Kon krosibei na a sma di e arki begi

FURU sma di e bribi na ini Gado no man taki fu san ede den e du dati. Den no man taki tu fu san ede kerki e du someni ogri noso fu san ede Gado e gi pasi taki pina de. Ala san den man du na fu begi wan Gado di den no sabi.

Ma yu kan kon moro krosibei na Gado. Yu kan meki yu bribi kon moro tranga te yu e kon frustan fa Gado de. Na so yu kan lobi en èn sori warderi gi en. Buweisi de fanowdu fu man abi trutru bribi (Hebrewsma 11:1). Efu yu leri den tru tori fu Gado, dan yu kan kon sabi en èn yu kan taki nanga en leki wan mati. Luku den tori fu wan tu sma di ben gwenti begi, aladi den ben e tweifri taki Gado de.

▪ Patricia, di wi ben kari na ini a fosi artikel, e taki: „Wan dei mi ben de nanga sowan tin mati fu mi di den bigin taki fu kerkitori. Mi taigi den taki mi gowe libi oso fu di mi no ben wani arki a takimakandra di mi papa ben abi nanga wan Kotoigi fu Yehovah di ben kon na wi oso. Ne wan fu den mati fu mi taki: ’Kande Yehovah Kotoigi abi leti.’

Wan trawan taki: ’Dan fu san ede wi no e go na wan fu den konmakandra fu den fu luku efu den abi leti?’ Ne wi du dati. Wi no ben e bribi ala sani, ma toku wan tu fu wi tan go na den konmakandra, soso fu di den Kotoigi ben abi switifasi.

Ma wan sonde mi yere wan sani di kenki a fasi fa mi ben e denki. A takiman ben fruteri fu san ede sma e pina. Noiti mi ben sabi taki di Gado meki libisma, a meki den sondro sondu èn taki na wán man meki taki ala sma abi sondu èn e dede. A takiman fruteri tu fu san ede a ben de fanowdu taki Yesus dede fu man gi libisma baka san a fosi man ben lasi (Romesma 5:12, 18, 19). * Wantronso mi kon frustan sani krin. Mi prakseri: ’Wan Gado de di e broko en ede nanga wi trutru.’ Mi tan studeri Bijbel èn fosi tron na ini mi libi mi ben kan begi wan Gado di mi ben e si leki wan trutru sma.”

▪ Allan, di wi ben kari tu na ini a fosi artikel, e taki: „Wan dei Yehovah Kotoigi kon na wi oso èn mi wefi aksi den fu kon na inisei fu di a ben wani yere san den ben wani taigi en fu têgo libi na grontapu. Mi ben mandi. Dati meki mi libi den na ini a foroisi èn mi aksi mi  wefi fu kon na ini a kukru. Mi taigi en: ’No du don. Yu no kan bribi den sani di den e taigi yu!’

’We, dan yu go drape fu sori taki den no abi leti’, na so mi wefi taki.

Yu kan frustan taki mi no ben man du dati. Ma den ben abi switifasi èn den libi wan buku gi mi di ben sori efu wan sma meki taki libi de noso efu a libi kon fu ensrefi. Mi ben man frustan a buku krin èn a ben abi so furu buweisi taki mi ben musu fu kon sabi moro fu Gado. Mi bigin studeri Bijbel nanga den Kotoigi èn heri esi mi kon si taki den sani di mi ben denki fu kerki ben de heri tra fasi leki san Bijbel e leri. Di mi kon leri sabi Yehovah, dan mi ben man taki krin na ini den begi fu mi san de na tapu mi ati. Mi ben abi wan tu fasi di no ben moi kwetikweti. Sobun, mi begi Gado fu yepi mi. Mi de seiker taki Yehovah piki den begi fu mi.”

▪ Andrew, di e libi na ini Ingrisikondre, e taki: „Mi ben gwenti taki krin fa mi ben denki fu sani èn mi ben lobi sani fu sabidensi. Aladi dati ben de so, toku mi ben bribi taki  sani kon fu ensrefi, soso fu di tra sma ben e taki dati. Mi no ben bribi na ini Gado fu di someni ogri e pasa.

Ma son leisi mi ben denki: ’Efu wan Gado de, dan mi wani sabi fu san ede wi de na libi. Fu san ede so furu ogri nanga feti de?’ Son leisi te problema ben e miti mi, mi ben e begi, ma mi no ben sabi nanga suma mi ben e taki.

Wan leisi wan sma gi mi wefi wan traktaat fu Yehovah Kotoigi di nen A grontapoe disi sa tan? Furu leisi mi ben prakseri fu a sani dati. Di mi leisi a traktaat, mi aksi misrefi efu a ben o bun fu go luku sortu piki Bijbel e gi na tapu na aksi disi. Bakaten di mi ben de nanga fakansi, wan sma gi mi a buku di nen Bijbel​—A wortu fu Gado noso di fu libisma? * (Ingrisitongo) Di mi kon si taki Bijbel e kruderi nanga den tru tori fu sabidensi, mi ben wani kon sabi moro fu Bijbel. Sobun, di wan fu den Kotoigi fu Yehovah aksi mi fu studeri Bijbel, mi du dati. Di mi frustan san Yehovah wani, mi kon si en leki wan trutru sma di mi ben kan fruteri ala san de na tapu mi ati.”

▪ Jan, wan uma di kweki leki wan Anitrisma na ini Londen, e taki: „Di mi si taki kerki e hoigri èn taki someni pina de, mi no ben wani go na kerki moro. Mi no ben wani go na heiskoro moro èn mi bigin singi èn prei gitara gi moni. Na a ten dati mi miti Pat. A man disi ben kweki leki wan Lomsusma èn neleki mi, a no ben e bribi moro na ini Gado.

Wi ben libi na ini wan leigi oso makandra nanga trawan di ben gowe libi skoro tu èn di ben wani kon sabi moro fu den bribi fu den kondre na ini Asia. Te latilati neti wi ben e taki omeni yuru fu a libi. Aladi mi nanga Pat no ben e bribi na ini Gado, toku wi ben abi a firi taki wan sortu krakti de di e meki taki libi de.

Baka di wi froisi go na noordsei fu Ingrisikondre fu suku wroko leki pokuman, wi kisi wan boi. Wán neti a kon siki èn mi begi Gado, aladi mi no ben bribi en. Syatu baka dati, mi nanga Pat no ben man feni en moro nanga makandra. Sobun, mi teki mi beibi, dan mi gowe. Mi begi Gado baka. Kande a ben o arki. Ma mi no ben sabi taki Pat du a srefi.

A srefi dei dati, tu Kotoigi fu Yehovah go na Pat oso èn den sori en wan tu bun rai fu Bijbel. Ne Pat bèl mi èn a aksi mi fu kon tu te den Kotoigi ben e studeri Bijbel nanga en. Heri esi wi kon si taki efu wi ben wani plisi Gado, dan wi ben musu trow. A no ben o de wan makriki sani, fu di a libi fu wi no ben e go so bun.

Wi ben wani sabi fa Bijbel profeititori kon tru, fu san ede sma e pina èn san Gado Kownukondre wani taki. Safrisafri wi kon si taki Gado e broko en ede nanga sma èn wi ben wani du san a taki. Ne wi trow. A koni di de fu feni na ini Gado Wortu yepi wi fu kweki den dri pikin fu wi. Wi de seiker taki Yehovah e arki den begi fu wi.”

Yusrefi musu ondrosuku den buweisi

Neleki fa a de nanga den sma di kari na ini na artikel disi, na so milyunmilyun sma de di si taki kerki e kori sma èn den kon frustan fu san ede Gado e gi pasi taki pina de. Yu si fu san ede ala den sma disi kon bribi taki Yehovah e arki begi trutru? Na fu di den kon kisi soifri sabi fu Bijbel.

Yu wani ondrosuku den buweisi di e sori taki Gado de? Yehovah Kotoigi o breiti fu yepi yu fu kon sabi den tru tori fu Yehovah èn fa yu kan kon krosibei na „a sma di e arki begi”.​—Psalm 65:2.

[Futuwortu]

[[Prenspari pisi na tapu bladzijde 10]

„Di mi frustan san Yehovah wani, mi kon si en leki wan trutru sma di mi ben kan fruteri ala san de na tapu mi ati”

[Prenki na tapu bladzijde 9]

Buweisi de fanowdu fu man abi trutru bribi èn wi musu angri fu sabi den tru tori fu Gado