Bijbel e kenki sma libi

SAN meki taki wan man di ben e prani tabaka libi a wroko dati èn a bribi di a ben abi langa ten kaba? Fa wan uma di ben lobi dringi sopi feni a krakti fu kenki a libi fu en? Leisi san den sma disi abi fu taki.

„Mi breiti taki mi de na ini a bigi famiri disi.”​—DINO ALI

A GEBORE NA INI 1949

KONDRE: AUSTRALIA

A BEN DE WAN SMA DI BEN E PRANI TABAKA

A LIBI FU MI FOSI: Na ini 1939, mi papa nanga mama froisi komoto na Albania fu go libi na Mareeba, wan pikin foto na ini Queensland, Australia. Furu Bosniasma, Grikisma, Italiasma, Serfiasma, nanga tra sma sosrefi kon tan na ini a kontren disi. Den kon nanga den eigi denki fu san bun èn san no bun, den eigi gwenti, nanga den eigi kulturu. Mareeba ben de wan kontren pe furu sma ben e prani tabaka, èn mi papa nanga mama bigin prani a sani dati tu.

A no teki langa fosi mi bigi sisa gebore, baka en den tu bigi brada fu mi, èn mi gebore leki lastiwan. A de wan sari sani, taki di mi ben abi wán yari, mi papa dede fu di en ati tapu. Mi mama trow baka èn a kisi ete fo boi. Wi alamala gro kon bigi na a presi pe mi kwekipapa ben e prani tabaka.

Mi ben de wan tini ete di mi gowe libi oso. Di mi trow nanga mi wefi Saime, mi no ben tapu 25 yari ete. Fu di wi ala tu ben de Moslim, meki wi trow na ini a Moslim kerki na ini a kontren fu wi. Ala mi omu, tanta, nanga den pikin fu den ben de Moslim. Mi ben leisi a Koran nanga wan buku di ben e taki fu a libi fu a profeiti Mohammed. Ma mi ben e leisi wan pikin Bijbel tu. A Koran e taki fu profeiti di Bijbel e taki fu den tu èn fu di mi ben leisi Bijbel, meki mi kon frustan o ten den man disi ben libi.

Yehovah Kotoigi ben gwenti kon na mi oso èn den ben e libi tijdschrift nanga buku, di mi nanga Saime ben lobi leisi. Mi sabi ete fa wi ben gwenti abi moi takimakandra fu difrenti tori di ben abi fu du nanga na anbegi fu Gado. Ibri leisi den Kotoigi piki den aksi fu mi nanga yepi fu Bijbel. Noiti den kon nanga den eigi denki. A sani dati ben naki mi ati trutru.

 Den Kotoigi aksi mi efu mi ben wani studeri Bijbel èn den kari mi kon na den konmakandra fu den, ma noiti mi ben wani go. San ben prenspari gi mi, na taki mi ben wani abi mi eigi gron èn wan bigi osofamiri. Noiti mi kon abi mi eigi gron, ma mi tron a papa fu feifi pikin di mi lobi srefisrefi.

A FASI FA BIJBEL KENKI MI LIBI: Neigi yari baka di mi miti den Yehovah Kotoigi fu a fosi leisi, mi ben de wan Moslim ete. Ma mi ben breiti te den ben e tyari den buku fu den kon gi mi èn mi ben lobi leisi den alamala. Ibri sonde mi nanga Saime ben e meki ten fu leisi den buku disi. Wi kibri ala den tijdschrift di wi kisi na ini den yari di pasa. Den ben de wan yepi gi mi te trawan ben e suku fu swaki a bribi di ben e gro na ini mi ati.

Fu eksempre, mi ben miti wan domri fu wan Evangelie Kerki di ben e pruberi fu dwengi mi fu teki Yesus leki mi Frulusuman. A ben man overtoigi a brada fu Saime nanga wan fu den afu brada fu mi fu tron bakaman fu en. Heri esi, sma di mi ben sabi fu difrenti kerki, bigin pruberi fu hari mi kon na ini a kerki fu den. Sonwan fu den gi mi buku nanga tra sani di ben e krutu Yehovah Kotoigi. Mi ben e aksi den sortu sma disi fu sori mi na ini Bijbel fu san ede den ben e bribi den sani di den ben e leri sma, ma noiti den ben man piki den aksi fu mi.

Fu di sma ben e gens mi so, meki mi go ondrosuku Bijbel moro fini nanga yepi fu den buku di mi ben kisi fu den Kotoigi. Te fu kaba, mi kon si taki mi ben musu bigin du san mi ben e leri.

Aladi den Kotoigi no ben e studeri Bijbel nanga mi, toku mi bigin go na den konmakandra fu den. Na a bigin mi ben e senwe trutru èn mi ben e syensyen, ma na den konmakandra dati mi miti furu sma di ben abi switifasi èn mi ben lobi den sani di mi ben e leri. Te fu kaba mi teki a bosroiti fu tron wan Yehovah Kotoigi èn na ini 1981 mi teki dopu fu sori taki mi ben gi misrefi abra na Gado.

Mi wefi no ben e gens mi, ma son leisi a ben e aksi ensrefi efu sma no ben e kori mi. Toku a kon na a dopu fu mi. Mi tan fruteri en den someni tru tori di mi ben e leri. Pikinmoro wán yari baka di mi teki dopu, wi ben e komoto na fakansi e rèi go na oso, di Saime taigi mi taki a ben wani tron wan Kotoigi. Mi skreki so te taki pikinmoro mi rèi komoto fu a pasi! A teki dopu na ini 1982.

A no ben makriki fu tyari kenki kon na ini a fasi fa wi ben e libi. Mi ben tapu fu prani tabaka fu di a sani dati no ben e kruderi nanga Bijbel gronprakseri (2 Korentesma 7:1; Yakobus 2:8). A teki pikinso ten fosi wi feni wan wroko di fiti wan Kresten èn di ben e yepi wi fu sorgu wisrefi. Wan tra sani, na taki furu yari baka dati, son famiriman ben e weigri ete fu kon na wi oso. Ma wi pruberi fu sori lobi gi den soleki fa Bijbel e taki. Te fu kaba sani kenki èn den no ben e koti pasi moro gi wi.

DEN WINI DI MI KISI: Difrenti tesi miti mi. Iya, mi ben musu leri fu no syensyen tumusi,  mi ben musu leri tu san fu du te mi ben abi moni problema, noso te mi famiri ben e gens mi. Ala den sani disi meki mi kon si o furu pasensi Yehovah Gado abi, fu di a yepi mi nanga den problema fu mi. Fu eksempre, now mi e dini leki gemeente owruman èn nofo tron mi musu gi leri komoto fu a podium. A sani disi no makriki gi mi, fu di mi e gagu te mi e senwe. Ma fu di mi e begi fayafaya èn fu di Yehovah e yepi mi, meki mi man tyari a frantwortu fu mi.

Mi nanga mi wefi e frustan makandra moro bun now èn a prenspari srefisrefi gi wi taki wi man feni en bun nanga makandra. Di wi ben e kweki den pikin fu wi, wi meki fowtu, ma wi du muiti fu meki den tru tori fu Bijbel saka go dipi na ini den ati (Deuteronomium 6:6-9). Now a moro bigi manpikin fu mi nanga a wefi fu en e dini leki zendeling srefi.

Mi e memre ete fa mi ben e firi wan leisi, syatu baka di mi nanga mi osofamiri bigin go na den konmakandra fu den Kotoigi. Di mi rèi go poti a wagi fu mi, dan fosi wi komoto na ini a wagi, mi luku den sma na ini a konmakandra presi. Ne mi aksi mi osofamiri: „San unu e si?” Wi ben e si ala sortu sma, sma fu difrenti kulturu nanga sma di e taki difrenti tongo. Yu ben abi sma fu na Aborigin lo, Albaniasma, Australiasma, nanga Krowâsiasma. Toku den alamala ben e prisiri fu moksi nanga makandra. Mi breiti taki mi de na ini a bigi famiri disi fu Kresten brada nanga sisa di no de fu feni na ini Australia wawan, ma na heri grontapu sosrefi.​—1 Petrus 5:9.

„Mi sisa noiti no drai baka gi mi.”​—YELENA VLADIMIROVNA SYOMINA

A GEBORE NA INI 1952

KONDRE: ROSIAKONDRE

A BEN DE WAN SMA DI BEN E DRINGI FURU SOPI, A PRUBERI FU KIRI ENSREFI

A LIBI FU MI FOSI: Mi gebore na ini Krasnogorsk, wan pikin foto krosibei fu Moskow, pe furu dyugudyugu no ben e pasa. Mi kweki na ini wan famiri fu sma di ben e gi leri na skoro. Mi ben man leri bun na skoro èn mi teki leri di ben abi fu du nanga poku. A ben gersi leki mi ben o abi wan bun libi.

Di mi trow, dan mi nanga mi masra froisi go tan na wan kontren pe sma ben gwenti taki dotitaki, den ben gwenti dringi sopi teleki den drungu, èn den ben gwenti smoko. Na a ten dati mi no ben e si ete taki a presi dati no ben bun gi mi. Na a bigin mi ben e go na fesa soso fu singi èn fu prei gitara. Ma te mi ben de drape, dan sma ben kari mi fu smoko èn fu dringi nanga den. Fosi yu denki, mi kon abi a gwenti fu dringi sopi pasa marki.

A sopi bigin pori mi libi. A teki pikinso ten fosi mi saka gowe dipi trutru, ma di dati pasa, dan pikinmoro mi no ben man nyan. Mi ben wani dede, èn mi pruberi fu kiri misrefi, ma sani no waka soleki fa mi ben wani. Mi breiti taki sani waka so.

Ma aladi mi libi ben e waka so, toku mi sisa  ben e kon luku mi. A ben tron wan Kotoigi fu Yehovah èn a pruberi fu sori mi fa Bijbel ben kan yepi mi. Mi no ben wani arki sani di abi du nanga Bijbel, sobun na a bigin mi du sani fu meki taki mi sisa no ben e kon moro na mi. Ma mi sisa noiti no drai baka gi mi. A ben abi so furu pasensi nanga lobi gi mi, taki te fu kaba mi agri fu studeri Bijbel.

A FASI FA BIJBEL KENKI MI LIBI: Baka di mi bigin studeri Bijbel, mi teki a bosroiti fu no dringi sopi moro. Pikinmoro na a srefi ten dati, wan drunguman di ben e tan na ini a birti fu mi kon feti nanga mi èn a fon mi. Mi doro na ati-oso fu di mi ben kisi bigi mankeri. Fo fu den lebriki fu mi ben broko, èn mi kisi mankeri tu na mi ai. Ma a bun taki mi ben de na ati-oso, fu di dati yepi mi fu no pina so di mi ben e pruberi fu tapu nanga sopi.

Na a ten dati mi begi Gado doronomo. Wan pisi na ini Bijbel di ben de wan bigi trowstu gi mi, ben de Sari singi 3:55, 56, pe skrifi: „Ke Yehovah, mi bari kari yu nen komoto fu a moro dipi olo di de. Yu musu fu yere mi sten. Mi e begi yu, no tapu yu yesi, ma frulusu mi èn arki te mi e bari kari yu fu yepi mi.”

Mi e bribi nanga mi heri ati taki Yehovah piki den begi fu mi. A gi mi a krakti fu no tan drai go baka na a libi di mi ben abi fosi. Son leisi mi ben e firi fu dringi sopi baka. Mi breiti taki noiti mi no brokokindi gi a tesi dati.

A Bijbelstudie fu mi, meki mi kon si taki mi ben musu horibaka gi mi masra fu di en na a ede fu na osofamiri (1 Petrus 3:1, 2). A sani dati no ben makriki gi mi, fu di mi ben gwenti prei basi gi en. Mi begi Yehovah fu yepi mi. Sani no kenki wantronso, ma safrisafri mi tron wan moro bun wefi di ben e leri fu horibaka gi en masra.

Di mi masra si den kenki di mi ben tyari kon, dan a no ben man bribi. Te na a ten dati, Bijbel no ben e hari en prakseri. Ma di mi bosroiti fu tapu nanga smoko, dan a taki: „Efu yu e tapu nanga smoko, dan mi o bigin studeri Bijbel!” Wi ala tu tapu nanga smoko na a srefi dei.

DEN WINI DI MI KISI: Mi masra hori ensrefi na a pramisi fu en èn a bigin studeri Bijbel. Now wi e leisi Bijbel makandra ibri dei, wi e denki dipi fu den sani di wi e leisi, èn wi e pruberi fu fiti den rai na ini wi libi.

Mi no man taigi yu o switi na osofamiri libi fu wi de now. Mi no man taigi yu tu o furu wini misrefi kisi. Mi e taigi Yehovah tangi taki a hari mi kon na en (Yohanes 6:44). Mi de nanga tangi tu taki mi sisa noiti no drai baka gi mi. Dati yepi mi fu kon si nanga mi eigi ai taki Bijbel e kenki sma libi trutru.

[Prenspari pisi na tapu bladzijde 11]

Mi kon si taki mi ben musu bigin du san mi ben e leri

[Prenspari pisi na tapu bladzijde 13]

Mi sisa ben abi so furu pasensi nanga lobi gi mi, taki te fu kaba mi agri fu studeri Bijbel