Fowtu denki: Yehovah Kotoigi no e hori Kresneti fu di den no e bribi na ini Yesus.

 San tru: Wi na Kresten. Wi e bribi taki na Yesus Krestes wawan kan frulusu libisma.​—Tori fu den apostel 4:12.

Fowtu denki: Unu e prati osofamiri fu di unu e leri sma fu no hori Kresneti.

 San tru: Wi e broko wi ede nanga ala osofamiri èn wi e gebroiki Bijbel fu yepi osofamiri fu kon moro tranga.

Fowtu denki: Un no sabi fa a de fu gi sma sani, fu du bun gi trawan èn fu abi freide na grontapu na a ten fu Kresneti.

 San tru: Ibri dei wi e meki muiti fu gi sma sani èn fu libi bun nanga trawan (Odo 11:25; Romesma 12:18). Fu eksempre, a fasi fa wi e hori wi konmakandra èn fa wi e preiki, de soleki fa Yesus leri wi. A taki: „Unu kisi sondro fu pai, sobun un musu gi sma sondro fu meki den pai” (Mateyus 10:8). Boiti dati, wi e poti prakseri na Gado Kownukondre fu di dati na a wan-enkri tru fasi fa freide kan kon na grontapu.​—Mateyus 10:7.

•   Yesus no taigi wi fu memre a dei di a gebore, ma fu memre a dei di a dede.​—Lukas 22:19, 20.

•   Den apostel nanga den fosi bakaman fu Yesus no ben e hori Kresneti. Wan buku e taki dati „na baka a yari 243 fosi, sma bigin hori Kresneti”. Dati ben de moro leki wán hondro yari baka di a lasti apostel dede (New Catholic Encyclopedia).

•   Nowan buweisi no de taki Yesus gebore tapu 25 december. Bijbel no e taki o ten a gebore.

•   Wi e bribi taki Gado no wani taki sma e hori Kresneti, fu di a fesa disi abi gwenti di komoto fu sma di ben e anbegi falsi gado.​—2 Korentesma 6:17.

 Aladi furu sma sabi taki Kresneti komoto fu sma di ben e anbegi falsi gado èn taki Bijbel no e horibaka gi a fesa disi, toku den e tan hori Kresneti. Kande den sma disi e taki: Fu san ede Kresten no ben e hori Kresneti moro, efu den sabi taki furu sma no o lobi en efu den du dati?

 Bijbel e leri wi fu ’gebroiki wi frustan’ èn fu teki wi eigi bosroiti (Romesma 12:1, 2). Bijbel e leri wi tu fu si den tru leri fu Gado leki warti sani (Yohanes 4:23, 24). Sobun, aladi a prenspari gi wi san trawan e denki fu wi, toku wi e tan du san Bijbel leri wi, awinsi disi wani taki dati sma no o lobi wi.

 Aladi wi teki a bosroiti fu no hori Kresneti, toku wi e lespeki a reti di tra sma abi fu teki den eigi bosroiti. Wi no e tapu tra sma fu hori Kresneti.