A TRU taki Yehovah e broko en ede nanga a pipel fu en? Ma o furu a e broko en ede nanga den dan? Wán fasi nomo de fa wi kan kisi piki tapu den aksi dati. Wi musu luku san Gado srefi e taki. Na ini Bijbel, Yehovah e taki krin fa a e firi. Luku san skrifi na Yesaya 49:15.

Fu sori o furu lobi Yehovah abi gi a pipel fu en, a meki Yesaya gebroiki wan fu den moro moi eksempre di de. Yesaya e bigin poti na aksi disi di e hari wi prakseri: „Wan mama sa frigiti en pikin di de na bobi ete? A no sa abi sari-ati gi en pikin di a meki?” Te yu luku a tekst disi, dan wantewante yu sabi a piki tapu na aksi disi. Fa wan mama ben kan frigiti en pikin di de na bobi ete? A pikin abi en fanowdu dei nanga neti, èn a e meki a mama kon sabi dati tu! Ma na aksi fu Yehovah e poti prakseri na moro sani.

Fu san ede wan mama e gi a pikin fu en bobi nanga tra sani di a abi fanowdu? A e du dati soso fu meki a beibi no krei? Nôno. Ibri mama abi sari-ati noso e sari a „pikin di a meki”. A Hebrew wortu di vertaal dyaso nanga „sari-ati”, vertaal tu nanga „sori bun-ati” (Eksodes 33:19; Yesaya 54:10). A Hebrew wortu disi kan yepi wi fu frustan a sari-ati di wan sma abi gi trawan di no man yepi densrefi èn di swaki. A sari-ati di wan mama abi gi a beibi fu en di de na bobi ete, na wan fu den moro tranga firi di wi sabi.

Ma a de wan sari sani taki a no ala mama abi sari-ati gi a beibi fu den di e angri fu dringi bobi na den. „Kande wan mama sa frigiti en pikin”, na so Yehovah e taki. Wi e libi na ini wan grontapu pe furu man nanga uma ’no e tai hori na trawan èn den no lobi trawan’ (2 Timoteyus 3:1-5). Son leisi wi e yere fu mama di no e sorgu den beibi fu den bun, den e fon den, noso den e gowe libi den. Wan buku di abi fu du nanga Bijbel, e taki fu Yesaya 49:15: „Mama abi sondu èn son leisi den e du bun takru sani na presi fu sori lobi. Srefi a moro bun libisma no e sori lobi son leisi.”

Ma Yehovah e gi wi a dyaranti disi: „Ma noiti mi sa frigiti yu.” Now wi e bigin si san Yehovah wani taigi wi nanga na aksi di a poti na ini Yesaya 49:15. A sani di a wani sori wi, a no taki a de a srefi leki wan mama, ma a wani sori wi taki a de heri tra fasi leki wan mama. Tra fasi leki sondu mama di no e sori sari-ati gi a pikin fu den di abi den fanowdu, Yehovah noiti o frigiti fu sori sari-ati gi den anbegiman fu en di abi yepi fanowdu. Dati meki a fiti taki a buku di kari na tapusei e taki fu Yesaya 49:15: „Disi na wan fu den moro krakti fasi fa na Owru Testamenti e taki fu a lobi fu Gado, iya, kande disi na a moro krakti fasi srefi.”

A no de fu taki dati a de wan trowstu gi wi fu kon sabi taki „wi Gado abi trutru sari-ati”, a no so? (Lukas 1:78) Fu san ede yu no e suku fu kon sabi fa yu kan kon moro krosibei na Yehovah? A Gado disi di abi lobi e gi den anbegiman fu en a dyaranti disi: „Mi no o libi yu kwetikweti èn noiti mi o gowe fu yu.”​—Hebrewsma 13:5.

A BUN FU LEISI A PISI DISI FU BIJBEL NA INI FEBRUARI:

▪ Yesaya 43-62