Iya, na heri grontapu, milyunmilyun umasma de na ini den gemeente fu Yehovah Kotoigi di e gi leri. A bigi grupu umasma disi e preiki a bun nyunsu fu Gado Kownukondre. A profeititori na ini Psalm 68:11 e taki fu den umasma disi di e gi leri: „Na Yehovah srefi taigi den san fu du. Den umasma di e fruteri a bun nyunsu, na wan bigi legre.”

Ma no denki taki a wroko fu den umasma di de Yehovah Kotoigi, na a srefi leki a wroko fu den umasma di e teki fesi na ini tra kerki. Iya, den Kotoigi de tra fasi. Fa so?

A difrenti de na den sma di den uma disi e gi leri. Na ini den tra kerki yu abi umasma di e teki fesi èn di e gi leri na den memre fu den. Disi de spesrutu so na ini den Kresten kerki. Ma den umasma di de Yehovah Kotoigi no e gi leri na ini a gemeente. Den sma di den e gi leri, na sma di den e miti te den e preiki oso fu oso èn na tra presi.

Wan tra fasi fa umasma di de Yehovah Kotoigi, e difrenti fu den umasma fu tra kerki, na a fasi fa den e du sani na ini a gemeente fu den. Umasma di de fesiman na ini den Kresten kerki èn na ini tra kerki, e tiri den sma fu den gemeente èn den e leri den sma disi kerkitori. Ma umasma di de Yehovah Kotoigi no e gi leri na ini a gemeente te dopu mansma de drape. Soso den mansma di poti leki leriman e du dati.​—1 Timoteyus 3:2; Yakobus 3:1.

Bijbel e taki dati soso mansma e kisi a frantwortu fu teki fesi na ini wan gemeente. Luku san na apostel Paulus e sori wi di a skrifi a sani disi gi Titus, wan tra mansma di ben teki fesi tu: „Mi libi yu na Kreita fu . . . poti owru man na ini ibri foto, soleki fa mi ben taigi yu fu du.” Fu ibri mansma di poti leki owruman, Paulus ben taki tu: „Wan owru man musu de wan sma di trawan no man feni wan sani na en tapu. A musu de a masra fu wán wefi nomo” (Titus 1:5, 6). Paulus ben gi Timoteyus den srefi sortu rai na ini a brifi di a seni gi den gemeente: „Efu wan man e suku fu tron wan sma di e teki fesi na ini a gemeente, dan a e suku fu du wan tumusi bun wroko. Fu dati ede wan man di e teki fesi musu de sondro fowtu. A musu de a masra fu wán wefi nomo. . . . A musu sabi fa fu gi leri.”​—1 Timoteyus 3:1, 2.

Fu san ede na soso mansma e teki fesi na ini a gemeente? Paulus e taki: „Mi no e gi wan uma pasi fu gi leri, noso fu basi wan man, ma a musu tan tiri, bika Gado meki Adam fosi, baka dati a meki Eva” (1 Timoteyus 2:12, 13). Sobun, fu di Gado meki Adam fosi, meki A gi mansma a frantwortu fu gi leri èn fu teki fesi.

Dinari fu Yehovah e teki na eksempre fu den Fesiman, Yesus Krestes. A disipel Lukas ben skrifi fu a wroko fu Yesus: „A bigin go na ala den foto nanga den dorpu fu preiki a bun nyunsu fu Gado Kownukondre èn fu fruteri ala sma disi.” Bakaten Yesus seni den bakaman fu en fu go du a srefi wroko: „Den waka na ini ala den dorpu na ini a heri kontren fu fruteri a bun nyunsu na ala presi.”​—Lukas 8:1; 9:2-6.

Na ini a ten disi, dinari fu Yehovah, iya, mansma nanga umasma, e teki prati fayafaya na a wroko di Yesus ben taki dati den ben o du: „A bun nyunsu disi fu a Kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon.”​—Mateyus 24:14.