KON KROSIBEI NA GADO
„Yu tyari den kon na krin gi den sma di de leki nyofi pikin”
Yu wani sabi den tru tori fu Gado? Yu wani sabi suma na en, san a lobi, san a no lobi, èn san na a wani fu en? Na ini Bijbel, a Wortu fu en, Yehovah Gado e tyari ala den tru tori fu en kon na krin. Ma a no ala sma di e leisi Bijbel man frustan den tru tori dati. Fu san ede? Fu di a de wan grani fu frustan den tori dati. A no ala sma e kisi a grani disi. Meki wi luku san Yesus ben taki fu a tori disi.
A vers dati e bigin nanga den wortu disi: „Na a ten dati Yesus taki.” Sobun, a sani di Yesus o taki now, abi fu du nanga wan sani di ben pasa syatu na fesi. Na kaba a ben kaba krutu den trangayesi sma fu den dri foto fu Galilea pe a ben du bigi wondru (Mateyus 11:20-24). Ma yu ben kan aksi yusrefi: ’Fa a kan taki wan sma si den bigi wondru di Yesus du, dan a no bribi den sani di a ben e leri èn tron wan bakaman fu en?’ Den sma disi no ben wani arki fu di den ben tranga-ede.
Yesus ben sabi taki fu man frustan den tru tori fu Gado di de fu feni na ini Bijbel, dan wi abi tu sani fanowdu. Wi abi a yepi fu Gado fanowdu èn sosrefi wan krin ati. Yesus e taki: „Mi Tata, Masra fu hemel nanga grontapu, mi e prèise yu na fesi ala sma, bika yu kibri den sani disi gi den koniman nanga sabiman èn yu tyari den kon na krin gi den sma di de leki nyofi pikin.” Yu e si fu san ede a de wan grani fu frustan den tru tori di de fu feni na ini Bijbel? Fu di Yehovah na a „Masra fu hemel nanga grontapu”, meki a kan kibri den tru tori fu en noso a kan tyari den kon na krin gi suma a wani. Ma toku Gado e gi ibri sma na okasi fu kon sabi den tru tori disi. Fu san ede a e meki son sma kon sabi den tru tori fu Bijbel aladi a e kibri den tori dati gi trawan?
Yehovah no lobi sma di abi heimemre, ma a lobi sma di abi sakafasi (Yakobus 4:6). A e kibri den tru tori gi „den koniman nanga sabiman”. Dati na den sma di feni taki den abi ala koni èn taki den no abi Gado fanowdu (1 Korentesma 1:19-21). Ma a e tyari den tru tori fu en kon na krin gi sma di de leki „nyofi pikin”. Dati na den sma di e suku yepi na en nanga wan krin ati èn di abi a sakafasi di pikin-nengre abi (Mateyus 18:1-4; 1 Korentesma 1:26-28). Gado en Manpikin, Yesus, ben sabi den tu sortu sma disi. Furu kerki fesiman di abi bigifasi èn di teki heiskoro, no ben e frustan a boskopu fu Yesus, ma den fisiman di ben abi sakafasi ben e frustan dati (Mateyus 4:18-22; 23:1-5; Tori fu den apostel 4:13). Na a srefi ten, son gudu sma di ben teki heiskoro èn di ben e sori trutru sakafasi, tron bakaman fu Yesus.
Meki wi poti prakseri baka na a aksi na a bigin fu na artikel: Yu wani kon sabi den tru tori fu Gado? Efu dati de so, dan a sa de wan trowstu gi yu fu sabi taki Gado no lobi den sma di denki taki den abi ala koni. Ma a lobi den sma di den koniman fu grontapu e wisiwasi. Te yu e studeri Gado Wortu nanga wan krin denki èn nanga wan krin ati, dan kande yu sa de wan fu den sma di Yehovah e gi wan warti kado. Iya, yu o kisi a grani fu frustan den tru tori fu en. Te yu e frustan den tru tori dati, dan yu o kon de moro koloku èn yu kan kisi „a trutru libi”. Dati na têgo libi na ini a nyun grontapu di Gado pramisi wi èn pe retidu o de. *
A bun fu leisi a pisi disi fu Bijbel na ini yanuari:
^ paragraaf 7 Yehovah Kotoigi de klariklari fu yepi yu fu kon sabi den tru tori fu Gado èn den sani di a o du. Den wani studeri Bijbel nanga sma sondro taki den abi fu pai gi dati, èn den e gebroiki a buku San Bijbel e leri wi trutru?
