Son sma feni taki begi na lasi ten, fu di nowan sma e arki. Tra sma pruberi fu begi, ma den feni taki den no kisi piki tapu a begi fu den. Wan sma di no e bribi na ini Gado ben wani luku efu wan gado de di ben o arki a begi fu en. Na ini en prakseri, a meki en eigi gado, dan a begi: „Taki wan sani safri na ini mi yesi.” Ma baka di a begi, a taki dati Gado no piki en noti.

Ma toku Bijbel e gi wi a dyaranti taki wan Gado de èn taki a e arki trutru te sma e begi. Na ini Bijbel wi kan leisi sortu moi pramisi wan pipel na ini owruten ben kisi. Drape skrifi: „Te [Gado] yere wan fu unu e bari kari en, a o du bun gi en nomonomo. Fa a o yere a babari fu en, a o piki en” (Yesaya 30:19). Wan tra tekst na ini Bijbel e taki: „Den begi fu den krin-ati sma e gi en prisiri.”—Odo 15:8.

Bijbel e fruteri tu fu sma di kisi piki tapu den begi fu den. Wan tekst e taki dati wan leisi Yesus „ben e begi fayafaya èn nanga en heri ati a ben e suku yepi na a sma di ben man puru en na dede”. San ben de a bakapisi? „Gado arki den begi fu en” (Hebrewsma 5:7). Wi kan leisi tra eksempre na Danièl 9:20, 21 nanga 2 Kroniki 7:1.

Ma fu san ede son sma feni taki den no e kisi piki tapu den begi fu den? Efu wi wani kisi piki tapu den begi fu wi, dan wi musu begi soso a Gado di Bijbel e taki fu en. En nen na Yehovah. * Wi no musu begi wan tra gado noso wi afo di dede kaba. Gado wani tu taki den sani di wi e aksi en musu „kruderi nanga a wani fu en”. Den musu de sani di en feni bun. Te wi e begi na a fasi disi, dan Gado srefi e taki dati „a e yere wi” (1 Yohanes 5:14). Sobun, efu wi wani kisi piki tapu den begi fu wi, dan wi musu leri sabi a Gado fu Bijbel èn wi musu kon sabi san na a wani fu en.

Furu sma e bribi taki begi a no wan gwenti nomo. Den e bribi taki Gado e arki den trutru èn taki a e piki den begi fu den. Isaac fu Kenia taki: „Mi begi Gado fu yepi mi fu frustan Bijbel. A no langa baka dati wan sma kon na mi, dan a taigi mi taki a wani yepi mi nanga a sani disi.” Hilda di e libi na Filippijnen ben wani tapu fu smoko tabaka. A pruberi omeni leisi, ma a no ben man tapu nanga a gwenti disi. Te fu kaba en masra taigi en: „Kande yu musu aksi Gado fu yepi yu.” Hilda du san en masra taki. Bakaten a taki: „Mi ben fruwondru di mi si fa [Gado] yepi mi. A ben de neleki mi lasi a firi fu smoko. Te fu kaba mi ben man tapu fu smoko.”

Yu abi broko-ede tu? Yu denki taki Gado o wani yepi yu efu dati no de teige a wani fu en?