meki gi den.

Dan Petrus e taigi ala sma fu komoto na ini a kamra. Petrus nanga den tra apostel du wondru kaba, ma noiti wan fu den wiki wan dede sma. San yu denki taki Petrus e du now?—

Petrus e saka kindi na sei a dedeskin èn a e begi Yehovah. Dan a e taigi Dorkas fu opo. Èn na dati Dorkas e du tu! Petrus e langa en anu gi en èn a e yepi en fu opo. Now a e kari den tra uma nanga den tra sma di de drape kon na inisei èn a e sori den Dorkas. Fa yu denki taki den sma drape ben e firi?—

Meki wi luku now san wi kan leri fu na opobaka fu Dorkas. Wán sani di wi e leri, na taki te yu e yepi trawan, dan furu fu den o lobi yu. Ma san moro prenspari, na taki Gado o memre yu èn a o lobi yu. Noiti a o frigiti den bun sani di yu du gi tra sma. Èn a o blesi yu nanga têgo libi na ini a nyun grontapu fu en pe retidu o de.