Tapu 25 mei 2022 Dennis Christensen doro bun na ini Deinsikondre. A dei na fesi den lusu en fu wan strafu-oso na Rosiakondre èn den seni en go na en kondre wantewante. Feifi yari langa a ben de na strafu-oso na difrenti presi.

Dennis taki: „Mi breiti taki mi komoto na strafu-oso èn taki mi man de baka nanga mi lobi wefi Irina. A yepi nanga a deki-ati di mi kisi fu brada nanga sisa na heri grontapu ben de wan kado fu Yehovah. Mi e tan begi gi den brada nanga sisa fu mi di e sori deki-ati, aladi den e kisi tesi èn den sroto den fu di den wani anbegi Yehovah.”

Dennis nanga Irina e kisi yepi fu mati nanga famiri na yeye sei èn nanga tra sani san den abi fanowdu. Den taki: „Wi e luku go na a ten te wi o man dini Yehovah fri, makandra nanga wi brada nanga sisa na Deinsikondre.”

Den tyari Dennis go sroto tapu 25 mei 2017. A dei dati den srudati nanga skowtu fu Rosiakondre di ben de nanga gon èn di ben e weri masker, broko kon ini a konmakandra presi na Oryol pe Dennis ben de. Baka dati krutuman krutu en fu di den feni taki a ben orga sani gi wan kerki organisâsi di de teige a wet fu lanti. Wán mun na fesi, a Gran Krutu fu Rosiakondre ben fruklari kaba taki den e si na organisâsi fu wi leki wan ogri-ati organisâsi èn dati meki wi no mag du a wroko fu wi drape.

Den heihei man fu Rosiakondre taki ala leisi baka taki dati a no fu di a wroko fu Yehovah Kotoigi tapu na ini 2017, meki wan Kotoigi no abi a reti moro fu anbegi Gado leki fa en wani. Ma tog wi e si taki baka di den sroto Dennis, den tiriman bigin meki ala muiti fu kisi tra Yehovah Kotoigi na Rosiakondre nanga Krim na wan ogri ati fasi èn fu sroto den.

Teleki a dei fu tide, 91 brada nanga sisa de na strafu-oso ete. Wi e begi taki Yehovah tan yepi den brada nanga sisa disi di e tai hori na en èn taki a o tan ’gi den grani’.​—Psalm 4:3.