1. Ngekusho kwa-1 KubaseThesalonika 5:11, ngumuphi umsebenti sonkhe lesiwentako?

 LIBANDLA lenu like lalakha yini liHholwa leMbuso lelisha nobe lalivusetela? Nangabe kunjalo, kungenteka usakhumbula ngesikhatsi niba nemhlangano kwekucala kulelihholwa lelisha. Bewumbonga kakhulu Jehova. Ecinisweni, kungenteka wakhala tinyembeti tenjabulo ngesikhatsi nihlabela ingoma yekucala umhlangano. EmaHholwa etfu eMbuso lakhiwe kahle ayamdvumisa Jehova. Kodvwa kunalolunye luhlobo lwekwakha lolumdvumisa kakhulu Jehova. Lomsebenti ufaka ekhatsi lokutsite lokubaluleke kakhulu kunetakhiwo. Ufaka ekhatsi kukhutsata bantfu labeta kuletakhiwo tekukhonta Nkulunkulu. Umphostoli Pawula bekanaloku engcondvweni ngesikhatsi abhala lamavi laku-1 KubaseThesalonika 5:11, lokungumbhalo lokusekelwe kuwo lesihloko.​—Fundza.

2. Sitawucoca ngani kulesihloko?

² Umphostoli Pawula usibonelo lesihle semuntfu lowakhona kwakha bazalwane bakhe nabodzadze. Bekabavela. Kulesihloko, sitawucoca ngekutsi wabasita njani (1) kuze babeketelele tinkinga, (2) kutsi bakhe kuthula emkhatsini wabo, nekutsi (3) bacinise kukholwa kwabo kuJehova. Asesibone kutsi singamlingisa njani nekutsi singabakha njani bazalwane betfu nabodzadze lamuhla.​—1 Khor. 11:1.

3. Pawula bekanamuphi umbono lokahle?

³ Pawula bekabatsandza kakhulu bazalwane bakhe nabodzadze. Bekati kahle kamhlophe kutsi kunjani kubhekana nebumatima; kungako akhona kubakhombisa lutsandvo neluvelo nababhekene netinkinga. Ngalelinye lilanga, Pawula waphelelwa yimali, ngako kwadzingeka afune umsebenti kuze atisekele  yena nalabo lebekanabo. (Imis. 20:34) Bekakha emathende. Ngesikhatsi afika eKhorinte, wacale wasebenta na-Akhwila naPhrisila, nabo lebebakha emathende. Kodvwa “njalo ngelisabatha” bekashumayela emaJuda nemaGriki. Ngesikhatsi boSilasi naThimothi befika, “Pawula waba matasatasa ngekushumayela livi laNkulunkulu.” (Imis. 18:2-5) Pawula akazange akhohlwe kutsi yini lebeyibaluleke kakhulu ekuphileni kwakhe, lokukukhonta Jehova. Ngenca yekutsi wabeka sibonelo lesihle sekusebenta kamatima emsebentini wekushumayela, ngesikhatsi lesifanako abe anakekela tidzingo takhe, wakhona kukhutsata bazalwane bakhe nabodzadze. Wabakhumbuta kutsi bangavumeli tinkinga kanye nesidzingo sekunakekela imindeni yabo kutsi kubente bangasatinaki ‘tintfo letibaluleke kakhulu,’ lokungito tonkhe tintfo lesitentako nasikhonta Jehova.​—Fil. 1:10.

4. Pawula naThimothi babasita njani bazalwane babo kutsi babeketelele kuphatfwa kabi?

⁴ Ngekushesha nje ngemuva kwekutsi libandla laseThesalonika lisungulwe, labazalwane nabodzadze labasha baphikiswa kamatima. Ngesikhatsi sicumbi sebantfu labaneludlame singabatfoli boPawula naSilasi, sahudvula ‘labanye bazalwane sabayisa kubaphatsi belidolobha,’ safike satsi: “Lamadvodza amelene nemitsetfo yaKhesari.” (Imis. 17:6, 7) Cabanga nje kutsi esaba kangakanani lamaKhristu lamasha ngesikhatsi abona kutsi emadvodza akulelidolobha sekabajikele! Bekanganciphisa lizinga lamkhonta ngalo Jehova, kodvwa Pawula akazange akuvumele loko kutsi kwenteke. Nanobe yena naSilasi kwadzingeka kutsi bahambe, kodvwa benta konkhe labangakwenta kuze lelibandla lelisha linakekelwe kahle. Pawula wakhumbuta baseThesalonika watsi: “Satfuma Thimothi umzalwane wetfu . . . , kutsi anicinise futsi anidvudvute ekukholweni, kuze kube bete umuntfu lonyakatiswa nguletinhlupheko.” (1 Thes. 3:2, 3) Kungenteka Thimothi bekake wabhekana nako kuphikiswa lokunjengaloku edolobheni lakubo laseListra. Bekayibonile indlela Pawula lebekacinise ngayo bazalwane lapho. Ngenca yekutsi bekayibonile indlela Jehova lababusisa ngayo, Thimothi bekangacinisekisa labazalwane nabodzadze labasha kutsi simo sitawuba ncono.​—Imis. 14:8, 19-22; Heb. 12:2.

5. Bryant lwamsita njani lusito lalutfola kulomunye lomdzala welibandla?

⁵ Yini lenye Pawula layenta kuze acinise bazalwane bakhe nabodzadze? Ngesikhatsi boPawula naBhanabasi babuyela eListra, e-Ikhoniyumi nase-Antiyokhi, “babeka emadvodza lamadzala kulelo nalelo bandla.” (Imis. 14:21-23) Siyaciniseka kutsi lamadvodza lamadzala abadvudvuta kakhulu bazalwane nabodzadze kulawo mabandla, njengobe nalabadzala belibandla benta lamuhla. Naka naku lokwashiwo ngulomunye umzalwane lokutsiwa nguBryant, watsi: “Ngesikhatsi ngineminyaka lengu-15, babe wahamba ekhaya futsi make wayekeliswa kuba nguFakazi. Ngativa ngilahliwe futsi ngidvumatekile.” Yini leyasita Bryant kulesikhatsi lesimatima? Utsi: “Lomunye lomdzala welibandla lokutsiwa nguTony, bekacoca nami emihlanganweni yelibandla nangaletinye tikhatsi. Wangicocela ngalabanye lababhekana netinkinga kodvwa bahlala bajabulile. Wangifundzela Tihlabelelo 27:10 futsi bekavame kungicocela ngaHezekiya, lowachubeka etsembekile kuJehova nanobe babe wakhe bekangasiso sibonelo lesihle.” Kwamsita njani loko? Bryant utsi: “Ngenca yekukhutsatwa nguTony, ngagcine ngingenele umsebenti longenetisako wasikhatsi sonkhe.” Nine labadzala belibandla, hlalani nikuphaphamele kubuka labo labanjengaBryant, lokungenteka badzinga “emavi lamnandzi” lasikhutsato.​—Taga 12:25.

6. Pawula watisebentisa njani tindzaba letimayelana nalokwenteke kulabanye kuze akhutsate bazalwane bakhe nabodzadze?

 ⁶ Pawula wakhumbuta bazalwane nabodzadze kutsi ‘sicumbi lesikhulu sabofakazi’ sikhonile kubeketelela timo letimatima ngenca yemandla letiwaphiwe nguJehova. (Heb. 12:1) Pawula bekati kutsi tindzaba talabo labakhona kubeketelela timo letimatima letehlukahlukene esikhatsini lesendlulile tingabapha sibindzi bazalwane bakhe nabodzadze, futsi tibasite bachubeke banake ‘lidolobha laNkulunkulu lophilako.’ (Heb. 12:22) Kungulokufanako nalamuhla. Natsi kuyasikhutsata lamuhla kufundza ngendlela Jehova lamsita ngayo Gideyoni, Bharaki, Davide, Samuweli kanye nalabanye labanyenti. (Heb. 11:32-35) Tiphindze tisikhutsate netibonelo talamuhla talabo lababe nekukholwa. Endlunkhulu, sivame kutfola tincwadzi letivela kubazalwane nabodzadze lokubacinise kukholwa kufundza ngalabanye bazalwane nabodzadze labetsembekile lamuhla.

7. Yini loyifundza esibonelweni saPawula lesibhalwe KubaseRoma 14:19-21?

⁷ Sisuke sakha bazalwane betfu nabodzadze nasikhutsata kuthula ebandleni. Asivumi kutsi kungafani kwemibono kusehlukanise. Ngetulu kwaloko, asiphikisani netincumo letentiwe nangabe tingashayisani netimiso teliBhayibheli. Cabanga nganasi sibonelo. Ebandleni laseRoma, bekunemaKhristu langemaJuda nalawo lavela kuletinye tive. Ngesikhatsi uMtsetfo waMosi ungasasebenti, besekute sidzingo sekutsi lamaKhristu alalele umtsetfo lomayelana nekungadli lokunye kudla. (Mak. 7:19) Kusukela ngaleso sikhatsi, lamanye emaKhristu langemaJuda bekativa akhululekile kudla lonkhe luhlobo lwekudla. Nobe kunjalo, lamanye emaKhristu langemaJuda bekeva ngatsi akusikahle kudla lokudla. Ngenca yaloko, libandla lehlukana ekhatsi. Pawula wagcizelela kubaluleka kwekuba nekuthula futsi watsi: “Kuncono kutsi ungayidli inyama, ungalinatsi neliwayini futsi ungenti nobe yini lekhuba umzalwane wakho.” (Fundza KubaseRoma 14:19-21.) Ngako Pawula wasita bazalwane bakhe nabodzadze kuze babone kutsi lokungevani bekutawulimata bona kanye nelibandla. Bekakulungele kushintja indlela lenta ngayo tintfo kuze angabakhubi labanye. (1 Khor. 9:19-22) Ngendlela lefanako, natsi singabakha labanye futsi sigcine kuthula ngekutsi singaphikisani ngetintfo umuntfu ngamunye lakhetsa kutenta letingashayisani nemtsetfo waNkulunkulu.

8. Yini Pawula layenta ngesikhatsi kuba nesimo lebesingaphatamisa kuthula ebandleni?

⁸ Pawula wabeka sibonelo lesihle ngekugcina kuthula nalabo lebebangavumelani ngetintfo letibalulekile. Sibonelo nje, labanye kumaKhristu ekucala bebatsi bantfu betive labagucukele enkholweni yebuKhristu kufanele basoke kuze emaJuda angamelani nabo. (Gal. 6:12) Pawula bekangavumelani mbamba nalombono, kodvwa kunekutsi aphocelele labazalwane kutsi bente tintfo ngendlela lebekabona ngayo, watitfoba futsi wendlulisela lendzaba kubaphostoli nakulabadzala belibandla eJerusalema. (Imis. 15:1, 2) Loko kwenta kutsi lamaKhristu achubeke ajabulile futsi kwachubeka kunekuthula ebandleni.​—Imis. 15:30, 31.

9. Singasilingisa njani sibonelo saPawula?

⁹ Nangabe kuba nekungevani, singetama kugcina kuthula ngekutsi sifune sicondziso kulabo Jehova lababeke kutsi banakekele libandla. Etikhatsini letinyenti, seluleko lesisekelwe eBhayibhelini singasitfola etincwadzini tetfu nobe sisitfole nasifundza ticondziso letivela  enhlanganweni. Sitawube sikhutsata kuthula ebandleni nangabe silalela leticondziso kunekutsi siphocelele labanye kutsi bente loko lesikushoko.

10. Yini lenye leyentiwa nguPawula kuze akhutsate kuthula ebandleni?

¹⁰ Pawula wakhutsata kuthula ngekutsi akhulume ngebuntfu lobuhle bebazalwane bakhe nabodzadze, hhayi buntfu babo lobubi. Sibonelo nje, encwadzini yakhe yekugcina layibhalela baseRoma, wabita bazalwane nabodzadze labanyenti ngemagama futsi bekavame kusho tintfo letinhle ngabo nobe loko lebekakunaka ngabo. Singamlingisa Pawula ngekutsi sikhulume ngebuntfu lobuhle bebazalwane betfu nabodzadze. Nasenta njalo, sitawenta kutsi bazalwane betfu nabodzadze babe nebunye, basondzelane, lokutakwenta kutsi emalunga elibandla abe nelutsandvo.

11. Singakwakha njani kuthula nakwenteka kuba nekungevani emkhatsini wetfu nalabanye?

¹¹ Ngaletinye tikhatsi, ngisho nemaKhristu lavutsiwe kungenteka angavumelani ngetintfo letitsite nobe aphikisane. Loko kwenteka kuPawula nakumngani wakhe lomkhulu Bhanabasi. Lamadvodza lamabili bekangavumelani ngekutsi ahambe naye yini Makho eluhambweni lwabo lolulandzelako njengobe bekatitfunywa telivangeli. “Bacabana kabi” futsi babese bayehlukana. (Imis. 15:37-39) Kodvwa boPawula, Bhanabasi naMakho bakulungisa lokungevani lobekusemkhatsini wabo futsi ngekwenta njalo bakhombisa kutsi kuthula nebunye belibandla bekubaluleke kakhulu kubo. Ngekuhamba kwesikhatsi, Pawula wakhuluma kahle ngaBhanabasi nangaMakho. (1 Khor. 9:6; Khol. 4:10) Natsi kufanele silungise kungevani lokungenteka sibe nako nalabanye ebandleni futsi sichubeke sinaka buntfu babo lobuhle. Nasenta njalo, sitawube sikhutsata kuthula nebunye.​—Ef. 4:3.

12. Ngutiphi letinye tinkinga bazalwane betfu nabodzadze lababhekana nato?

¹² Sisuke sakha bazalwane betfu nabodzadze nasibasita babe nekukholwa lokucinile kuJehova. Labanye baphatfwa kabi ngemalunga emindeni yabo langasibo boFakazi nobe labo labasebenta nabo nobe labafundza nabo. Labanye bagula kakhulu nobe baselusizini. Kantsi labanye sekuphele iminyaka leminyenti babhajatisiwe futsi sekuphele sikhatsi lesidze solo balindze kutsi lelive libhujiswe. Letimo tingakuvivinya kukholwa kwemaKhristu. EmaKhristu ekucala abhekana netimo letifanako. Yini Pawula layenta kuze acinise bazalwane bakhe nabodzadze?

13. Pawula wabasita njani labo bebaphikiswa ngenca yetinkholelo tabo?

¹³ Pawula wasebentisa imiBhalo kuze acinise kukholwa kwebazalwane bakhe nabodzadze. Nasi sibonelo, kungenteka lamanye emaKhristu langemaJuda bewangati kutsi awaphendvule njani emalunga emindeni yawo langasiwo emaKhristu lebekatsi inkholo yebuJuda ingetulu kwenkholo yebuKhristu. Siyaciniseka kutsi incwadzi yaPawula layibhalela emaHebheru yawacinisa kakhulu lamaKhristu. (Heb. 1:5, 6; 2:2, 3; 9:24, 25) Bekangawasebentisa lamavi akhe lanengcondvo kuze akhone kuphendvula labo lebebawaphikisa. Lamuhla singabasita bazalwane betfu nabodzadze labaphikiswako kutsi basebentise tincwadzi tetfu letisekelwe eBhayibhelini kuze bachaze ngetinkholelo tabo. Nangabe labasha kuhlekiswa ngabo ngenca yekutsi bakholelwa kutsi tintfo tadalwa, singabasita batfole imininingwane kulencwajana letsi Kwaba Khona Njani Kuphila? naletsi The Origin of Life—Five Questions Worth Asking kuze bakhone kukhombisa  labo lababaphikisako loko lokubenta bakholelwe kutsi tintfo tadalwa.

14. Yini Pawula layenta nanobe bekamatasatasa ngemsebenti wekushumayela?

¹⁴ Pawula wakhutsata bazalwane bakhe nabodzadze kutsi bakhombise lutsandvo “ngemisebentini lemihle.” (Heb. 10:24) Akagcinanga nje ngekusita bazalwane bakhe ngaloko lebekakusho kodvwa bekabasita nangaloko lebekakwenta. Sibonelo nje, ngesikhatsi kunendlala eJudiya, Pawula wasita bazalwane bakhe nabodzadze ngetintfo lebebatidzinga. (Imis. 11:27-30) Ecinisweni, nanobe Pawula bekamatasatasa ashumayela futsi afundzisa, bekahlale afuna tindlela langabasita ngato labo labadzinga lusito. (Gal. 2:10) Ngekwenta njalo, bekasita bazalwane bakhe nabodzadze kutsi baciniseke kakhulu kutsi Jehova utawubanakekela. Lamuhla, sisuke sicinisa kukholwa kwebazalwane betfu nabodzadze nasinikela ngesikhatsi setfu, ngemandla nangemakhono kuze sisite nakuvele tehlakalo. Loku singakwenta nangekutsi sinikelele umsebenti lowentiwa emhlabeni wonkhe. Nasenta loku kanye nalokunye, sisuke sisita bazalwane betfu nabodzadze kutsi betsembe kutsi Jehova akayuze abalahle.

15-16. Kufanele sibaphatse njani labo labanekukholwa lesekubutsakatsaka?

¹⁵ Pawula akazange abalahle labo lebebanekukholwa lokubutsakatsaka. Bekabakhombisa luvelo futsi bekakhuluma kahle nabo nangendlela leyakhako. (Heb. 6:9; 10:39) Nasi sibonelo, encwadzini lebekayibhalele emaHebheru, wasebentisa sicalo letsi “si-” neligama lelitsi “kitsi” kuze akhombise kutsi naye bekufanele asisebentise leseluleko. (Heb. 2:1, 3) NjengaPawula, natsi asibalahli labo labanekukholwa lokubutsakatsaka. Kunaloko, siyabakha ngekutsi sibakhombise kutsi sinendzaba mbamba nabo. Nasenta njalo, sitawube sikhombisa  kutsi siyabatsandza. Loko lesikushoko kutawubasita kakhulu nangabe sikhuluma nabo ngemusa.

¹⁶ Pawula wacinisekisa bazalwane bakhe nabodzadze kutsi Jehova uyatati tintfo letinhle labatenta. (Heb. 10:32-34) Natsi singenta lokufanako nasisita umzalwane wetfu nobe dzadze losanekukholwa lokubutsakatsaka. Singamcela asicocele kutsi walitfola njani liciniso nobe simkhutsate kutsi acabange ngesikhatsi lesendlulile lapho Jehova amsita khona. Singakusebentisa loko kuze simcinisekise kutsi Jehova akakukhohlwa loko lakwenta esikhatsini lesendlulile lokukhombisa kutsi uyamtsandza nekutsi Jehova angeke amshiye esikhatsini lesitako. (Heb. 6:10; 13:5, 6) Kungenteka loko kungamkhutsata lomzalwane wetfu nobe dzadze kutsi achubeke akhonta Jehova.

17. Ngumaphi emakhono lesingachubeka siwatfutfukisa?

¹⁷ Umakhi uyatfutfuka emsebentini wakhe njengobe sikhatsi sichubeka, natsi singatfutfuka endleleni lesakha ngayo labanye. Singabasita labanye kutsi batfole emandla ekubeketelela tinkinga ngekutsi sibatjele ngalabanye labakhona kubeketela esikhatsini lesendlulile. Singakhutsata kuthula ngekukhuluma ngetintfo letinhle letentiwa ngulabanye, ngekutsi silondvolote kuthula nakuvela timo letifuna kukucedza nangekutsi sakhe kuthula nakwenteka kuba nekungevani. Singachubeka sakha kukholwa kwebazalwane betfu nabodzadze ngekubacocela emaciniso labalulekile laseBhayibhelini, ngekubasita ngetintfo labatidzingako nangekusita labo lasebanekukholwa lokubutsakatsaka.

18. Yini lotimisele kuyenta?

¹⁸ Labo labasita ekwakheni takhiwo tenhlangano bajabulile futsi benetisekile. Natsi singajabula futsi senetiseke nasakha bazalwane betfu. Ngalokungafani netakhiwo letigcina tonakele, umsebenti wetfu wekwakha ungahlala kuze kube phakadze! Shengatsi singatimisela ‘kuchubeka sikhutsatana futsi sakhana.’​—1 Thes. 5:11.