Mi gebore na ini Riga, a mamafoto fu Latfia. Mi mama kweki mi nanga mi sisa. Aladi mi mama abi a Lomsu bribi, toku wi ben e go na kerki soso na tapu kerki fesadei. Ala ten mi ben e bribi taki wan moro hei makti de, ma leki yonguwan furu tra sani ben e hari mi prakseri.

Di mi ben e gro kon bigi, dan mi mama kon si taki mi ben lobi lusu sani èn poti den baka kon na wán. Fu di wi ben abi so furu sani na oso di mi ben kan lusu, meki mi mama ben e frede fu libi mi wawan na oso. Dati meki a gi mi wan preisani di ben abi difrenti pisi di mi ben kan poti kon na wán èn lusu baka. Mi ben lobi prei nanga a sani dati fu di mi ben lobi rèi bromfiets. Mi mama meki mi go teki prati na wan strei di ben nen Zelta Mopēds (A Gowtu Bromfiets). Mi bigin strei rèi bromfiets, èn bakaten, mi bigin strei rèi motro.

Mi leri a sport disi heri esi èn fosi yu denki mi ben wini difrenti strei. Dri leisi mi tron kampioen fu Latfia di mi ben e strei rèi motro, èn tu leisi mi tron kampioen fu den Baltis kondre.

Di mi ben kon pôpi, dan Evija, na uma di mi ben e hori nanga en (èn di tron mi wefi bakaten), kon miti nanga Yehovah Kotoigi. A ben feni wan tu fu den buku fu den, èn den ben abi wan pisi di sma ben kan gebroiki fu aksi wan Bijbelstudie. A skrifi en nen na tapu a pisi dati èn a seni en go gi den Kotoigi. Syatu baka dati, tu Kotoigi kon na en èn a bigin studeri Bijbel nanga den. Mi ben feni en bun, ma na a ten dati mi no ben e broko mi ede tumusi nanga kerki tori.

Bakaten, den Kotoigi aksi mi fu kon sidon arki te Evija e studeri. Mi du dati èn mi ben lobi san mi ben e yere. Wan sani di naki mi ati trutru, na a pramisi di Bijbel e gi taki  grontapu o tron wan paradijs. Fu eksempre, den sori mi Psalm 37:10, 11, di e taki: „Ete wan syatu pisi ten èn den ogriwan no sa de moro. Yu o luku pe den ben de fosi, ma den no sa de moro. Ma den safri-ati sma o kisi grontapu èn den o prisiri srefisrefi, fu di freide o de pasa marki.” Mi ben lobi a pramisi dati.

Mi ben wani sabi moro fu Gado. Mi bigin si omeni falsi kerkileri de. Ma mi ben lobi den sani di mi ben e leri fu Bijbel, fu di den ben tru èn fu di den ben makriki fu frustan.

Mi go doro nanga a Bijbelstudie fu mi èn mi kon si taki a libi prenspari srefisrefi gi Yehovah (Psalm 36:9). A sani disi meki taki mi no ben wani strei rèi motro moro fu di mi ben kan lasi mi libi. Na presi fu dati, mi ben wani gebroiki mi libi fu gi glori na Yehovah. Dati meki, a biginen nanga a prisiri di mi ben e kisi fu di mi ben e strei rèi motro no ben prenspari moro gi mi.

Na ini 1996, mi go na wan internationaal kongres fu Yehovah Kotoigi di ben e hori na Tallin, na ini Estkondre, di no ben de fara fu a stadion pe mi ben gwenti strei rèi motro fosi. Na a kongres mi si sma fu furu difrenti kondre èn a ben de fu si taki wánfasi nanga freide ben de na den mindri. Fu eksempre, di wan fu den Kotoigi lasi en tas, dan mi ben denki taki noiti moro a ben o feni en. Ma fosi yu denki, wan tra Kotoigi feni a tas èn a tyari en kon baka sondro taki wan sani na ini ben misi. Mi no ben man bribi! Now mi ben e frustan taki den Kotoigi e hori densrefi trutru na den moi leri fu Bijbel. Mi nanga Evija tan go na fesi nanga a Bijbelstudie fu wi, èn na ini 1997 wi teki dopu kon tron Yehovah Kotoigi.

Wan tu fu den mati fu mi lasi den libi fu di den ben de nomonomo fu strei rèi motro. Fu di mi ben e studeri Bijbel, meki mi kon frustan taki mi abi wan frantwortu na Yehovah, a Gado di e gi libi. Mi denki taki na a sani dati kibri mi libi.

Fo yari langa mi nanga Evija ben abi a grani fu dini leki furuten dinari na a bijkantoro fu Yehovah Kotoigi na ini Riga. Now a e gi wi prisiri fu kweki wi umapikin Alise, èn fu yepi en fu kon lobi Yehovah. Mi abi a grani tu fu wroko wán dei wan wiki na a vertaal kantoro, pe mi e meki oto nanga tra sani di broko. Mi breiti srefisrefi taki mi man gebroiki den koni di mi kon abi di mi ben pikin fu du wan bun sani! Iya, te nanga now mi e lusu sani èn mi e poti den kon baka na wán.

Mi e warderi en srefisrefi taki den sani di mi leri fu Bijbel e gi mi nanga mi osofamiri na okasi fu fruteri sma fu a wan-enkri tru Gado. Iya, a pramisi taki grontapu o tron wan paradijs kenki mi libi trutru!