Fosi Yesus Krestes opo go na hemel na ini a yari 33, a ben pramisi taki a ben o drai kon baka. A ben agersi ensrefi nanga wan guduman di ben go na wan tra kondre wan heri pisi ten èn di drai kon baka fu tiri leki kownu. Sobun, Yesus o drai kon baka fu sorgu taki libisma kisi bun tiri.—Leisi Lukas 19:11, 12.

Fa Krestes o kon baka? A ben kisi wan opobaka leki wan yeye di sma no man si (1 Petrus 3:18). Baka dati a go na hemel èn a go sidon na Gado reti-anusei (Psalm 110:1). Wan heri pisi ten baka dati, Yesus ben musu go na fesi Yehovah Gado, „a Graniwan di de sensi owruten” di gi Yesus a makti fu tiri libisma. Sobun, Yesus no e drai kon baka leki wan libisma, ma leki wan Kownu di sma no man si.—Leisi Danièl 7:13, 14.

Te Yesus kon baka leki wan yeye makandra nanga den engel fu en, dan a o krutu libisma. A o pori ogri sma, ma a o gi têgo libi na den wan di e teki en leki den Kownu.—Leisi Mateyus 25:31-33, 46.

Te Yesus o tiri leki Kownu, dan a o kenki grontapu kon tron wan paradijs. A o gi den dedewan wan opobaka so taki den kan libi fu têgo na ini a Paradijs dati na grontapu.—Leisi Lukas 23:42, 43.