YOSEF poti ete wan lai na tapu a buriki fu en. Prakseri fa a tanapu e luku a dungru pikin foto Betlehem. A e naki a pikin stampu buriki safri na en seibere. A no de fu taki dati a e prakseri a langa pasi di de na en fesi. Den e go na Egepte! Wan tra pipel, wan tra tongo, nanga tra gwenti. Fa en nanga a pikin osofamiri fu en o man fiti densrefi na ala den kenki dati?

A no ben makriki gi Yosef fu fruteri en lobi wefi Maria a takru nyunsu disi. Ma a teki deki-ati èn a fruteri en. A taigi en fu na engel di ben kon na ini en dren fu tyari a boskopu disi fu Gado: Kownu Herodes, ben wani kiri a pikin boi fu den! Den ben musu froisi wantewante (Mateyus 2:13, 14). Maria ben e broko en ede srefisrefi. Fa wan sma ben kan prakseri fu kiri a pôti pikin fu en di no ben du nowan ogri? Maria nanga Yosef no ben man frustan a sani dati. Ma den ben e frutrow tapu Yehovah èn fu dati ede den sreka densrefi.

Den sma na ini Betlehem ben e sribi, di Yosef, Maria, nanga Yesus gowe libi a dorpu safrisafri na ini a dungru. Nowan sma ben sabi san e pasa. Na a ten di den ben e go na zuidsei, a son ben e opo na owstusei. A ben musu de so, taki Yosef ben e aksi ensrefi fa sani ben o waka. Fa wan pôti temreman ben kan kibri en osofamiri gi sma di ben abi so furu makti? A ben o man tan sorgu gi en osofamiri? A ben o man tan tyari a hebi frantwortu di Yehovah Gado ben gi en fu kweki a pikin disi di ben de tra fasi leki ala trawan? Yosef ben o kisi fu du nanga bigi tyalensi. Te wi o luku san a du fu pasa ibriwan fu den tyalensi disi, dan wi o si fu san ede papa na ini a ten disi èn sosrefi wi alamala, musu abi bribi neleki Yosef.

Yosef kibri en osofamiri

Wan tu mun na fesi, di Yosef ben de na Nasaret, a foto pe a ben e tan, dan en libi kenki fu ala ten di a meki mofo fu trow nanga na umapikin fu Eli. Yosef ben sabi Maria leki wan reti-ati uma di ben abi wan tranga bribi. Ne a yere taki Maria de nanga bere! A ben prakseri fu broko trow nanga en kibrikibri, so taki a no ben o kisi syen. * Ma wan engel kon na ini en dren fu taigi en taki Maria ben kon de nanga bere nanga yepi fu Yehovah en santa yeye. Na engel taigi en tu taki a manpikin na ini Maria en bere ben o „puru den sondu fu en pipel”. A gi Yosef a dyaranti disi tu: „No frede fu tyari yu wefi Maria go na oso.”​—Mateyus 1:18-21.

Na dati Yosef du, fu di a ben de wan reti-ati man di ben e gi yesi na Gado. A frantwortu di a teki na en tapu ben de a moro hebi frantwortu di de. A ben o kweki wan pikin di no ben de en eigi pikin, ma di ben prenspari srefisrefi gi Gado. Bakaten, Yosef du san a wèt fu a Grankownu ben taki èn a tyari en wefi di ben de nanga bere, go na Betlehem fu skrifi den nen na ini lantibuku. Na drape a pikin gebore. *

Yosef no tyari en osofamiri go baka na Nasaret. Na presi fu dati, den go tan na Betlehem, wan tu kilometer moro fara fu Yerusalem. Den ben pôti, ma Yosef du ala san a man fu kibri  Maria nanga Yesus, so taki den no pina èn so taki ogri no miti den. Syatu baka dati, den go libi na ini wan pikin oso. Bakaten, den libi kenki baka wantronso. Na a ten dati, Yesus no ben de wan beibi moro, ma kande a ben pasa wán yari kaba.

Wan tu man kon na den. Den ben de lukuman fu Owstusei, kande fu farawe Babilon. Den ben meki wan stari tyari den go na a oso fu Yosef nanga Maria, èn den ben e suku wan pikin di ben o tron kownu fu den Dyu. Den man ben tyari densrefi na wan lespeki fasi.

Kande den lukuman disi no ben sabi srefi taki den ben kan meki bigi ogri miti a pikin boi Yesus. A stari di den ben si, no ben tyari den go na Betlehem fosi, ma na Yerusalem. Drape den ben taigi na ogri-ati Kownu Herodes taki den e suku wan pikin di ben musu tron kownu fu den Dyu. A sani dati meki taki a dyarusu kownu disi kisi bigi atibron.​—Luku na artikel „Leisiman e aksi . . . Suma ben seni a ’stari’?”, na tapu bladzijde 29.

Koloku taki wan sma ben de di ben makti moro Herodes. Fa so? We, den lukuman ben tyari kado, sondro fu fruwakti fu kisi wan sani. Kande Yosef nanga Maria ben fruwondru taki wantronso den ben kon abi sani soleki ’gowtu, wierook, nanga mirre’. Den sani disi ben diri trutru! Den lukuman ben prakseri fu taigi Kownu Herodes pe den ben feni a pikin di den ben e suku. Ma Yehovah kon na ini a tori. Na ini wan dren, a taigi den lukuman fu teki wan tra pasi go baka na oso.​—Mateyus 2:1-12.

Syatu baka di den lukuman gowe, Yosef kisi a warskow disi fu na engel fu Yehovah: „Opo, teki a yongu pikin nanga en mama èn lowe go na Egepte. Tan drape teleki mi piki yu baka. Bika Herodes o suku fu kiri a yongu pikin” (Mateyus 2:13). Soleki fa wi si na a bigin fu na artikel, Yosef no draidrai fu gi yesi. Fu di a no ben wani kwetikweti taki wan sani pasa nanga a pikin fu en, meki a tyari en osofamiri go na Egepte. Den diri kado di den heiden lukuman ben gi na osofamiri disi, ben o yepi den fu pai den kostu di den ben o meki te den ben o de na pasi.

Bakaten, evangelietori di no de wan pisi fu Bijbel nanga tra owruten tori, fruteri ala sortu sani fu a ten di Yosef nanga en famiri ben e go na Egepte. Den tori dati taki dati na wan wondru fasi Yesus syatu a pasi go drape, a sorgu taki ogri-ati fufuruman no ben man du den ogri, èn a meki taki palmbon beni kon na gron, so taki en mama ben kan piki den froktu. * Fu taki en leti, Yosef nanga en osofamiri ben teki wan langa èn hebi waka go na wan presi di den no ben sabi.

Papa nanga mama kan leri furu fu Yosef. A ben de klariklari fu tapu nanga a wroko fu en fu man kibri en osofamiri gi ogri, awansi a libi  ben o kon moro muilek gi en. A de krin taki a ben e si en osofamiri leki wan santa sani di Yehovah ben gi en fu luku. Papa nanga mama na ini a ten disi e kweki den pikin fu den na ini wan ogri grontapu di lai nanga sani di kan tyari problema kon gi den pikin fu den, di kan pori a denki fu den, noso di kan meki den lasi den libi srefi. Dati meki wi kan prèise den papa nanga mama di de leki Yosef, fu di den no e draidrai fu kibri den pikin fu den gi den sani dati!

Yosef sorgu gi en osofamiri

Soleki fa a sori, dan na osofamiri no tan langa na ini Egepte, fu di syatu baka dati, na engel taigi Yosef taki Herodes kon dede. Yosef tyari en osofamiri go baka na a kondre fu den. Wan owru profeititori ben taki dati Yehovah ben o kari en manpikin „komopo na Egepte” (Mateyus 2:15). Yosef yepi fu meki a profeititori disi kon tru, ma pe a ben o tyari en osofamiri go now?

Yosef ben e luku bun san a ben e du. A ben abi leti fu luku bun nanga Arkelayus, a man di tron kownu baka Herodes. Neleki Herodes, a kownu disi ben de wan ogri-ati man di ben lobi kiri sma. Gado tiri Yosef fu tyari en osofamiri go na noordsei, farawe fu Yerusalem nanga ala den kruktu sani di ben e pasa drape. Iya, Yosef go baka na Galilea, na a foto Nasaret pe a ben e tan fosi. Drape en nanga Maria kweki den pikin fu den.​—Mateyus 2:19-23.

Den no ben gudu èn a libi no ben makriki gi den. Te Bijbel e kari Yosef a „temreman”, dan a e gebroiki wan wortu di abi fu du nanga den difrenti fasi fa sma ben e wroko nanga udu. Fu eksempre, den ben e koti bon, den ben e srepi na udu, èn den ben e sreka udu fu bow oso, boto, pikin broki, burikiwagi, wiel, tyatyari, nanga ala sortu sani fu wroko gron (Mateyus 13:55). A wroko disi ben de tranga wroko. Na ini Bijbel ten, wan temreman ben gwenti wroko na a mofodoro fu a pikin oso fu en, noso na ini wan wrokope na sei en oso.

Yosef ben gebroiki difrenti sortu wrokosani. A kan taki a ben kisi sonwan fu den fu en papa. Kande a ben e gebroiki wan wenkri-aki, wan loto, temreman titei, wan aksi, wan sa, wan desre, difrenti sortu amra, beitri, wan sortu boro, difrenti sortu lijm, èn kande wan tu spikri, aladi den sani dati ben diri.

Prakseri fa Yesus leki pikin boi, ben e luku fa en kwekipapa ben e wroko. A ben e piri en ai luku ala sani di Yosef ben e du, èn a no de fu taki dati a ben luku den bradi skowru nanga den krakti anu fu Yosef te a ben e wroko. A ben e si a koni fasi fa Yosef ben e wroko nanga en anu èn a ben kan si na Yosef en ai taki a ben sabi san a e du. Kande Yosef bigin sori a yongu boi fu en fa fu du pikinpikin wroko. Kande a leri en fa fu meki udu kon grati nanga drei fisibuba, noso fa den udu di a ben e gebroiki ben e difrenti fu makandra (udu fu figabon, eikbon, noso olèifbon).

Yesus leri tu taki aladi den krakti anu fu Yosef ben e koti bon nanga postu, èn ben e naki pisi udu fasi na makandra, toku den srefi anu dati ben kan prei nanga en èn ben kan trowstu en, en mama, nanga den brada nanga sisa fu en. Iya, na osofamiri fu Yosef nanga Maria ben e kon moro bigi, bika boiti Yesus, den ben kisi ete siksi pikin, noso moro kande (Mateyus 13:55, 56). Yosef  ben musu wroko moro tranga now fu sorgu den alamala.

Ma Yosef ben frustan taki a moro prenspari sani ben de fu sorgu taki en osofamiri tan anbegi Gado. Dati meki a ben e teki ten fu leri den pikin fu en fu Yehovah Gado èn fu den wèt fu en. En nanga Maria ben gwenti tyari den go na a snoga fu a kontren, pe sma ben e leisi èn ben e fruklari a Wèt. Kande Yesus ben poti wan lo aksi gi Yosef bakaten, èn a kan taki Yosef du tranga muiti fu fruteri a boi den sani di a ben wani kon sabi fu Gado. Yosef ben e tyari en osofamiri go tu na fesa di ben abi fu du nanga na anbegi èn di ben e hori na ini Yerusalem. Fu man de na a alayari Paskafesa, a kan taki a ben e teki Yosef tu wiki fu naki a pasi fu sowan 113 kilometer go drape, èn fu naki a srefi pasi go baka na oso.

Kresten osofamiri edeman na ini a ten disi e du den srefi sortu sani disi. Den e du ala san den man fu sorgu den pikin, ma a moro prenspari sani gi den, na fu gi den leri fu Gado. Iya, dati prenspari moro srefi leki fu gi den gudu. Den e du tranga muiti fu tyari den pikin fu den go na den gemeente konmakandra èn na den bigi konmakandra. Neleki Yosef, den sabi taki dati na a moro bigi gudu di den kan gi den pikin fu den.

’Den ben bruya srefisrefi’

Di Yesus ben abi 12 yari, Yosef tyari en osofamiri go baka na Yerusalem, soleki fa a ben gwenti. Disi ben de na a ten fu a Paskafesa, wan ten te ala sma ben e prisiri. Na a mofoyari te ala den bon ben e gro so moi na den boitipresi, dan bigi grupu famiriman ben e hari go na Yerusalem. A foto disi ben de na wan moro hei presi pe a kontren na en lontu no ben moi so. Te den sma ben e kon moro krosibei fu a foto, dan furu fu den ben e singi den psalm di sma ben gwenti singi te den ben e kren go na a foto (Psalm 120-134). A kan taki a foto ben lai nanga dusundusun sma. Bakaten, den famiri disi ben e hari go baka na oso. A kan taki na fu di Yosef nanga Maria ben abi furu fu du, meki den ben denki taki Yesus ben e waka nanga tra sma, kande nanga famiriman. Baka di den ben gowe libi Yerusalem wan heri dei kaba, dan fosi den kisi densrefi  taki Yesus no ben de nanga den. Den ben bruya srefisrefi!​—Lukas 2:41-44.

Ne den waka a heri pasi go baka na Yerusalem. Den sukusuku na ala den presi pe den ben go. Prakseri fa den ben e firi di den ben e waka e suku a boi fu den na ini ala den strati, aladi den ben e kari en nen. A ben gersi leki a foto ben leigi now èn a ben gersi wan heri tra presi. Pe a boi ben kan de? A kan taki na a di fu dri dei, Yosef bigin aksi ensrefi efu a ben tyari a santa frantwortu di Yehovah ben gi en na wan yoisti fasi. Te fu kaba, den go na a tempel. Drape den suku teleki den doro wan kamra pe furu man di ben sabi a Wèt ben kon na wán. A yongu boi Yesus ben e sidon na den mindri! Prakseri fa Yosef nanga Maria ben breiti di den si en!​—Lukas 2:45, 46.

Yesus ben e arki den leriman èn a ben e poti ala sortu aksi gi den. Den man ben e fruwondru fu den sani di a boi disi ben sabi èn fu den piki di a ben e gi. Maria nanga Yosef no ben man bribi san den ben e si. A tori e sori taki Yosef no ben taki noti. Ma a sani di Maria e taki e sori krin fa den ala tu ben e firi: „Pikin, fu san ede yu du disi nanga wi? Mi nanga yu papa ben e suku yu èn wi ben bruya srefisrefi.”​—Lukas 2:47, 48.

Na so Gado Wortu e sori syatu èn na wan koni fasi fa a de gi papa nanga mama fu kweki pikin. A sani dati kan gi den furu broko-ede, srefi te a pikin no abi sondu! Na ini na ogri grontapu fu tide, papa nanga mama di e kweki pikin kan „bruya srefisrefi”, ma a kan de wan trowstu gi den fu sabi taki Bijbel e sori taki a no ben o makriki gi den.

Koloku taki den feni Yesus na a wan-enkri presi na grontapu pe a ben e firi taki a ben de nanga en hemel Tata, Yehovah, èn pe a ben e teki leri fayafaya. Fu dati ede a piki en papa nanga mama nomo: „Fu san ede unu ben e suku mi? Unu no sabi taki mi musu de na ini na oso fu mi Tata?”​—Lukas 2:49.

A no de fu taki dati Yosef ben e prakseri den wortu dati furu leisi. Kande den ben e meki a firi bun srefisrefi. Te yu luku en bun, a ben du tranga muiti fu leri a kwekipikin fu en fu kon abi den firi dati gi Yehovah Gado. Yesus ben de wan boi ete, ma a wortu „papa” ben e meki a firi bun kaba. Moro furu dati ben kon fu di Yosef ben de wan bun papa gi en.

Kande yu na wan papa tu. Yu e frustan a grani di yu abi fu yepi yu pikin fu kon sabi san a wani taki fu abi wan lobi-ati papa di e kibri en pikin gi ogri? Efu yu abi kwekipikin, dan a bun fu memre na eksempre fu Yosef, èn fu sori ibriwan fu den taki yu e si den leki yu wan-ai karu èn leki wan gudu di warti srefisrefi. Yepi den fu kon moro krosibei na den hemel Tata, Yehovah Gado.

 Yosef tan horidoro

Bijbel e fruteri wan tu sani ete fu Yosef en libi, ma toku a bun fu luku den tori dati finifini. Wi e leisi taki Yesus ’tan saka ensrefi na ondro’ en papa nanga mama. Wi e leisi tu taki „Yesus kon moro koni, a gro kon bigi, èn Gado nanga libisma ben kon lobi en moro nanga moro” (Lukas 2:51, 52). San den wortu dati e sori wi fu Yosef? Difrenti sani. Den e sori wi taki Yosef tan teki fesi na ini en osofamiri, fu di a manpikin fu en di no ben abi sondu, tan sori lespeki gi en papa leki edeman èn a tan saka ensrefi na en ondro.

Wi e kon si tu taki Yesus kon moro koni. A no de fu taki dati na Yosef ben yepi Yesus fu kon abi a koni dati. Na ini a ten dati, den Dyu ben abi wan owru odo di ben e taki dati soso sma di abi furu ten kan tron trutru koni sma, ma taki sma soleki temreman, gronman, nanga smeti „no man taki san reti èn den no man koti krutu. Boiti dati, den no de fu feni na mindri den wan di e taki agersitori.” Bakaten, Yesus tyari kon na krin taki na odo dati no ben tru kwetikweti. Leki pikin boi, Yesus ben gwenti yere fa en kwekipapa di ben de wan temreman nomo, ben e gi en bun leri fu a fasi fa Yehovah ben e ’taki san reti èn ben e koti krutu’! A no de fu taki dati a yere dati furu leisi.

Tra buweisi de tu di e sori taki Yosef yepi Yesus fu gro kon bigi. Fu di Yosef ben e sorgu bun gi a boi fu en, meki Yesus gro kon tron wan tranga gosontu man. Boiti dati, Yosef leri a boi fu en fu tron wan koni wrokoman. Sma no ben sabi Yesus soso leki a manpikin fu a temreman, ma sosrefi leki „a temreman” (Markus 6:3). Sobun, Yosef ben abi bun bakapisi nanga a fasi fa a kweki a boi fu en. A bun te famiri edeman e teki na eksempre fu Yosef èn e leri den pikin fu den sani di o yepi den fu sorgu densrefi bakaten.

Te wi e leisi a pisi na ini Bijbel pe Yesus e teki dopu te a abi 30 yari, dan wi e si taki Bijbel no e taki moro fu Yosef. Buweisi e sori taki Maria no ben abi masra moro na a ten di Yesus bigin nanga a diniwroko fu en. (Luku a faki „O ten Yosef dede?”, na tapu bladzijde 27.) Toku a ben de krin taki Yosef ben de wan bun papa di ben kibri en osofamiri, di ben sorgu den, èn di ben horidoro te na a kaba. A ben o bun te ala papa, ala famiri edeman, nanga ala Kresten e sori a srefi bribi leki Yosef.

[Futuwortu]

[Faki na tapu bladzijde 27]

O ten Yosef dede?

Wi sabi taki Yosef ben de na libi di Yesus ben abi 12 yari. Furu yongu Dyu di ben abi a yari dati ben e bigin leri a wroko fu den papa, èn te den ben abi 15 yari, den ben e bigin wroko gi wan sma. Soleki fa a sori, Yosef ben libi langa nofo fu leri Yesus a temreman wroko. Yesus ben abi sowan 30 yari di a bigin nanga a preikiwroko fu en. Yu denki taki Yosef ben de na libi ete na a ten dati? A no sori so. Bijbel e sori taki Yesus en mama, en brada, nanga en sisa ben de na libi ete na a ten dati, ma Bijbel no e taki noti fu Yosef. Wan leisi, Bijbel ben kari Yesus „a manpikin fu Maria” srefi, na presi fu kari en a manpikin fu Yosef (Markus 6:3). Bijbel e taki dati Maria ben e du sani èn ben e teki bosroiti, sondro fu aksi en masra (Yohanes 2:1-5). Na ini Bijbel ten, wan uma ben e du dati soso te a masra fu en ben dede kaba. Te fu kaba, di Yesus ben de fu dede, dan a gi na apostel Yohanes a frantwortu fu sorgu en mama (Yohanes 19:26, 27). A no ben o abi fu du dati efu Yosef ben de na libi ete. Sobun, a de krin taki Yosef dede di Yesus ben yongu ete. Wi kan frustan taki leki a moro bigi manpikin, Yesus teki a temreman wroko fu en papa abra èn a sorgu a famiri teleki a teki dopu.

[Prenki na tapu bladzijde 24]

Yosef no draidrai fu du san a ben musu du èn a kibri en pikin sondro fu denki ensrefi nomo

[Prenki na tapu bladzijde 25]

Yosef wroko tranga fu sorgu en osofamiri

[Prenki na tapu bladzijde 26]

Yosef ben gwenti tyari en osofamiri go na Yerusalem fu anbegi na ini a tempel

[Prenki na tapu bladzijde 28]

Yosef leri a boi fu en a temreman wroko