Sabiman di e yepi sma fu kon abi wan gosontu denki e taki dati a no soso den sani di wi abi e meki taki wi de koloku trutru. A sani disi tru, fu di libisma wani du wan bun sani nanga den libi, noso den wani dini wan sma noso wan sani di hei moro den. Dati meki den e gebroiki den ten fu a bun fu a naturu, fu meki moimoi sani, fu prei poku, èn so moro fara. Toku furu sma di e du den sortu sani disi no de koloku trutru.

Sma di e leisi Bijbel no e fruwondru taki libisma gebore nanga na angri fu kon sabi Gado. Den fosi kapitel fu Genesis e sori taki baka di Gado meki den fosi tu libisma, dan a ben e taki doronomo nanga den so taki den ben kan kon abi wan bun matifasi nanga en (Genesis 3:8-10). Gado no ben meki libisma fu libi sondro en. A meki den na so wan fasi taki den e angri fu taki nanga a Mekiman fu den. Bijbel e taki furu tron fu a sani disi.

Fu eksempre, Yesus ben taki: „Koloku fu den sma di sabi taki den abi Gado fanowdu” (Mateyus 5:3). Den wortu dati e sori taki wan prenspari sani di e yepi wi fu kon abi wan koloku libi, na te wi e tan meki muiti fu kon sabi Gado moro bun. Fa wi kan du dati? Yesus ben gi wi a piki di a taki: „Sma no musu libi fu brede wawan, ma fu ibri wortu di Yehovah mofo taki” (Mateyus 4:4). Na sortu fasi den sani di Gado e taki, noso den prakseri nanga den rai fu en di wi e feni na ini Bijbel, e yepi wi fu libi wan koloku libi? Wi o poti prakseri na dri prenspari fasi.

Na ini a ten disi, bun furu sabiman de di wani gi sma rai fa fu libi bun nanga trawan, fa fu sori lobi, fa fu abi wan moro bun osofamiri libi, fa fu lusu trobi, èn fa fu de koloku. Den wani taigi wi srefi fu san ede wi de na libi. Ma suma na a moro bun sma di kan gi wi bun rai na ini ala den afersi disi? A no Yehovah Gado, a Mekiman fu libisma?

Luku na eksempre disi: Te yu e bai wan nyun  camera noso wan computer, dan yu kan fruwakti taki yu o kisi wan pikin buku di e sori san na a moro bun fasi fu gebroiki a sani di yu bai. Wi kan agersi Bijbel nanga so wan buku. A buku disi e sori fa libisma musu libi, èn Gado, a sma di gi wi libi, gi wi a buku disi. A e sori fu san ede Gado meki libisma èn fa den kan abi wan koloku libi.

Neleki fa a de nanga iniwan buku di e sori sma fa den musu gebroiki wan sani, na so Bijbel e sori den sma di e leisi en, sortu sani kan pori a libi fu den. Kande tra sma e gi wi tra sortu rai di moro makriki fu teki. Ma yu no denki taki sani sa waka moro bun èn taki wi o man wai pasi gi problema te wi e teki a rai fu wi Mekiman?

Aladi Yehovah Gado e gi wi rai nanga leri, toku a no e dwengi wi fu du san a e taki. Ma fu di a lobi wi èn fu di a wani yepi wi, meki a e gi wi a rai disi: „Mi, Yehovah, na yu Gado. Mi na a sma di e leri yu fu kisi wini. Mi na a sma di e meki yu waka a pasi di yu musu waka. Mi winsi taki yu ben o poti prakseri na den komando fu mi! Dan a freide fu yu ben o de leki wan liba, èn a retidu fu yu ben o de leki den skwala fu se” (Yesaya 48:17, 18). Fu taki en syatu, te wi e gi yesi na a rai fu Gado, dan wi libi sa waka bun. Fu taki en tra fasi, wi abi Gado fanowdu fu man abi wan bun libi èn fu man de koloku.

Son sma feni taki den no abi Gado fanowdu fu di den problema fu a libi e meki en muilek gi den fu bribi taki wan Gado de di lobi libisma. Kande den sma disi e aksi: ’Fu san ede bun sma e pina?’ ’Fu san ede son beibi e gebore malengri?’ ’Fu san ede so furu kruktudu de?’ A no de fu taki dati disi na seryusu aksi, èn te wi e kisi bun piki tapu den aksi disi, dan dati kan tyari bigi kenki kon na ini wi libi. Ma na presi taki wi de gaw fu gi Gado a fowtu fu den problema disi, meki wi luku fa Gado Wortu, Bijbel, kan yepi wi nanga a tori disi.

Na ini a di fu dri kapitel fu Genesis, wi e leisi fu Satan di gebroiki wan sneki fu pruberi fu kori den fosi tu libisma. A ben wani taki den trangayesi a komando di Yehovah Gado ben gi den fu no nyan fu a bon di nen sabi san bun èn san ogri. „Unu no o dede kwetikweti,” na so Satan taigi Eva. „Bika Gado sabi taki na a dei di unu o nyan den froktu, un ai o opo èn unu o de leki Gado. Unu o sabi san bun èn san ogri.”—Genesis 2:16, 17; 3:4, 5.

Di Satan taki a sani dati, dan a no ben wani sori nomo taki Gado na wan leiman, ma a ben wani taki tu dati a fasi fa Gado e tiri no bun. Didibri ben taki dati sani ben o waka moro bun gi libisma efu den ben o arki en. Fa den tori disi ben o lusu? Yehovah bosroiti fu meki ten pasa so taki ala sma ben o man si efu den sani di Satan ben taki fu en ben tru noso efu na lei a ben fruteri. Fu  taki en leti, Gado e gi Satan nanga den wan di teki a sei fu en na okasi fu sori efu libisma man libi bun sondro Gado.

San yu denki na a piki tapu den sani di Satan ben taki? Libisma man abi wan bun libi sondro Gado èn den man tiri densrefi bun? Na ini den hondrohondro yari di pasa, furu pina, kruktudu, siki, dede, nanga ogridu pasa na grontapu. Furu sma e libi wan yayolibi, èn orloku e pasa na ala sei. Boiti dati, sma kiri ipi-ipi trawan, èn den du furu tra ogri-ati sani. Den sani disi e sori krin taki libisma no man tiri densrefi sondro Gado. Bijbel no e taki dati na Gado de frantwortu gi den problema fu libisma, ma a e sori san na wan prenspari reide fu san ede den sani disi e pasa: „Sensi di libisma bigin tiri tra libisma, sani no waka bun gi den.”—Preikiman 8:9.

Den sani disi no e sori krin taki na Gado wawan kan gi wi piki tapu den muilek aksi fu a libi èn taki na en wawan man lusu den problema fu wi? San Gado o du?

Langa ten kaba sma e angri fu kon fri fu siki, owrudei, nanga dede. Den gebroiki bun furu ten, muiti, nanga moni gi den sani disi, ma noti no yepi. Son sma di ben howpu fu feni den sani dati e dringi spesrutu dresi, noso den e go na bonuman soso fu man libi moro langa. Nowan fu den sani disi tyari wini kon gi sma.

Gado wani taki sani waka bun nanga libisma èn taki den de koloku. Na dati a ben abi na prakseri di a meki libisma biginbigin, èn na no frigiti a sani dati (Genesis 1:27, 28; Yesaya 45:18). Yehovah Gado e gi wi a dyaranti taki iniwan sani di a abi na prakseri fu du o pasa seiker (Yesaya 55:10, 11). Bijbel e taki fu a pramisi di Gado gi libisma taki a o seti grontapu baka kon tron a Paradijs di den fosi tu libisma ben lasi. Na ini a lasti buku fu Bijbel, wi e feni den wortu disi: „A [Yehovah Gado] o figi ala watra puru na den ai èn dede no o de moro. Nowan sari, noso krei, noso pen no o de moro. Den fositen sani pasa kaba” (Openbaring 21:4). Fa Gado o meki den moi sani disi pasa, èn fa wi kan kisi wini fu a pramisi fu en?

Gado en Manpikin, Yesus Krestes, ben leri den bakaman fu en fu begi taki a wani fu Gado e pasa. Furu sma sabi a begi dati di sma e kari a Wi Tata Begi, noso den gwenti fu taki en ibri tron baka. A begi e bigin so: „Wi Tata na hemel, meki yu nen de santa. Meki yu Kownukondre kon. Meki yu wani pasa na grontapu soleki fa a e pasa na hemel” (Mateyus 6:9, 10). Iya, nanga yepi fu a Kownukondre, Yehovah Gado o tyari wan kaba kon na ala den problema di libisma tiri tyari kon, èn a o seti wan nyun grontapu pe retidu o de soleki fa a pramisi (Danièl 2:44; 2 Petrus 3:13). * San wi musu du fu man kisi wini fu a pramisi fu Gado?

 Yesus e sori wi san nomo wi musu du: „Efu sma wani kisi têgo libi, den musu leri sabi yu, a wan-enkri tru Gado, èn a sma di yu seni kon, Yesus Krestes” (Yohanes 17:3). Iya, nanga yepi fu Gado wi o man kisi têgo libi na ini a nyun grontapu. A howpu dati kan gi yu ete wan reide fu piki ’iya’ tapu na aksi: Wi abi Gado fanowdu?

Tu dusun yari pasa, di na apostel Paulus ben de na tapu na Areopagus (a Mars-bergi) na ini Ateine, dan a taigi den Ateinesma di ben lobi leri nyun sani, a sani disi fu Gado: „Na en e gi ala sma libi, a e meki den bro èn a e gi den ala sani. Bika na en meki taki wi de na libi, taki wi e buweigi èn taki wi de. A de leki fa sonwan fu un eigi puwema-skrifiman taki: ’Bika wi na pikin fu en tu.’”—Tori fu den apostel 17:25, 28.

A sani di Paulus ben taigi den Ateinesma tru ete na ini a ten disi. Wi Mekiman e gi wi a loktu di wi e bro, a nyanyan di wi e nyan, a watra di wi e dringi. Wi no ben o man libi sondro den bun sani di Yehovah e gi wi so taki wi man tan na libi. Ma fu san ede Gado tan gi ala libisma den sani dati, awansi sonwan fu den no e poti prakseri na en? Paulus ben taki dati na fu di „Gado wani taki sma musu suku en fayafaya èn taki den musu feni en trutru. Fu taki en leti, a no de fara fu nowan fu wi”.—Tori fu den apostel 17:27.

Yu ben o wani kon sabi Gado moro bun, noso yu ben o wani kon sabi san a abi na prakseri fu du? Yu ben o wani kon sabi sortu rai a e gi sma so taki den man abi wan bun libi now èn fu ala ten? Efu dati de so, dan wi e gi yu deki-ati fu taki nanga a sma di tyari a tijdschrift disi gi yu, noso skrifi den sma di tyari en kon na doro. Den o breiti fu yepi yu.