Vahan gebore na Armeinia na ini april 1983. Na ini 1996, en nanga den tra sma fu en osofamiri bigin studeri Bijbel nanga Yehovah Kotoigi. A dopu di a ben abi 16 yari. Di Vahan studeri Bijbel a kon lobi den leri fu Yesus Krestes. Wan fu den sani di a leri na taki den bakaman fu Yesus no musu teki prati na feti (Mateyus 26:52). Fu dati ede Vahan ben abi fu teki wan prenspari bosroiti na ini en libi syatu baka di a dopu.

Den wèt fu Armeinia e taki dati ala yongu man musu du srudatiwroko te den tron 18 yari. Efu den no wani du a wroko disi, dan lanti kan seni den go na strafu sowan dri yari srefi. Vahan ben wani yepi den sma fu en kondre, ma a no ben wani du wan sani di no e kruderi nanga Bijbel èn di ben o trobi en konsensi. We, san a du dan?

Na ini 2001 di Vahan doro a yari fu go na ini a legre, a bigin skrifi brifi gi den tiriman fu Armeinia wantewante. A skrifi taki srudatiwroko no e kruderi nanga en konsensi èn nanga san a e bribi. Ma a ben taigi den tu taki a ben de klariklari fu du wan tra sortu wroko di no abi fu du nanga a legre.

Moro leki wán yari pasa. Na ini a pisi ten dati Vahan tan aksi lanti fu poti prakseri na san a aksi. Ma na ini september 2002 den  sroto Vahan èn bakaten den taigi en taki den sroto en fu di a weigri fu go na ini a legre. Den gi en wan strafu fu 18 mun. Ma na afkati fu lanti di ben tyari en go na krutu ben feni taki a strafu disi no ben hebi nofo. Wán mun baka di Vahan kisi strafu, na afkati go na krutu baka fu aksi efu Vahan ben kan kisi wan moro hebi strafu. Na afkati ben taki dati Vahan no ben kan weigri srudatiwroko fu a bribi fu en ede. A ben feni tu taki efu tra sma ben kon yere a tori disi, dan den srefi ben kan taki tu dati den no o du srudatiwroko. Den krutuman agri nanga na afkati èn den gi Vahan wan moro langa strafu fu 30 mun.

Ne Vahan tyari a tori disi go na a Grankrutu fu Armeinia. Na ini yanuari 2003 a grankrutu disi agri nanga a bosroiti fu a tra krutubangi. Wantewante den tyari Vahan go na wan strafu-oso pe a ben musu koti strafu makandra nanga kiriman, drugsman nanga man di ben dwengi trawan fu abi seks nanga den.

Sensi 2001 Armeinia na wan memre fu a Raad van Europa. (Disi na wan organisâsi fu difrenti kondre na Europa di e wroko makandra fu go na fesi.) Fu dati ede den Armeiniasma abi a reti fu tyari den krutu-afersi fu den go na fesi a Krutubangi fu Europa di e feti gi den reti fu libisma. Ma den kan du dati soso te den no kisi den reti na nowan krutubangi fu a kondre fu den. Na disi Vahan bosroiti fu du. Na ini a krutu-afersi Vahan sori taki Pisi 9 fu a Kruderi di e horibaka gi den reti fu sma na ini Europa, e sori taki a ben abi a reti fu weigri srudatiwroko. Sobun, lanti no ben kan sroto en fu a sani disi ede. Dati meki Vahan aksi fu kisi a reti dati. Ma noiti ete wan sma ben wini den sortu krutu-afersi disi.

Na tapu 27 oktober 2009, a Krutubangi fu Europa luku a tori fu Vahan. A krutubangi disi bosroiti taki Pisi 9 fu a Kruderi no e kibri den reti fu wan sma di e weigri srudatiwroko.

Di den teki a bosroiti disi, Vahan ben komoto na strafu-oso langa ten kaba, a ben trow èn a ben abi wan pikin boi. Vahan no ben breiti nanga a bosroiti disi. A ben kan libi a tori so noso a ben kan tyari en go na fesi a Grankrutu fu a Krutubangi fu Europa. We, Vahan tyari a tori go na fesi a Grankrutu. A Grankrutu e luku soso spesrutu krutu-afersi. Sobun, yu kan frustan taki Vahan ben breiti di a yere taki den ben o luku a tori fu en.

Na tapu 7 yuli 2011, a Grankrutu teki wan bosroiti na ini Straatsburg, Fransikondre. Tinasiksi fu den tinaseibi krutuman fu a Grankrutu taki dati Armeinia fowtu di den krutu  Vahan Bayatyan èn di den poti en na strafu fu di a konsensi fu en no e gi en pasi fu du srudatiwroko. A wan-enkri krutuman di no ben agri nanga a bosroiti disi ben de a di fu Armeinia.

Fu san ede a krutubosroiti disi de so prenspari? Disi na a fosi leisi di a Krutubangi fu Europa bosroiti taki Pisi 9 fu a Kruderi di e horibaka gi den reti fu sma na ini Europa, e gi wan sma a reti fu weigri srudatiwroko fu a konsensi fu en ede. Den wèt fu Armeinia e taki dati ala sma abi den srefi reti. Dati meki a Krutubangi taki dati Armeinia no abi a reti fu poti wan sma na strafu te en konsensi e tapu en fu du srudatiwroko.

A Krutubangi ben taki wan sani fu a weigri di Yehovah Kotoigi e weigri srudatiwroko fu a konsensi fu den ede. A taki: „A Krutubangi no e tweifri taki den sani di a man disi e bribi meki taki a e weigri fu du srudatiwroko. Nanga en heri ati a e bribi disi, a e si den leki wan seryusu sani èn a srudatiwroko di a kondre fu en wani en fu du, no e kruderi srefisrefi nanga a bribi fu en.”

Na ini den lasti 20 yari di pasa moro leki 450 Yehovah Kotoigi na ini Armeinia kisi krutu fu di den e weigri fu du srudatiwroko fu a konsensi fu den ede. Di wi ben e sreka na artikel disi, 58 yongu man na ini Armeinia ben de na strafu fu di srudatiwroko no e kruderi nanga a bribi fu den. Feifi fu den man disi go na strafu-oso, baka a prenspari bosroiti fu a krutu-afersi fu Bayatyan teige Armeinia. * Wan fu den yongu man disi ben skrifi wan brifi fu aksi na afkati fu lanti di ben wani tyari en go na fesi krutu leki wan ogriman, fu no du dati. Ma na afkati no ben wani. Na afkati skrifi: „A krutubosroiti di a Krutubangi fu Europa teki na tapu 7 yuli 2011 na ini a tori fu Bayatyan teige Armeinia no abi noti fu du nanga na krutu-afersi disi, fu di a de krin taki den tu afersi disi no de a srefi.”

Fu san ede na afkati ben feni taki den tu afersi disi no de a srefi? Na a ten di den krutu Vahan Bayatyan, sma no ben kan aksi fu du wan tra wroko gi lanti na presi fu srudatiwroko. Ma now Armeinia abi wan wèt di e taki dati sma kan du dati efu den weigri fu du srudatiwroko. Toku a wèt disi no e yepi furu fu den sma di e weigri fu du srudatiwroko fu a konsensi fu den ede, fu di na srudati e tiri den tra wroko di den kan du gi lanti.

Vahan Bayatyan breiti taki a Krutubangi teki a sei fu en di den teki a prenspari bosroiti disi. A krutubosroiti di den teki meki taki Armeinia no abi a reti moro fu krutu èn strafu sma di e weigri fu du srudatiwroko fu a bribi fu den ede.

Yehovah Kotoigi no de nomonomo fu kenki den wèt fu den kondre pe den e tan. Ma efu wan problema kon, den e du neleki a yongu man Vahan Bayatyan. Den e gebroiki den wèt fu den kondre fu suku den reti fu den. Fu san ede den e du disi? We, na so fasi den kan tan libi wan korostu libi aladi den e tan gi yesi na den leri fu Yesus Krestes, a Fesiman fu den.