Son leisi te sma abi problema, dan den no wani prakseri a libi. Den e kori densrefi èn den e suku wan fasi fu frigiti den problema fu den, soso fu di den wani firi koloku. Fu eksempre, son sma e dringi sopi fu no poti prakseri na den problema fu den. Wan pisi ten, sopi kan gi den a firi taki den man du ala sani èn taki den man lusu den problema fu a libi. Ma den sma di e denki taki sopi man yepi den, o kisi moro bigi problema te fu kaba. Wi kan taki dati tu fu sma di abi wan bribi?

Son sma e taki dati na soso sma di e bribi sani makriki e go na kerki. Den e taki dati den sma disi no wani denki gi densrefi noso den no wani kenki den prakseri awinsi buweisi de taki sani de tra fasi. Den feni taki sma di abi wan tranga bribi no wani si fa a libi de trutru.

Bijbel e taki furu fu bribi. Ma na nowan presi na ini Bijbel yu o leisi taki wi musu bribi ala sani. A no e taki tu dati wan sma no musu du muiti fu leri noso frustan sani. Na presi fu dati, Bijbel e taki dati sma di e bribi ala sani di den e yere no abi ondrofeni. A e taki srefi dati den sma disi don (Odo 14:15, 18). Sobun, na wan don sani fu bribi iniwan sani sondro fu luku fosi efu a tru. A de leki te wan strati lai nanga wan lo wagi, dan yu e abra en nanga tapu ai, soso fu di wan sma taigi yu fu du dati.

Na presi taki Bijbel e gi wi deki-ati fu bribi ala sani, a e taki dati wi musu tan na ai èn luku bun taki sma no kori wi (Mateyus 16:6). Fu man tan na ai wi musu ’gebroiki wi frustan’ (Romesma 12:1). Bijbel e leri wi fu wroko nanga den buweisi di de èn den buweisi disi o yepi wi fu sabi efu wan sani de so trutru. Luku wan tu eksempre na ini den brifi di na apostel Paulus skrifi.

Di Paulus skrifi a gemeente na ini Rome, a ben wani taki den poti bribi na ini Gado, ma den no ben musu du dati soso fu di a ben taigi den fu du dati. A gi den deki-ati fu luku den buweisi fu si efu Gado de trutru. A ben skrifi: „Sma man si krin sortu fasi Gado abi, aladi den no man si en. Te den e luku den sani di a meki, den kan frustan taki a abi têgo krakti èn taki en na Gado trutru. Fu dati ede den [sma di e feni taki Gado no de] no man taki nanga leti dati Gado no de” (Romesma 1:20). Paulus taki wan srefi sortu sani na ini a brifi di a skrifi gi den Hebrewsma. A taki: „Iya, ibri oso abi wan sma di meki en, ma a sma di meki ala sani na Gado” (Hebrewsma 3:4). Di Paulus skrifi wan brifi gi den Kresten fu a foto Tesalonika, a gi den a deki-ati fu no bribi ala san den yere. A ben taki dati den musu „ondrosuku ala sani fu luku efu den tru”.​—1 Tesalonikasma 5:21.

Te wan sma abi wan bribi, ma a no sabi fu san ede, dan a bribi fu en kan kori en èn a kan kisi problema. Luku san Paulus ben taki fu den sortu sma disi di ben libi na ini a ten fu en: „Mi kan taki fu den taki den de fayafaya fu dini Gado, ma den no abi soifri sabi” (Romesma 10:2). Fu dati ede a de prenspari trutru fu teki a rai disi di Paulus gi a gemeente na ini Rome: „Kenki un denki, so taki unu kan kenki un libi. Dan unu o sabi san na a wani fu Gado di bun, di e gi en prisiri, èn di no e mankeri noti” (Romesma 12:2). A no kori wi e kori wisrefi te wi abi bribi, fu di wi abi soifri sabi fu Gado. Na presi fu dati a bribi fu wi de leki wan „bigi skelt” di e kibri wi. Sma no o man kori wi nanga ala sortu kruktu bribi èn son problema no o miti wi.​—Efeisesma 6:16.