Wan sma de di de frantwortu gi ala ogridu?

„MI SEKI anu nanga Didibri.” Na so a komandanti fu a legre fu den Verenigde Naties na ini Rwanda ben taki. A ben taki a sani disi fu di a legre fu den no ben du noti fu tapu sma fu kiri makandra na ini a kondre dati na a ten fu 1994. Disi na san wan tra sma ben taki fu den tumusi ogri-ati sani di ben pasa na a ten dati: „Efu wan sma e prefuru ete fu taki dati Satan no de, dan meki a miti mi na wan fu den olo na ini Rwanda pe den beri ipi-ipi sma.” A tru taki na Didibri de frantwortu gi den ogri-ati sani dati?

Furu sma no wani bribi taki na wan ogri yeye di wi no man si e meki sma du ala sortu ogri-ati sani. Furu sma feni taki den sani disi e pasa fu di libisma gebore nanga takru fasi. Den feni tu taki na a ogri di rutu na ini sma ati na a moro prenspari sani di e meki taki ogri de. Tra sma abi a denki taki na wan sortu organisâsi fu gudu èn makti sma di e wroko kibrikibri na heri grontapu e kori sma omeni tenti yari kaba, soso fu man tiri grontapu. Dan yu abi sma tu di feni taki den tirimakti nanga den tiriman fu grontapu de frantwortu gi na ogri nanga a pina di lai na grontapu.

Ma san yu e denki? Fu san ede ogridu nanga pina lai so na heri grontapu aladi sma e du furu muiti fu sorgu taki den sani disi no e pasa moro? Fu san ede a gersi leki libisma e waka langalanga go suku problema gi densrefi, aladi den e kisi warskow doronomo? Wan sma de di de frantwortu gi ala den ogri di e pasa? Suma e tiri grontapu trutru? Kande a piki tapu na aksi disi sa fruwondru yu.