Bijbel e kenki sma libi

SAN meki taki wan fufuruman di ben lobi dòbel tapu nanga a takru gwenti dati, èn kenki en libi? Luku san a abi fu taki.

„Mi ben lobi asi streilon.”​—RICHARD STEWART

A GEBORE NA INI 1965

KONDRE: YAMAIKA

A BEN DE WAN OGRIMAN DI BEN E DÒBEL

A LIBI FU MI FOSI: Mi gro kon bigi na ini Kingston, a mamafoto fu Yamaika. A presi pe wi ben e libi ben de wan pôtisma birti pe wan lo sma ben e tan. Furu sma drape no ben abi wroko èn ogridu ben lai na ala sei. Grupu ogriman ben e tapu skreki gi sma drape. Pikinmoro ibri dei mi ben e yere fa gon e sutu.

Mi mama ben e wroko tranga èn a ben du ala san a man gi mi, mi pikin brada, nanga mi pikin sisa. Mi mama ben sorgu taki wi kisi bun skoroleri. Mi no ben lobi skoro, ma mi ben lobi asi streilon. Mi ben nyan skoroyuru soso fu go na a presi pe den asi streilon ben e hori. Mi ben e rèi den asi srefi.

Fosi yu denki mi bigin teki en leki wan gwenti fu poti moni tapu den asi di ben e lon na ini den streilon. Mi ben e libi wan yayolibi fu di mi ben de wan meidman. Mi ben e smoko marwana èn mi ben e broko go na ini sma presi fu go fufuru, soso fu man abi moni. Mi ben abi furu gon, ma mi breiti now taki nowan sma lasi libi den someni leisi di mi ben e go fufuru.

Te fu kaba, skowtu kisi mi èn den seni mi go na strafu-oso gi den ogri di mi ben du. Di den lusu mi, mi go doro nanga a srefi libi di mi ben abi fosi. Fu taki en leti, mi ben kon moro ogri leki bifo. Aladi a no ben de fu si na mi fesi taki mi ben de wan ogriman, toku mi ben de nomonomo fu du san mi wani, mi ben e mandi esi-esi, èn mi ben abi ogri-ati fasi. Mi no ben e broko mi ede nanga nowan sma, ma mi ben e prakseri misrefi nomo.

A FASI FA BIJBEL KENKI MI LIBI: Na ini a muilek pisi ten disi fu mi libi, mi mama bigin studeri Bijbel èn a tron wan fu den Kotoigi fu Yehovah. Mi ben si den moi fasi di mi mama ben kon abi èn fu dati ede mi bosroiti fu kon sabi fu san ede a ben kenki. Na so mi bigin taki fu Bijbel nanga den Kotoigi.

Mi ben kon si taki den Yehovah Kotoigi ben e leri sma heri tra sani leki den tra kerki. Boiti dati, ala san den Kotoigi ben e taki ben komoto fu Bijbel. Den ben de a wan-enkri grupu di mi ben sabi leki sma di e preiki oso fu oso, soleki den fosi Kresten (Mateyus 28:19; Tori fu den apostel 20:20). Di mi si fa den ben e sori trutru lobi gi makandra, dan mi kisi na overtoigi taki mi feni a tru bribi.​—Yohanes 13:35.

Den sani di mi ben leri fu Bijbel ben meki mi frustan taki mi ben musu tyari bigi kenki kon na ini mi libi. Mi kon si taki Yehovah Gado no lobi en te sma e du hurudu èn efu mi ben wani plisi en, dan mi ben o abi fu tapu nanga den sani di ben e doti mi skin (1 Korentesma 7:1; Hebrewsma  13:4). A ben naki mi ati di mi kon sabi taki Yehovah abi firi èn taki den sani di mi e du kan hati en, noso den kan meki a prisiri (Odo 27:11). Fu dati ede mi bosroiti fu no smoko marwana moro, fu no abi nowan gon moro, èn fu kenki den fasi fu mi. Den moro muilek kenki di mi ben musu tyari kon, na taki mi ben musu tapu nanga a yayolibi fu mi èn nanga a dòbel di mi ben e dòbel.

Na a bigin, mi no ben wani taki den mati fu mi kon sabi taki mi ben e studeri Bijbel nanga Yehovah Kotoigi. Ma mi bigin denki tra fasi di mi leisi Mateyus 10:33 pe Yesus e taki: „Efu wan sma e taigi trawan taki a no sabi mi, dan mi o taigi mi Tata na hemel tu taki mi no sabi a sma dati.” A sani dati gi mi deki-ati fu taigi den mati fu mi taki mi ben e studeri nanga den Kotoigi. Den ben skreki srefisrefi. Den no ben man bribi taki wan sma leki mi ben wani tron wan Kresten. Ma mi taigi den taki mi no ben wani abi noti fu du moro nanga a libi di mi ben abi fosi.

DEN WINI DI MI KISI: Mi mama ben breiti srefisrefi di a si taki mi bigin hori misrefi na Bijbel gronprakseri. Now a no e frede moro taki mi o go du ogri. Wi e taki nanga makandra fu wan sani di wi ala tu abi, èn dati na lobi gi Yehovah. Son leisi mi e prakseri baka fa mi libi ben de èn mi no man bribi sortu bigi kenki mi ben man tyari kon nanga yepi fu Gado. Mi no e angri moro fu libi wan yayolibi èn fu feti baka gudu, soleki fa mi ben du fosi.

Efu mi no ben gi yesi na a Bijbel boskopu, dan tide na a dei mi no ben o de na libi moro, noso mi ben o de na strafu. Ma now mi abi wan koloku osofamiri di mi lobi trutru. A e gi mi furu prisiri fu dini Yehovah Gado makandra nanga mi wefi di e horibaka gi mi èn mi umapikin di e tyari ensrefi bun. Mi de Yehovah tangi taki a gi mi na okasi fu de na mindri den Kresten brada nanga sisa di lobi makandra. Mi breiti srefisrefi taki wan sma du muiti fu leri mi den tru tori fu Bijbel. Boiti dati, mi e warderi den okasi di mi abi fu yepi trawan fu kon sabi san Bijbel e leri. Ma a moro bigi sani di Yehovah Gado du gi mi, na taki a sori bun-ati gi mi fu di a hari mi kon na en.

[Prenspari pisi na tapu bladzijde 11]

„Mi kon sabi taki Yehovah abi firi èn taki den sani di mi e du kan hati en, noso den kan meki a prisiri”

[Prenki na tapu bladzijde 11]

Mi ben si den moi fasi di mi mama ben kon abi

[Prenki na tapu bladzijde 11]

Mi, mi wefi, èn mi umapikin