Naoko di wi ben kari na ini a fosi artikel ben taki san yepi en fu tapu nanga smoko. „Mi ben man kenki mi libi fu di mi kon sabi den fasi fu Gado èn san na a wani fu en.” Den sani di Naoko leri de fu feni na ini Bijbel. Aladi Bijbel no e taki noti fu tabaka, toku a e yepi wi fu frustan fa Gado feni en te sma e smoko. * Na a sani disi yepi furu sma fu no bigin nanga smoko noso fu tapu nanga smoko (2 Timoteyus 3:16, 17). Meki wi luku dri takru bakapisi fu smoko èn meki wi luku tu san Bijbel e taki fu den sani dati.

Tabaka abi wan drugs na ini di kan meki yu tron wan srafu fu en moro esi leki iniwan tra drugs. A drugs disi di sma e kari nikotine e gi a skin krakti, ma a e meki a skin kon swaki tu. Ibri leisi te wan sma e smoko, a e hari nikotine go na a edetonton. Fu di dati de so, meki wan sma di e smoko wán paki sikaret wán dei, e hari nikotine go na en edetonton sowan 200 leisi wán dei. Dati hebi moro leki iniwan tra drugs di sma e gebroiki. Efu so furu nikotine e kon na ini wan sma en skin, dan a o moro muilek gi a sma dati fu tapu nanga smoko. Te a sma no man moro sondro a drugs disi, dan a e bigin firi siki efu a no e kisi en.

Bijbel e yepi wi fu kon abi a yoisti denki fu a tori disi te a e taki: „Unu sabi taki efu unu e gi yesi na wan sma ala ten, dan unu na srafu fu a sma” (Romesma 6:16). Te a tranga lostu di wan sma abi gi tabaka e basi a denki fu en, dan heri esi a e tron wan srafu fu wan takru gwenti. Ma Gado, di nen Yehovah, wani taki wi musu de fri fu sani di e pori wi skin èn fu sani di e pori a fasi fa wi e denki (Psalm 83:18; 2 Korentesma 7:1). Sobun, te wan sma e kon abi moro warderi nanga lespeki gi Yehovah, dan a e kon frustan taki Yehovah warti fu kisi den moro bun sani fu en, èn taki a no kan gi Gado den sani dati efu a e tan wan srafu fu wan takru gwenti di kan kiri en. Te wan sma sabi dati, dan disi kan gi en a krakti fu no gi abra te a abi takru lostu.

Olaf, di e libi na ini Doisrikondre, ben abi 12 yari di a bigin smoko, ma baka 16 yari a ben man tapu nanga a gwenti dati. Olaf ben denki taki a no ogri fu smoko sikaret. Ma baka wan tu yari, a no ben man tapu nanga a gwenti disi. A e taki: „Wan leisi di mi no ben abi sikaret moro, dan mi ben bruya so te taki mi teki ala den pikin pisi sikaret di ben tan abra na ini na asisibaki, èn mi tyari ala a tabaka di ben de na ini den kon na wán. Ne mi lolo wan sikaret nanga wan pisi koranti. Te mi e prakseri a sani dati baka, dan mi e firi syen.” Fa a ben man tapu nanga a takru gwenti disi? A e taki: „A moro prenspari sani di yepi mi, na taki mi ben wani trutru taki Yehovah breiti nanga mi. A lobi di Yehovah abi gi libisma èn a howpu di a gi wi, gi mi a krakti fu tapu nanga a gwenti disi fu ala ten.”

„Sabiman kon nanga buweisi taki . . . sikaret e pori pikinmoro ibri pisi fu a skin èn a e meki taki sma e siki moro makriki èn e dede moro gaw”, na so wan buku e taki (The Tobacco Atlas). Furu sma sabi taki smoko kan meki sma kisi siki, soleki kanker, ati-siki, nanga siki na den long, èn dati na siki di sma no man gi trawan. Ma soleki fa na organisâsi fu gosontu afersi na heri grontapu (WHO) e sori, dan a smoko di sma e smoko e meki tu taki furu sma e dede fu di den kisi siki soleki tuberculose, èn dati na siki di sma kan kisi fu trawan.

Nanga yepi fu en Wortu, Bijbel, Yehovah Gado e leri wi fa wi musu gebroiki wi libi, wi skin, èn wi krakti. A Manpikin fu en, Yesus, ben poti prakseri na a sani disi di a taki: „Yu musu lobi Yehovah yu Gado nanga yu heri ati, nanga yu heri libi, èn nanga yu heri frustan” (Mateyus 22:37). A de krin taki Gado wani taki wi gebroiki wi libi nanga wi skin bun èn taki wi e warderi den san disi. Te wi e leri sabi Yehovah èn te wi e kon sabi den pramisi fu en, dan wi e kon abi lobi nanga warderi gi ala san a du gi wi. A sani disi e gi wi deki-ati fu wai pasi gi iniwan sani di kan doti wi skin.

Jayavanth, wan datra na ini India, ben smoko 38 yari langa. A e taki: „Mi leisi na ini datrabuku san smoko kan du nanga sma. Mi ben sabi taki a no bun fu smoko, èn mi ben e taigi den sma di ben e kon suku yepi na mi fu tapu nanga a gwenti disi. Ma misrefi no ben man tapu nanga en, aladi mi pruberi fu du dati feifi noso siksi leisi.” San yepi en fu du dati? A e taki: „Na fu di mi studeri Bijbel, meki mi kon tapu nanga smoko. Fu di mi ben wani prisiri na ati fu Yehovah, meki mi feni a krakti fu tapu nanga a gwenti disi wantewante.”

A smoko di sma e bro puru èn a smoko di e komoto fu tabaka di leti, no bun gi a gosontu fu sma. Te wi e hari den smoko dati, dan wi kan kisi kanker nanga tra siki, èn ibri yari moro leki 600.000 sma di no e smoko e dede. Moro furu, na umasma nanga pikin-nengre. Wan raportu fu a WHO e warskow: „Smoko di sma e bro puru noso di e komoto fu tabaka, noiti no bun.”

 Yesus ben taki dati na a fosi presi wi musu lobi Gado, ma a prenspari tu fu lobi tra sma, soleki wi famiri, wi mati, nanga sma di wi sabi. A ben taki: „Yu musu lobi tra sma leki fa yu lobi yusrefi” (Mateyus 22:39). Te wi abi wan gwenti di abi takru bakapisi gi den lobiwan fu wi, dan wi no e sori taki wi abi lobi gi tra sma. Te wi abi trutru lobi, dan wi o gi yesi na a rai disi di Bijbel e gi: „Ibriwan sma no musu tan suku en eigi bun, ma a musu suku a bun fu trawan.”—1 Korentesma 10:24.

Armen di e libi na ini Armeinia e memre: „Mi famiri begi mi fu no smoko fu di dati no ben bun gi den. Aladi mi ben sabi taki a no ben bun gi den, toku mi tan smoko.” A e fruteri san meki a kenki a denki fu en: „A sabi di mi abi fu Bijbel èn a lobi di mi abi gi Yehovah, yepi mi fu tapu nanga smoko èn fu kon si taki a sani disi no bun gi mi nanga den sma na mi lontu.”

Sabi fu Bijbel yepi Olaf, Jayavanth, nanga Armen fu tapu nanga a takru gwenti di no ben bun gi den nanga trawan. A no fu di den ben sabi taki smoko no bun meki den ben man tapu nanga a sani dati, ma na fu di den ben kon lobi Yehovah èn den ben wani taki a breiti nanga den. Na ini 1 Yohanes 5:3 wi e si san a wani taki fu abi lobi. Drape skrifi: „Te wi lobi Gado, dan wi o hori den komando fu en. Toku den komando fu en no de wan hebi.” A no de fu taki dati a no makriki ala ten fu hori wisrefi na den leri fu Bijbel, ma te wi abi tranga lobi gi Gado, dan a no o hebi gi wi fu gi yesi na en.

Nanga yepi fu a leri di e gi na heri grontapu, Yehovah Gado e yepi milyunmilyun sma now fu no de wan srafu moro fu tabaka noso fu no tron wan srafu fu en (1 Timoteyus 2:3, 4). Heri esi, Yehovah o tyari wan kaba kon na ala den gridi bisnisman di e meki taki milyunmilyun sma e tron srafu fu tabaka. A sa du dati nanga yepi fu en Kownukondre, a hemel tirimakti di de na ondro a makti fu en Manpikin, Yesus Krestes. A o tyari wan kaba kon fu ala ten na a takru gwenti di so furu sma abi fu smoko tabaka, èn a o meki taki libisma di e gi yesi na en kon abi wan skin nanga wan frustan di no abi sondu.—Yesaya 33:24; Openbaring 19:11, 15.

Efu yu e feti fu tapu nanga smoko, dan no lasi ati. Te yu e leri fu kon abi lobi gi Yehovah èn fu frustan fa a feni en te sma e smoko, dan yu srefi o man feni a krakti fu tapu nanga smoko. Yehovah Kotoigi o breiti fu yepi yu fu kon sabi Bijbel èn fu du san yu e leri. Yu kan de seiker taki efu yu wani taki Yehovah yepi yu fu tapu nanga smoko, dan a o gi yu a krakti di yu abi fanowdu.—Filipisma 4:13.