A prenspari fu kon sabi den piki?

„Unu o sabi san tru èn dati o meki unu kon fri.”​—YOHANES 8:32.

DEN sani di sma e bribi fu Yesus e bruya den, iya, den sani dati e kori den tu. Ma Bijbel abi tru tori di kan meki wi kon fri fu den denki dati. Ma yu denki taki a prenspari trutru fu ondrosuku san wi e bribi fu Yesus? Iya, a sani dati prenspari. A prenspari gi Yehovah, a prenspari gi Yesus, èn a musu prenspari gi wi tu.

● Fu san ede a prenspari gi Yehovah? We, na fu di „Gado na lobi” (1 Yohanes 4:8). Yehovah wani taki wi libi fu têgo. Yesus ben taki: „Gado ben lobi [den libisma na] grontapu so te, taki a gi en wan-enkri Manpikin, so taki ala sma di e bribi na ini en . . . sa kisi têgo libi” (Yohanes 3:16). Gado ben seni en Manpikin fu de wi Frulusuman èn fu opo a pasi gi wi fu kisi têgo libi na grontapu, soleki fa a ben abi na prakseri na a bigin (Genesis 1:28). Te sma e kon sabi den tru tori fu en Manpikin èn e libi na wan fasi di e kruderi nanga den sani di den e leri, dan Gado de klariklari fu gi den têgo libi leki kado.​—Romesma 6:23.

● Fu san ede a prenspari gi Yesus? Yesus lobi libisma tu. A sori taki a lobi libisma fu di a ben de klariklari fu gi en libi gi wi (Yohanes 15:13). A ben frustan taki a sani dati ben de a wan-enkri fasi fa libisma ben o man kisi frulusu (Yohanes 14:6). A musu fruwondru wi dan taki Yesus wani taki furu sma kisi wini fu a frulusu-ofrandi? Na fu dati ede a taigi den tru bakaman fu en fu leri sma na heri grontapu san Gado wani èn san a abi na prakseri.​—Mateyus 24:14; 28:19, 20.

● Fu san ede a musu prenspari gi wi? San na wan tu sani di prenspari srefisrefi gi yu? Kande dati na a gosontu fu yu, noso yu osofamiri. Yu wani taki yu nanga den wan di yu lobi de gosontu èn abi wan moro bun libi? Nanga yepi fu Yesus, Yehovah e gi yu nanga den lobiwan fu yu a howpu fu de gosontu dorodoro èn fu libi fu têgo na ini wan nyun grontapu pe pina nanga pen no o de moro (Psalm 37:11, 29; Openbaring 21:3, 4). Yu ben o wani libi na ini so wan grontapu? Efu dati de so, dan luku san yu musu du.

Luku a Bijbeltekst baka di skrifi na a bigin fu na artikel disi: „Unu o sabi san tru èn dati o meki unu kon fri.” Te wi kon sabi san na den tru tori fu Yesus èn na sortu fasi Gado o gebroiki en fu meki a wani fu en kon tru, dan dati kan puru wi na ini a moro ogri katibo di de. Dati na a katibo fu sondu nanga dede. Ma fu man komoto na ini a katibo dati, dan yu musu kon „sabi san tru”. Fu san ede yu nanga yu lobiwan no e pruberi fu kon sabi moro fu den tru tori disi èn fu a fasi fa unu kan kisi wini fu den? Yehovah Kotoigi o breiti fu yepi yu nanga dati.