Wi leki Yehovah Kotoigi e gi moni fu horibaka gi a wroko di na organisâsi e du na heri grontapu. Wi e du dati fu di wi wani. a Na presi pe wi e hori konmakandra pikin monikisi de pe sma kan poti moni èn tapu a website yu kan si na sortu tra fasi sma kan gi moni. Wan sma kan taki fu ensrefi na sortu fasi a wani gi moni gi a wroko di e du na heri grontapu noso gi a gemeente ini den eigi kontren. A sma mag bosroiti fu gi moni gi ala den tu sani disi tu.

 Yehovah Kotoigi no de fruplekti fu gi wan di fu tin pisi fu den moni èn a no de so taki den musu pai wan moni ala mun (2 Korentesma 9:7). Wi no e piki moni na den konmakandra fu wi èn sma no abi fu pai fu kon na inisei. Boiti dati, sma no abi fu pai den brada fu kan dopu noso fu hori beri, trow nanga tra sani di abi fu du nanga na anbegi. Wi no e seri nyanyan nanga kuku fu meki moni. Wi no abi wenkri tu èn wi no e hori bingo, karnafal, bunkopu-seri noso tra sani fu meki moni. Boiti dati wi no e skrifi brifi gi sma fu aksi den moni. Wi no e poti den nen fu sma di gi na organisâsi moni na presi pe ala sma kan si den (Mateyus 6:2-4). Tapu wi website èn na ini den buku nanga tra sani di wi meki, wi no e meki reklame gi tra bedrijf fu meki moni.

 Ibri mun den gemeente e fruteri na den konmakandra fu wi pe ala sma mag kon, omeni moni a gemeente kisi èn omeni moni a gemeente gebroiki. Wan tu leisi na ini a yari wan sma e luku efu a gemeente e gebroiki a moni na a yoisti fasi.​—2 Korentesma 8:20, 21.

•   Boksu fu poti bijdrage: Yu kan poti moni noso tyèk na ini den bijdrage boksu di de na den Kownukondre zaal, Kongreshal nanga tra presi pe wi e kon makandra.

•   Gi bijdrage nanga yepi fu Internet: Na ini furu kondre yu kan gebroiki a webpage ’Een donatie doen aan Jehovah’s Getuigen’ fu gi moni nanga yepi fu credit-karta, debit-karta. Yu kan seni moni di yu abi na bangi nanga yepi fu Internet tu. b Son Kotoigi bosroiti fu sreka sani na bangi fu puru wan moni fu den rekening ibri mun fu poti dati gi na organisâsi. Na so den e ’poti san den man na wan sei’.​—1 Korentesma 16:2.

•   Sani di sma kan seti fu horibaka gi a wroko: Son leisi sma di wani gi bijdrage musu seti sani na fesi noso den musu taki nanga wan afkati noso wan belastingman. Te yu e gi na a fasi disi, dan a kan taki yu no abi fu pai son belasting na ini yu kondre. Furu sma kisi wini di den kon leri sabi den difrenti fasi di de fu man gi bijdrage. Den kan du disi aladi den de na libi ete, noso den sreka sani taki wi e kisi den bijdrage disi te den dede. Grantangi, meki kontakti nanga a bijkantoro fu Yehovah Kotoigi na ini yu kontren efu yu wani sabi san de fanowdu fu man gi na organisâsi sani soleki:

  •   moni di sma abi na bangi

  •   verzekering noso pensyun-moni

  •   gron nanga oso

  •   aandelen nanga obligatie

  •   testamenti nanga machtiging papira

 Efu yu wan sabi na sortu fasi yu kan gi na organisâsi sani na ini yu kontren, dan go na a webpage “Donate to Jehovah’s Witnesses”.