Mi gebore èn mi gro kon bigi na ini wan boitipresi fu Rome. Furu pôti wrokoman ben e tan drape, èn a libi ben hebi. Noiti mi kon sabi suma na mi mama, èn mi no ben man feni en nanga mi papa. Na so mi kon sabi a strati libi.

Di mi ben abi tin yari, mi ben e fufuru kaba, èn di mi ben abi 12 yari mi lowe gowe fu oso fu a fosi leisi. Wan tu leisi mi papa ben musu kon teki mi na skowtu-oso. Mi ben gwenti haritaki nanga sma, mi ben e du ogri, èn ala ten mi ati ben e bron. Di mi ben abi 14 yari mi gowe libi oso èn mi no drai go baka. Mi bigin gebroiki drugs èn mi ben e libi na strati. Fu di mi no ben abi nowan presi fu sribi, meki mi ben e broko go na ini wagi èn mi ben e sribi drape te fruku mamanten. Te mi ben wiki, dan mi ben e suku wan presi fu wasi.

Mi kon tron wan bigi fufuruman. Mi ben e grabu sma tas, èn mi ben e broko go na ini sma oso te neti. Sma ben kon sabi mi leki wan ogriman èn te fu kaba wan tu ogriman aksi mi fu kon na ini a grupu fu den. Drape mi kon leri fa fu broko go na ini bangi, na so mi tron wan moro bigi fufuruman. Fu di mi ben lobi feti, meki den tra man fu a grupu ben abi lespeki gi mi. Noiti mi ben e waka sondro mi gon, a ben de na ondro mi kunsu srefi te mi ben e sribi. Mi tron wan sma di ben e du ogri-ati sani, mi ben e gebroiki drugs, mi ben e taki dotitaki, èn mi ben e libi wan yayolibi. Ala ten skowtu ben e suku mi. Skowtu grabu mi omeni leisi èn mi koti srafu bun furu leisi.

Wan leisi di mi komoto na strafu-oso, mi go luku wan tanta fu mi. Mi no ben sabi taki mi tanta nanga tu fu den pikin fu en ben tron Yehovah  Kotoigi. Den aksi mi fu go nanga den na wan konmakandra fu den Kotoigi. Fu di mi ben wani sabi san den e du drape, meki mi go nanga den. Di wi doro na a Kownukondre zaal, mi ben de nomonomo fu sidon krosibei fu a doro so taki mi ben man si suma ben e go èn suma ben e kon. A no de fu taki dati mi ben de nanga mi gon.

A konmakandra dati kenki mi libi. Mi sabi ete taki mi ben e denki taki mi ben de na wan tra planeiti. Den sma gi mi wan switikon èn den ben e lafu nanga mi. Mi ben kan si na ini den ai fu den Kotoigi taki den de fu frutrow. Den sma disi ben de heri tra fasi leki den sma di mi ben sabi.

Den Kotoigi bigin studeri Bijbel nanga mi. O moro mi ben e leri sani, o moro mi ben e frustan taki mi ben musu kenki mi heri libi. Mi teki a rai di skrifi na Odo 13:20: „Te wan sma e waka nanga koniwan, dan ensrefi o kon koni, ma te wan sma e waka nanga don sma, dan sani no o waka bun gi en.” Mi kon si taki mi no ben musu moksi moro nanga den ogri mati fu mi. A sani dati no ben makriki, ma Yehovah yepi mi.

Mi tyari wan tu tra kenki kon tu. Nanga furu muiti mi tapu nanga smoko èn nanga drugs. Mi koti mi langa wiwiri, mi puru mi yesilinga, èn mi no ben e taki dotitaki moro. Now fosi mi ben e denki fosi mi du sani.

Noiti mi ben lobi leisi èn studeri. Dati meki a ben muilek gi mi fu studeri Bijbel. Ma fu di mi tan du muiti, meki safrisafri mi kon lobi Yehovah, èn wan sani bigin kenki na ini mi ati. Mi konsensi bigin fon mi. Mi ben gwenti denki takru fu misrefi èn mi ben e tweifri efu Yehovah ben o gi mi pardon gi ala den ogri di mi ben du. Na den momenti dati mi ben feni trowstu te mi ben e leisi fa Yehovah ben gi Kownu David pardon, baka di a du seryusu sondu.—2 Samuel 11:1–12:13.

Wan tra sani di no ben makriki gi mi, na fu go preiki oso fu oso fu fruteri trawan fu a bribi fu mi (Mateyus 28:19, 20). Mi ben frede taki mi ben o miti wan sma di mi ben du ogri nanga en wan leisi. Ma safrisafri mi no ben e frede moro. Mi bigin lobi en fu yepi trawan fu kon sabi wi lobi-ati hemel Tata di de klariklari fu gi wi pardon.

Den sani di mi leri fu Yehovah kibri mi libi. Furu fu den owru mati fu mi dede èn trawan de na strafu-oso. Ma mi abi wan koloku libi èn wan moi howpu. Mi leri fu abi sakafasi èn fu gi yesi èn mi no e kisi faya atibron moro. A sani disi meki taki mi man feni en moro bun nanga trawan. Mi trow èn mi nanga mi moi frow Carmen abi wan koloku libi. Mi nanga en e prisiri fu yepi tra sma fu leri sabi Bijbel.

Ete wan sani. Mi e go na bangi ete, a no fu go fufuru, ma na fu krin drape!