Nasigubha Sidlo SeNkhosi Sakusihlwa, nobe Sikhumbuto Sekufa KwaJesu, silandzela loko lokushiwo liBhayibheli. (1 KubaseKhorinte 11:20) Ngalokwehlukile kuloku, letinye tinkholo tiwugubha ngendlela lengavumelani naloko lokushiwo liBhayibheli.

 Injongo yeSidlo SeNkhosi Sakusihlwa kukhumbula Jesu nekutsi sikhombise kubonga ngemhlatjelo lawenta ngenca yetfu. (Matewu 20:28; 1 KubaseKhorinte 11:24) Kugubha lesidlo akusilo lisiko lenkholo nobe umkhuba losenta sitfole umusa nobe kutsetselelwa kwetono. LiBhayibheli lifundzisa kutsi tono tetfu tingatsetselelwa kuphela ngekutsi sikholwe kuJesu, hhayi ngekwenta lisiko lenkholo.—KubaseRoma 3:25; 1 Johane 2:1, 2.

 Jesu wayala bafundzi bakhe kutsi kufanele bagubhe Sidlo SeNkhosi Sakusihlwa, kodvwa akazange asho ngalokucondzile kutsi kufanele sigujwe kangakhi. (Lukha 22:19) Bantfu labanyenti bacabanga kutsi kufanele sigujwe njalo ngenyanga, njalo ngeliviki, njalo ngelilanga, tikhatsi letinyeneti ngelilanga nobe noma nini nje umuntfu nakeva ungatsi ufuna kusigubha. a Nobe kunjalo, kunanati tintfo lokufanele tinakwe.

 Akuzange kwenteke ngengoti kutsi Jesu acalise Sidlo SeNkhosi Sakusihlwa ngelilanga leMkhosi weliPhasika wemaJuda futsi naye afe ngalo lelolanga. (Matewu 26:1, 2) Imibhalo ifanisa umhlatjelo waJesu neliwundlu leliPhasika. (1 KubaseKhorinte 5:7, 8) LiPhasika beligujwa kanye ngemmnyaka. (Eksodusi 12:1-6; Levithikusi 23:5) Ngendlela lefanako emaKhristu elikhulu lekucala bekagubha Sikhumbuto Sekufa KwaJesu kanye ngemnyaka,  b futsi naBoFakazi BaJehova balandzela indlela lefanako.

 Indlela Jesu lawucalisa ngayo lomkhosi wekukhumbula kufa kwakhe ayisitjeli nje kuphela kutsi siwugubha kangakhi kodvwa iphindze isitjele nekutsi siwugubha ngaliphi lilanga nangasiphi sikhatsi. Ngekusho kwekhalenda yeliBhayibheli, Jesu wacalisa lomkhosi ngemuva kwekushona kwelilanga ngaNisan 14, 33 C.E. (Matewu 26:18-20, 26) Njengobe bekwenta emaKhristu ekucala natsi siyachubeka sigubha leSikhumbuto ngelilanga lelifanako njalo ngemnyaka. c

 Ngisho nobe Nisan 14, 33 C.E. beka ngaleSihlanu, kodvwa njalo ngemnyaka uba ngelilanga lelehlukile leliviki. Lelilanga silitfola ngekutsi sisebentise indlela lebeyisetjentiswa ngesikhatsi saJesu kunekusebentisa ikhalenda yemaJuda angesikhatsi salamuhla. d

 Nakacalisa lomkhosi lomusha, Jesu wasebentisa sinkhwa lesite imvubelo neliwayini lelibovu lebekusele ngesikhatsi bagubha umkhosi weliPhasika. (Matewu 26:26-28) Natsi silandzela sibonelo sakhe ngekusebentisa sinkhwa lesingakafakwa imvubelo nobe letinye tintfo, kanye neliwayini lelingakafakwa lutfo, hhayi i-grape juice.

 Lamanye emasontfo asebentisa sinkhwa lesinemvubelo nobe i-yeast, kodvwa ngalokuvamile eBhayibhelini imvubelo iluphawu lwesono kanye nekonakala. (Lukka 12:1; 1 KubaseKhorinte 5:6-8; KubaseGalathiya 5:7-9) Ngako sinkhwa lesite imvubelo nobe lokunye siwufanekisela kahle umtimba waKhristu lobewute sono. (1 Phetro 2:22) Lomunye umkhuba longakasekelwa eBhayibhelini kusebentisa i-grape juice lengakalatiswa kunekusebentisa liwayini. Lamanye emasontfo enta loku ngobe acabanga kutsi liBhayibheli alikuvumeli kunatsa tjwala.—1 KuThimothi 5:23.

 Lesinkhwa lesite imvubelo neliwayini lelibovu lokusetjentiswa eSikhumbutweni kutifanekiselo temtimba waKhristu kanye nengati yakhe. Letifanekiselo akwenteki tishintje ngalokusimangaliso nobe tibhicwe nenyama yakhe sibili nobe ingati yakhe njengobe labanye bacabanga. Asesibuke loko lokushiwo liBhayibheli lokusenta sisho loku.

•   Jesu bekatawube wephula umtsetfo waNkulunkulu wekudla ingati kube watjela bafundzi bakhe kutsi banatse ingati yakhe. (Genesisi 9:4; Imisebenti 15:28, 29) Loko bekungeke kuze kwenteke ngobe Jesu bekangeke aze ayale labanye kutsi bephule umtsetfo waNkulunkulu lomayelana nebungcwele bengati.—Johane 8:28, 29.

•   Kube baphostoli bebanatsa ingati yaJesu mbamba, Jesu bekangeke atsi ingati yakhe ‘itawucitfwa,’ lokukhombisa kutsi bekasengakawenti umhlatjelo.—Matewu 26:28.

•   Kube lesinkhwa neliwayini kuhlale kushintja kube yinyama nengati njalo nakudliwa Sidlo SeNkhosi Sakusihlwa loko bekutawusho kutsi labo labakudlako bahlale benta lomhlatjelo kantsi liBhayibheli litsi Jesu wenta umhlatjelo ‘kwaba kanye kuphela.’ (KumaHebheru 9:25, 26).

•   Jesu watsi: “Chubekani nikwenta ningikhumbula,” hhayi “ninginikela.”—1 KubaseKhorinte 11:24.

 Labo labakholelwa kutsi sinkhwa neliwayini kuba yinyama kanye nengati yaJesu sibili basekela loko endleleni lamanye emaBhayibheli labeke ngayo emavesi latsite. Sibonelo nje, emahumusho lamanyenti eliBhayibheli atsi Jesu watsi ngeliwayini: “Lena yingati yami.” (Matewu 26:28) Nobe kunjalo, lamavi aJesu angaphindze ahunyushwe ngekutsi: “Loku kumelela ingati yami.” e Lapha Jesu bekasebentisa umfanekiso njengobe bekahlale enta nangaletinye tikhatsi nakafundzisa.—Matewu 13:34, 35.

 BoFakazi BaJehova nabagubha Sidlo SeNkhosi Sakusihlwa, bambalwa labadla sinkhwa neliwayini. Leni?

 Kucitseka kwengati yaJesu kwacalisa “sivumelwane lesisha” lesatsatsa sikhundla sesivumelwano Nkulunkulu Jehova lebekasente nesive sema-Israyeli asendvulo. (KumaHebheru 8:10-13) Labo labayincenye yalesivumelwano lesisha ngibo labadla tifanekiselo ngeSikhumbuto. Loku akusho onkhe emaKhristu kodvwa ‘ngulabo lababitwe’ nguNkulunkulu ngendlela lekhetsekile kuphela. (KumaHebheru 9:15; Lukha 22:20) Laba ngulabatawubusa naKhristu ezulwini, futsi liBhayibheli litsi bangu-144 000 kuphela bantfu labatawutfola lelilungelo.—Lukha 22:28-30; Sembulo 5:9, 10; 14:1, 3.

 Ngalokungafani ‘nemhlambi lomncane’ walabatawubusa naKhristu, linyenti letfu linelitsemba lekuba yincenye ‘yesicumbi lesikhulu’ lesitawuphila phakadze lamhlabeni. (Lukha 12:32; Sembulo 7:9, 10) Ngisho nobe tsine lesinelitsemba lekuphila phakadze lamhlabeni singatidli tifanekiselo ngeSikhumbuto, kodvwa sibakhona kuze sikhombise kubonga kwetfu ngemhlatjelo Jesu lasentela wona.—1 Johane 2:2.